أنا توقعت اني بحصل مشكلة مهمة .. والمشكلة اللي انته فيها تراها من صنع خيالك وعاطفتك اللي من كثر ما هي متأججة بفضل الله ثم زوجتك اللي علمتك معنى العاطفة .. !!
أخوي .. انت تتوقع ان اللي تزوج ثانية بسبب الحب والعواطف وعصافير الكناري والأفلام الهندية اللي كنا ايام تلفزيون ابيض واسود نشوفها .. بتعمر معاك العمر كله ؟؟ والا هي نزوة تحب انك تعيشها وتوهم نفسك انك عايش حب أفلاطوني ؟؟
كلامي مب تهجم عليك .. بالعكس اخوي .. انا احترم الريال اللي ينزوج مرة ثانية وثالثة ورابعة .. وانا من المؤيدين لفكرة تعدد الزوجات .. بس على شروط محددة .. حددها لنا الشرع واللي أجازه الشرع (بالعقل) ما نحرم احنا يالبشر ..!!
انت تقول (((بعد الزواج لم اشعر تجاهها بشعور الزوج ناحيه زوجته كنت احترمها و اقدرها و لا عمري غلطت عليها لكن المحبه بمعناها الصحيح لم تكن موجوده )))
وشو هو شعور الزوج تجاه زوجته .. اذا فرضنا انهم تزوجوا بالطريقة التقليدية ((وانت زواج كان بالطريقة التقليدية يعني لاحبيتها قبل الزواج ولا تعرفها من الأساس))... تعتقد انه بيكون ميت عليها والا هي ميتة عليه ؟؟ لا بالعكس .. بيكون الحترام موجود ..والطيبة موجودة إلى أن يثبت العكس .. وذيك الساعة تبتدي المشاكل وعوار الراس .. وهذا هو اللي صاير معاك .. بس من دون مشاكل وعوار راس ((بعيد الشر)) .. والمشاكل وعوار الراس انت اللي تلقه على حساب بناتك ونفسياتهن .!
وقلت ((وهي كانت تحبني وتعلقت فيني بشكل كبير خاصه انها كانت مع امها عند اخوها الكبير و لم تكن مرتاحه معهم ))
هذا هو شعور أي بنت أول ما فتحت عيونها على الدنيا ما شافت الا ابوها .. ومن بعده انته .. شي طبيعي انها تتعلق فيك .. لانها شافت الدنيا بشكل ثاني بفضل الله ثم بفضك .. وعلمت على ايديك وعلمتك على اياديها .. بما انكم من نفس العمر ... شو تبغيها ؟؟ ما تتعلق فيك ؟؟؟؟ الا تتعلق ونص بعد .. وهذا مب غلط في حق نفسها ولا هو غلط عليك .. بالعكس .. هذا دليل على انها شاريتنك بكل ما فيها من عاطفة .. !!
وقلت ((و انا للأمانه تعلقت بها مع مرور الوقت لاخلاقها الفاضله )) .. ولو كانت مثل بنات هاليومين ((اللي بيطيروا العقل بدلالهن وغنجهن على قولة اخوانا الشاميين)) .. اللي ما لهن شغلة ولاعملة في يومهن بعد الزواج الا مطالع التفلزيون .. والخروج والدخول مع صديقاتهن .. والكلام الفاضي .. كنت اساسا بتتعلق فيها ؟؟؟ كنت على الاقل بتردها بيت اهلها .. وبتقول ((خذوا بنتكم .. وربوها علشان تكون ربة بيت وأم صالحة لعيالي)) اللي هي زوجتك الحالية.. وكانت زوجتك الحالية في نظرك ساعتها فتاة أحلامك اللي تاخذ العقل والروح ..!!
يمكن اللي صايبك ملل زوجي .. كلنا مرينا فيه .. وحسينا انه نهاية العلاقة الزوجية .. وصيرنا الطلاق .. لانه ما عاد هناك أي عاطفة .. بس تعرف شي ؟
اذا تبغي تحس انك تحب زوجتك حب جنوني .. حط نفسك في تأملات .. وتخيل أشياء مستحيل انها تستوي .. مثل
1_ تخيلها مع زوج ثاني .. بعد ماتزوجت انته طلبت الطلاق وتزوجت غيرك..
2_ تخيلها اختفت .. شردت من البيت لأسباب غامضة..
3- تخيل انها مرضت ... (((بعيد الشر عنها يارب))) .. مرض شدد قالوا الأطباء إنها بتفارق بعد شهر .. شو ممكن تسويلها في هالفترة ؟؟
4_ تخيل انك انته مرضت .. ((( بعيد الشر عنك يارب))) .. هي شو ممكن تسوي لك في هالفترة؟؟
5_ تخيل انها تغيرت عليك .. وصارت سليطة لسان .. ومحد يسلم من لسانها حتى امها ..!
6_ تخيل انها طلبت الطلاق لعدم استطاعتها تحملك أكثر عن اللي تحملته منك.. ((وايد يسوونها))!
تخيل أسأ الأمور ممكن تحصل لك .. خيل أي شي .. أي شي ممكن خيالك يوصلك له .. حتى لو كان قاسي عليك .. شو بتكون ردة فعلك ومشاعرك من ناحيتها ؟؟
وتخيل فوق هذا وهذا .. انك تزوجت .. ولا فلحت في حياتك .. أكيد بتدور على حب ثاني وثالث ورابع .. لين تحل مشكلة العنوسة في الخليج .. بمشكلة ثانية .. زيادة عدد المطلفات .. ؟؟
وشو ممكن تتخيل في أي مرأة ثانية ممكن يخليك تحبها .. مب موجود في زوجنك ؟؟
الحرمة هي نفسها الحرمة .. مهما تغيرت الأماكن والظروف .. من أقاصي الأرض لأقاصيها .. الحرمة بتم حرمة .. مهما درت على حب يديد والا قديم .. في النهاية بتكون النتيجة وحدة .. لانك ما تدور على زوجة تحبها .. لانه لو كان فيك عاطفة كان حبيت هالمسكينة اللي في بيتك .. انت تدور على علاقة مغلفة بإطار الزواج .. علاقة تخلق فيك نوع من الأنانية ..
و اهم شي ما تنسى تتخيل ان لو كان الموضوع منقلب عليك انته .. وهي زوجتك اللي ما تحس من ناحيتك بأي شي .. على الرغم من انك مب مقصر في أي شي .. من ناحية الدلال والدلع والاحترام .. وحسن التبعل .. وكامل والكمال لله (( ماشالله عليك )) ويتك زوجتك .. قالت لك أنا ما أحس اني احبك .. طلقني علشان اقدر أحصل الحب اللي يهز كياني ويزلزلني من الأعماق .. ولا اني قادرة احصله وأنا زوجة لك .. لاني بهالطريقة أخونك .. شو بيكون ردك ؟؟؟
والسموحة على الإطالة . بس الموضوع نرفزني بصراحة