أنا مريت بنفس المشكلة من شهر تقريبا وعرضتها في المنتدى بس الفرق إن زوجي رجع لي احسن من قبل والأخوان ما قصروا خلوني أغير رايي في طلب الطلاق
لكن أحب أقول إن هذا جرح كبير وأنا للحين ما نسيت ولا قدرت اسامح زوجي على هالغلطة والمرأة المخلصة والشريفة ما تتحمل الخيانة حتى لو كان مجرد كلام فكيف إذا كان زيارات وكلام غير شرعي
أختي أنا رأيي إن قريبتج لازم أتأدب زوجها ولا تكون ضعيفة لأن إلي خوف زوجي ورجعه إني شلت أغراضي وطلعت من البيت
حس ساعتها إن راح يفقدني وينفضح عند الأهل بس لو ظلت ساكته وسلبية مستحيل يرجع لانه هالشي عاجبة وزوجته ما عندها أي مشكلة والدليل إنها راضيه وساكته
أنا ما أقول إنها تطلب الطلاق لكن الزوج لازم يحسب حساب لمشاعر زوجته وإذا هي ظلت ساكته هو ماراح يفهم إنها متضايقة إلا لو قالتها صريحة وبينت غضبها
الزوجة يمكن تقدر تصبر شهر أو شهرين لكن مستحيل تقدر تصبر أكثر والمشكلة إلي من هالنوع لازم تنحل من البداية
وهم في بداية حياتهم الزوجية والحدود لازم تنحط من ألحين وكل ما تأخر حل هالمشكلة كل ما كبرت زيادة
وانا أفضل لو إنها تسأل عن موضوع الصلاة وإصرارة على الخيانه وهو متزوج وماله عذر
لا الدين ولا العرف يقبل أن هذا الشي يصير
أما بالنسبه لمزاجيته وعمل أي مشكله للخروج فهذا شي طبيعي لأنه الزوج إذا كلم بنات أو طلع معاهم يبتدي يقارن زوجته فيهم ويضيق صدرة بسرعة لأنه عارف إنه راح يحصل على الحب والحنان برع البيت وهذا كله نتيجة للخيانة ومن تجربتي لما كان زوجي يكلم وأنا ما أدري كانت تصير بينا المشاكل بدون سبب وكان يعصب على أي شي ووصل لدرجة إنه يغلط بحقي وبعدين يقول لي إنتي الغلطانه لكن لما رجع لربه وتاب تغيرت معاملته وصار صدره أوسع وكان السبب الرئيسي إلي خلى زوجي يغلط الرفقة السيئة والتهاون في الصلاة " إن الصلاة تنهى عن الفحشاء والمنكر"
أهم شيء أن الزوجة تحاول تخلي زوجها يهتم بالصلاة ولا ما شي فايدة من كل إلي تسويه
والسموحة