السلام عليكم و رحمة الله

موضوع حلو و رائع ,,

بالنسبة لي , كان يوم الشوفة يوم ما ينسي ,,
دخلت المجلس و تفاجأت بمجموعة حريم جالسات يتقهوون , طبعاً انصدمت و تراجعت و بغيت أحط رجلي , قلت يمكني داخل غلط , ما أمداني الا أسمع وحدة من الحريم تناديني تقول لي تعال يا وليدي حياك تعال , دخلت و سلمت عليهم و أنا مرتبك و حالتي حالة. طبعاً لاحظ اني مسوي بروفة مع الوالدة قبلها و محضر أسئلة بس اللي صار لخبط أوراقي كلها و خلاني اختفي جو هدومي من الربكة و الحياء.

بعد ما جلست فطنت ان البنت جالسة معنا لأنها كانت الوحيدة اللي كانت كاشفة و مو لابسة عباية , يعني ما يبيلها ذكاء. طبعاً ما سألتها و لا سؤال و ناظرت فيها مرة و لا مرتين. أمها حاولت تفتح مواضيع للنقاش بينا بس ما في فايدة , أنا رايح فيها و قلبي قاعد يدق دق دق دق , تلوموني ! , و البنت مستحية مرة و وجهها كنه طماطة. عاد سلمته عليهم و مشيت.

بعدين كلمتهم و قلت لهم أبي شوفة ثانية بس هالمرة بدون جمهور لو سمحتوا ,, و فعلاً رحت شفتها مرة ثانية و كان معنا بس اخوها الصغير ,,
و سألتها عن دراستها و ايش ناوية تسوي في المستقبل و ايش نظرتها للزواج و هل تحب الأطفال , يعني أسئلة عامة و تقليدية , و بصراحة أسرتني بشدة من هذي الليلة و صرت ما أفكر الا فيها , حتى أمي صارت تناظرني و تبتسم , عرفت اني خقيت على البنت و حبيتها.

هذه تجربتي بكل اختصار
أتمنى أنكم تستفيدوا منها و بالتوفيق لجميع الشباب و البنات و الله يرزقكم بابن و بنت الحلال

تحياتي
أخوكم / اصقر