السلام عليكم ورحمة الله وبركاته ..

أنا سعيدة إني انضميت لكم .. بعد خمس محاولات تسجيل كلها باءت بالفشل


راح أسرد لكم القصة .. وأبي حل الله يخليكم .. وياليت يكون من واحد او وحده مجربين ..

أنا اتقدم لي شاب الكل مدحه في أخلاقه وفي بره لأهله .. ووافقت عليه بعد تردد شديد .. والسبب إنه مافي اقتناع داخلي .. أقصد في مميزاته ..

الحمد لله أنا فيني مميزات وكنت أتمنى زوجي يكون صاحب مستوى إجتماعي وعلمي مميز .. وبعدها تنازلت عن العلمي وقلت أهم شيء الإجتماعي .. لكن خطيبي مايملكهم اثنينهم ..( ماأقصد مستوى اجتماعي خيالي أنا أبغى واحد مساوي لمستوانا أو أرفع بس مو أقل )
أنا سمعت إنه لازم الوحده ماتحس بالخجل من أي صفة في زوجها .. وأنا بيني وبينكم ماأحس إن عائلته ترضي غروري ..

فبداية الخطبة انا استشرت أحد المشايخ كيف أحدد موقفي بعد الإستخاره .. وكيف أوفق بين الصفات اللي أبيها وبين حديث الرسول صلى الله عليه وسلم : " إذا أتاكم من ترضون دينه وخلقه .. " .
فقال لي : استخيري ووافقي واذا الأمر فيه خيرة الله راح ييسر لك أمورك أو العكس ..

***

الشهادة لله أنا ارتحت له جداً في الرؤية الشرعية .. بس ماادري وش فيني رجع لي شعور الخوف والتردد بعد ماأعلنا الخطوبة .. وصرت دايماً شاردة بأفكاري ماادري أنا اخترت القرار الصحيح وإلا لا ؟ !



وظليت مترددة لحد يوم الملكة كنت حابة إنهم يأجلونها بس الله ما أراد ..

أنا تملكت بدون أي ضغوط .. حتى أبوي استشارني يوم الملكة وقال هل أنتي مرتاحة وإلا لا .. أنا جلست حينها أسأل عن العريس وعن رأي أبوي فيه وهو مدح لي إياه وقال لي إنه رجل مهذب وداخل قلبه .. وبعدها قلت يالله يمكن بعد الملكة أرتاح !!

وإلى الساعه اللي كتبت فيها هالمشكلة أنا مترددة وحاسة إني موقادرة أختار أي الحلين يعتبر أفضل ..

المشكلة إني حاطه ببالي مميزات ثانية ..

صدقوني إلى الآن ماأخذت من المهر ولا ريال .. أبغى أحدد موقفي بالأول وش رايكم أبدأ بالتجهيز .. وإلا أرجع له أغراضه من أول الطريق ويدور له وحده تستاهله مو شايفه نفسها ..

أحياناً أقول يمكن الله يعاقبني ويجيني واحد فيه مميزات بس مايخاف الله فيني ..

وشيء ثاني أنا مرتاحة للشخص بس أحياناً أحس ارتياحي له .. رحمة ..

أبغى حل للمشكلة وش رايكم اخواني .. حددوا لي موقفي هل أنا غلطت من موافقتي عليه من الأساس .. وإلا كان معاي الحق ..

1- أنا حاسه إنه لو توفقنا ان شاء الله مع بعض راح أحبه .. بس الأساس !! هل يكون انبنى غلط ..

2- هل أكون ظلمته لو بطلت بهالوقت .. يعني حرام علي أكسر في خاطره ؟

3- هل انا مغرورة وأحب المظاهر مثل ماأختي دايماً تقول لي ؟



آسفة على الإطالة .. وأي سؤال او استفسار انا جاهزة .. ( على فكرة الزواج في العطلة الصيفية ) ..


تحياتي لكم ..