اختي الكريمة ..
مشكلتك بسيطة ان شاء الله وكلنا مرينا بهذي المرحلة ..
ليس دائما تكون السنة الاولى عسلا .. بل غالبا ماتحدث فيها اصطدامات نتيجة البيئات المختلفة التي تربى فيها الزوجان .. وايضاطباعهما المختلفة وهو امر طبيعي جدا نتيجة اختلاف الطباع والعادات بين البيوت المختلفة والتي تحتاج لصبر وتفاهم وكثييير من المحبة واحسان الظن بالطرف الآخر حتى تمر هذه المرحلة بسلام
اختي العزيزة .. ربما يكون علينا نحن الزوجات العبء الاكبر في هذه المسألة .. لاتستعجلي فالثمرة الحلوة سنقطفها نحن اولا من محبة ازواجنا لنا وتعودهم علينا . وراحتهم في بقاءهم معنا..
صدقيني وانا اتحدث من واقع تجربة مع زوج ليس عصبيا فقط بل كتلة من العصبية تمشي على الارض وحساس جدا .. اقول لك يااختي العزيزة لاتكبرين الامور وهي صغيرة .. وصغري وهوني الامور الكبيرة .. اولا عشان بالك انتي يرتاح لان اللي يزعل بسرعة هو اول من يتعب ..
فقوي قلبك شوي .. ولاتصيرين دلوعة الا في ظروف معينة بقولك عليها بعد شوي
الشي الثاني عليك بالصمت المطبق التااااااااااام اذا عصب زوجك لاتردين مهما قال ولاتعتبين عليه باللي يقوله ترى احيانا الوحد يقول اشياء وهو معصب مالها داعي !!!! ولايحس من سكوتك الاستهزاء او التجاهل بالعكس حسسيه انك تسمعينه وحاسه بشعوره
بعدين اتركيه يروح اذا بغى او ينفرد بنفسه اليييييين يروق
بعدين (المرحلة الحاسمة )
اذا هدا عاد .. جاء وقت الدلع .. سوي له كاس عصير او شاي او كوفي او اي شي يحبه .. واجلسي جنبه بدون اي كلمه .. لين يبدا هو ترى احيانا بيعاتبك بس خليه لين يخلص بعدين ابدي بكلمة حلوة مثل سم (بالفتحة)! او من عيوني وان شاء الله مايصير الا اللي تبغاه
معليش اضغطي على نفسك في البداية بس صدقيني والله بتلقين نتيجة رهيييبة
وحاولي تغيرين شوي في البيت وفي اللبس وفي السواليف حسسيه دايما انك محتاجه حبه ووجوده يسعدك واظهري هذي الفرحة لما يكون في البيت .. شوي شوي بتلقينه ينجذب لك وينسى اصحابه ومدام هو طيب معك قولي الحمدلله ترى زوجك يحبك بس زي ماقلتلك يحتاج وقت يتكيف مع الحياة الزوجية وانتي كذلك .. الله يوفقكم ويسخركم لبعض ويزيد محبتكم ويسعدكم . آآمين
وآسفة على الاطالة