أختي الكريمة أم فارس:
هذه المشكلة بصراحة حصلت في عائلتنا ولا أخفيك كانت على عكس بعضها طبعا كلاهما من العائلة الحريم اللي حصل معاهم هالشي الأولى عاشت عشان أولادها وهذا رجلها ماتغير وصدقيني لها عنده 30 سنة وهي تقول لما ازوج اولادي ابسيبه وباقي بنت بتزوجها وترجع لبيت أهلها تخيلي المأساة.
الثانية بعد 13 سنة زوجها انعدل وصار يجنن تصدقين كل الناس ماتصدق إن هذا هو رجلها يعني مثلا يوصلها لبيت زميلاتها ويقعد يستناها لين تطلع يعني حوالي ساعة وهو جالس يحتريها وطبعا مايغيب عن بيتها لكن صدقيني هذه الحرمة هي حكيمة كثير وتخيلي يعني كانت تصرف عليه هي وهو يدرس لأنه تزوجته وهو طالب كلية وهي كانت مدرسة ورغم كل هالشي (هي تقلي) تجيه أيام بقلها ما ني نفس اشوف رقعة وجهك ويوصلها لعند أهلها وبعد ايام يجي ياخدها وهي طبعا تزعل شوي لكن اهلها يقولوا لها حاولي تصبري وصبرت ودعت ربها كثير إن ينصلح حاله وشدته نحو الدين بالنصائح بالأشرطة تحطها في البيت وتحاول تروح معاه للحرم وهي تقله وصلني الحرم ومن هالأساليب، سوت بيتها مملكة ولبست له أحسن لبس (بالرغم إن مطنش مثل هالمواضيع) ومع الدعاء والابتهال إلى الله اتحسن الرجال وصار يهتم ببيته لكن الشيشة ماسابها يعني لازم يروح للكازينو يطلع اللي براسه ويرجع ولما شافت مافي حل اشترتله شيشة من النوع الغالي وحطتله هي ولما شاف اهتمامها طنش الكازينوهات وصار بيته كل شي فيه وصدقيني هي وهو الآن من أروع الأزواج.
بس تعبت كثير عشان صار والفرق بينها وبين الأولى بس في أنها التجأت إلى الله في قيامها الليل.
أما بالنسبة للخيانة فاللي قالتلها هالحل وحدة من شدت حماسها وقهرها من الموضوع غلطت وقالتلها هالموضوع بعدين الخيانة حل يعني إذا نسيت إن الله شايفها ماتخاف من فضيحة تخليها طول عمرها راسها في الأرض هي وعائلتها وأهلها وتصير علك بفم الناس.
أنا نصيحتي لها تستخير الله وهو بإذنه حييسر لها إما طريق الطلاق أو تكمل معاه والحالتين والله واقعيات وكما ذكرتهم لها بدون تفاصيل مملة.
اللهم اهدي أزواج وزوجات المسلمين وأصلح ذات بينهم.