خلصنا من اهم الشوارع ومافيها من محلات وفنادق ومطاعم .. ونجي الحين للمعالم والاسواق الموجوده في اماكن غير الموجودة في الشوارع السابق ذكرها

الـــــمـــــعــــالـــــم :

برج ايفل Eiffel Tower.. اعلى مكان في باريس .. ارتفاعه 276 متر وتطلع له بالمصعد والا بالدرج (ايه هين ) ويفتح من الساعة 9 الى الساعه 12 في الليل .. بس نصيحتي لاتنسى تجيب جاكيت والا بتنتفض من البرد





متحف اللوفر ..

من اشهر المتاحف في العالم وموقعه خلف ساحة الكونكورد اللي في نهاية الشانزاليزيه .. وفيه اشهر لوحه .. اللي هي الموناليزا ..






قوس الدفاع او لا ديفانص Grande Arche de la Défense القوس هذا صاير في مقابل لقوس النصر بس في مكان بعيد

مونمارت او مونماختغ Butte Montartre & Basilique du Sacre Coeur

مونباغناس montparnasse وهذي اطول بنايه في اوروبا ارتفاعها ياصل الى 209 متر وفيها مطعم يطل على باريس كلها (فرحانين بالجلوب؟؟ )

نهر السين

طوله 13 كيلو جزر فيه رحلات سياحيه في النهر على سفن اسمها باتيموش تاخذ فيك لفه على النهر .. وفيه سفن فيها مطاعم تضرب فيها عشوه رايقه


الملاهي :

ديزني لاند باريس Disny Land Paris

وهي تبعد 25 كيلومتر عن وسط باريس .. وتقدر تروح لها بالسيارة او بالقطار او بالباص .. منطقة الديزني عبارة عن منتجع كامل .. يعني تلقى فيها فنادق وحدائق وملاهي ومطاعم مثل بلانيت هوليوود.. وبالنسبة للملاهي اول ماتدخلها تلقى مكاين تبيع كروت اسمها فاست باس Fast Pass

ملاهي استريكس Parc Asterix

ملاهي جميله وتبعد عن وسط باريس 36 كيلومتر

اكوا بولفار Aqua Boulevard

مدينة مائيه روعه .. للكبار والصغار

الحدائق :


حدائق باريس كثر شعر راسي بس راح اذكر اشهر الحائق الموجوده فيها

جاردان دو شام دو مار Jardin du Champ de Mars

غابة بولونيا Bois de Boulogne
الغابة هذي ولا مخطط المطار !! ( ياعيني على التشبيه ) الغابة هذي في
وسطها حدائق وبحيرات .. ويازين لعب الكورة فيها

بارك دو مينسو Parc de Moncesu
الحديقة ذي رايقه وبشده .. حتى اني افكر اشتري فيها راس بلك واقسمه ..
وموقعها في شمال الشانزاليزيه

جاردان دو تيليريه Jardin Des Tuileries حديقه حلوه و فيها بشر !! وهي عن الشانز اليزيه دزبله ( قبله )
وفيها مدينة ملاهي حلوه ..


حديقة النبات








الاسواق :

خبرتي في الاسواق مهيب الى هناك ... لكن اشهر سوق موجود في باريس هو القاليري لافاييت GALERIES LAFAYETTE
وهو في منطقة الاوبرا او باريس 9 على شارع بولفار اوسمان boulevard Haussmann .. ويتكون من سبعة او ثمانية ادوار..ويفتح من الساعة 9 ونص صباحاً الى 7 ونص مساءً .. السوق هذا في اي شي تبيه .. وبس!! هذا اللي اعرفه عن هالسوق

بعض الكلمات الفرنسية المتداولة

: (طبعاً بدل الراء بالغين والفاء بـV )
صباح الخير : بونجور ، مساء الخير : بونسوار ، كيف حالك : كومون سافا
، بخير : تخغيبيان ، الى اللقاء : اوروفوار ، تصبح على خير : بون وي ،
انا اسمي بريق : والتبن قصدي جو مابيل بريق ، تتكلم فرنسي : باغليفو
فغانسي ، من فضلك : سيل فو بليه ، شكراً جزيلاً : ميغسي بوكو ،
حسناً : داكور ، نعم : وي ، لا : نو ، اعذرني : اكسيكيوزموا ، آسف :
باردون ، كيفكم : كومون اليفو ، 1 : اون ، 2 : دو ، 3 : تروا ، 4 : كاتر
، 5 : سانك ، 6 : سيس ، 7 : سيت ، 8 : ويت ، 9 : نوف (يازين هالرقم )
، 10 : ديس ، مبسوط بشوفتكم : انشانتيه دوفوفوار ، انا : موا ، انت :
توا ، هو : ايل ، الايام من السبت الى الى الجمعة : سامودي ، ديمانش ،
ليندي ، ماردي ، ميركودي ، جودي ، فانترودي .

المال

اللي يجي باريس وماخذ معه شيكات سياحيه .. عادة ماتكون توماس كوك
او امريكان اكسبريس ..مشكلة المحلات والمطاعم في باريس مايعترفون كثير
في الشيكات السياحية ..معنى هالكلام انك يبيلك تحولها الى كاش .. اذا
رحت للصرافين العاديين خذوا عليك عمولة ، وغالبيتهم ياخذون 3% ..لكن
تقدر تحولها بدون عموله من الشركة اللي ترجع لها شيكاتك.. بالنسبة
لتوماس كوك فروعها منتشره في كل مكان الشانز اليزيه لحاله فيه ثلاثة
فروع لهم !! ومنطقة الاوبرا اللي اعرفه فيها اثنين ... اما بالنسبة للامريكان
اكسبريس هذولا علل فروعهم قليله لكن فرعهم القريب موجود في منطقة
الاوبرا وبتلقى مركزهم كبير وواضح .. وصرافينهم موجودين في قبو المركز ..
بس لاتنسى تجيب جوازك اذا جيت تصرف !!! ترا لو تجيب اي اثبات ثاني
مايعترفون فيه .. لازم الجواز

التنقل في باريس

اما عن طريق المترو او التاكسي .. المترو اول شي تشوف
خط سيرك والمحطة اللي تبي تروحلها وبعدين تقص تذكره سعرها تقريباً
1ونص يورو وتوصلك للمكان اللي تبيه ... وانتبه ترمي التذكرة اذا دخلت ..
لان الشرطة احيانا تسوي حملات تفتيش على التذاكر واذا مالقوا التذكرة
دخلت في سين وجيم .. وانتبه من النشالين .. ترى اساليبهم كثيره ...
والتاكسي من 7 الصباح الى 7 المساء تختلف تسعيرته عن بعد الساعة 7
في المساء .. طبعاً في المساء تكون اغلى !!وممنوع انك توقفه من اي
مكان .. لازم تاخذه من عند موقف التكاسي وتلقى لوحه مكتوب عليها TAXI
اوقف تحتها وبيجيك التاكسي ..

يتبع

محمد الشرقاوى