الفنادق
نجي للفنادق .. طبعاً مافيه احد مايعرف فندق الماريوت Marriott.. وهالفندق
صاير في قلب الشارع ولاعليه كلام ... جنبه شقق فندقيه اسمها كلاريدج
Clari
e حلوه بس مشكلتها انها شوي قديمه .. لو سكنت فيها وصادف
ان الجو حار تقدر تطلب مكيف للغرفه .. لانها تجي بدون مكيفات .. ولهواة
الطبخ اطلبوا مواعين ولاتستحون .. خلوهم يجيبون المعاميل كلها وترا عندهم
زمزميات للقهوة والشاهي ... وهالثنين هم الوحيدين اللي في الشانز اليزيه ..
لكن فيه حولهم فنادق كثيره منها : كاليفورنيا ، كلاريدج بولمان ، تشاتو
فرونتناك ، ورويك ، وكونكورد لافاييت .. وهالاخير هو ابعدهم .. بينه وبين
الشانز من 10 دقايق الى ربع ساعه مشي ... وغيرها كثير
الصرافين
الصرافين الموجودين في هالشارع بتلقاهم منتشرين في كل جهه .. طبعاً
يبيلك تشوف من احسن واحد فيهم سعر .. هالكلام في حالة انك جاي للبلد
مامعك يورو .. وانا اشوف ان افضل اثنين هم اللي موجود المجمع التجاري اللي
فيه فناك FNAC والثاني في المجمع التجاري اللي فيه بلانيت هوليوود ..
والاخير يبيع بطاقات مكالمات دوليه ... وبالنسبة لبطاقات اعادة التعبئه للجوال
تلقاها عند فناك
FNAC
شارع جورج الخامس او افنيو جورج اسانك Av. George V
وياتي في قلب هذا الشارع الفندق العالمي الشهير فندق جورج الخامس
Four Seasons Hotel George V واللي تعود ملكيته للامير الوليد بن طلال
وهو من اغلى الفنادق في باريس وافخمها ... وجنبه فندق برنس دو قول
Prince De Galles ... ويوجد في راس الشارع شقق الكاريدور وهي قريبه
مره من الفوكيت ...وقدامها محل يبيع ايس كريم خطييييييييييييير الظاهر ان
اسمه بارادايس
paradise اذا ماني غلطان .. لايفوتكم الايس كريم عندهم ..مكتب
الخطوط السعوديه في نفس الشارع ورقمهم مميز وفي الشارع نفسه مطعم عربي
اسمه وبقاله عربيه اسمهم الديوان .. اذا حنيتوا للاكل العربي مهوب يخالف تجون
تاكلون فيه .. والمطعم صاير في الدور الثاني ويجي فيه غناء في الليل بس
احيانا يبيلك تحجز قبل تجي .. وترا مافيه خربطه يعني مناسب للعوائل..
ودير بالك على الفاتورة يدخلون فيها طلبات ماطلبتها ..
عشان كذا يبيلك تدقق في الفاتورة قبل تحاسبهم هذا ...
في الدور الارضي من المطعم فيه اكلات عربيه على السريع .. مثل شاورما
وفلافل وكبه وانت ماشي .. وفيه بقاله عربيه ...ومن المطاعم العربيه الثانيه
مطعم نورا .. ومكانه في خلف فندق جورج الخامس وله فروع ثانيه في باريس ...
وفي شارع جورج الخامس مطعم حلو وفخم اسمه فندي
FINDI وعلى ما اعتقد
انه مايفتح الا في المساء ..في الشارع محل كبير لجورجيو ارماني ..
وبوتيك فريه
FERRE وفيه محلين حلاقه في نفس الشارع ( رجالي ونسائي )
ممتازين بس غاليين .. حلاقة الذقن بس بـ 40 يورو والشعر بـ 60 يورو
يتفرع من شارع جورج الخامس شارع اسمه فرانسوا الاول
rue Francois Ier
وعلى هالشارع مجموعه من الفنادق والمطاعم منها مطعم العجمي (فرع للي
عندنا في شارع الثلاثين ) .. وفيه شركة وبوتيك كارتييه
Cartier ... وفيه
بعد بوتيك شوميه وزينيا وفرساتشي وغيرها كثير
في نهاية الشارع يجي شارع من العيار الثقيل اسمه افنيو مونتين
Avenue Montaigne وهالشارع عليه افخم المحلات في العالم مثل شانيل،
وهاري وينستون ، وروبرتو كافالي، ولوي فيتون ( بعض الناس يسمونه لويس فويتن ) وغيرها الكثير من المحلات الفخمة ... ويتربع في وسط الشارع فندق بلازا اثينيه
Plaza Athenee وهو من الفنادق الفخمة في باريس
وفيه شارع اسمه رو فوبور سان اونوريه
Rue Faubourg St Honoré والشارع هذا يعادل الافنيو مونتين في الفخامة والمحلات اللي فيه تقريباً نفس المحلات في الافنيو مونتين الا انها اكثر هنا ... وفي نفس الشارع فندق بريستول
Bristol وهذا اغلى فندق في باريس .. يعني اذا مريت من عنده ناظره وصد كنك ماشفت شي
يتبع
محمد الشرقاوى