حياج الله اختي مها الكويت في قطر واذا ماشالتج الأرض تشيلج عيوننا ماشالله الأخوان والخوات ماقصروا وفوا وكفوا بس حبيت أضيف بالنسبه للمطاعم للجلسات الهاديه قبل تقاطع فندق رامادا في مطعم اسمه منت القعده فيه تجنن والأكل ألذ . ومطعم اخر جنبه اسمه كريب واي ونفس الشي في الشارع المقابل له بجانب مطعم فوشون في مطعم اسمه نيو new وراقي وايد .أما الكورنيش عندنا شي عجيب وعلى طوله يقدرون اليهال يتمشون فيه براحتهم أو يتزحلقون الله يعزج بجوتي التواير وأمان لأن مواقف السيارات بتكون بعيده عنهم يعني في فاصل بين ممشىالكورنيش والسيارات الله يحفظهم لج . وتقدرون تركبون المراكب اللي منتشره على طول الكورنيش في جوله لمدة معينه ماأذكر يمكن نصف ساعه في البحر أو تكملون لجزيرة النخيل وهذي الجزيرة بيستانسون فيها اليهال وايد فيها العاب ومطاعم وشاطئ للسباحه نظيف . وعندج على الكورنيش مطاعم رأس النسعه وفيه قعدات داخليه وخارجية بس الخارجية أحلى لأنه يطل على الكورنيش ويقدملج الأكلات الشعبيه مثل المشاوي والهريس والفول والباجله .... الخ " والقدو "" يعني الأرجيله . وفيه العاب للأطفال مثل المراجيح وغيره تقدرون تتعشون براحتكم وتراقبون عيالكم جدامكم من غير خوف عليهم .وماأنسى بالنسبه لحياة بلازا فيه ملاهي للأطفال اسمه جنغل زون وايد حلو . اه تذكرت اذا كنتي من هواة الأكلات الحاره في مطاعم هنديه وأفضلهم نجمة الهند في المرخيه بخارى في الدفنه وكرافان في مجمع المطاعم في تقطع رمادا .وأتمنى لج وللعائله اقامه طيبه عندنا وحياج الله وسامحينا على القصور واذا تذكرت شي بقولج .