هنا انا تفائلت و دخلت المنتدى كتبت الأمور بإذن الله تسير الى خير ..

طبعاً متوقعة زوجي يرفض نقل الكفالة
الغريب انه وافق
لكن الموضوع اللي قضى علي و وترني و حرق دمي و امرضني

صحيت الاحد عادي ك أي يوم
ب اروح دوامي
نشيطة متفائلة مستهدية بالله

دخلت الواتس القى صاحب زوجي مرسل لي تسجيلات صوتية من زوجي
صدمتني
يقول فيها: انا موثق العقد ، و هي غلطانة انا بس بطاقتي الشخصية اللي في مصر مكتوب فيها اعزب
و مرسل لصديقه صور اوراق رسمية موثقة بس غريب شكلها

و صاحب زوجي مرسل لي :
ماشاء الله جالس يطمنك
الان كلميني عن النفقة و كم الرقم اللي ودك فيه
لان العقد انتهينا منه

انفعلت بكيييت انهرت كل انواع المشاعر المؤلمة مريت فيها
ارتفعت حرارتي
صرت انتفض
غبت عن دوامي
" في بالي بس شكله قبل عامين وهو يدخل علي و انا غشيمة على نياتي
يقول لي تدرين ان زواجنا بمصر غير موثق
وكل املاكي هناك
واذا مت انتي و البنات مالكم شي
و يضحك يقول صحيح امي ممكن تظلمك معنويا
لكن من ناحية الفلوس بتعتبر الفلوس مال ايتام و ماراح تاكله عليكم ان شاء الله"
هذا الحوار قتلني خلاني انفعل و أصرّ عليه يوثق الزواج
و عامين و انا بكل مرة يسافر يوعدني يرجع و معاه الزواج موثق
و يرجع ولا معه شي !!


هذا الحوار اللي مرّ بداخلي
قلته لصاحبه وانا في قمة انهياري و دموعي
كيف يسوي فيني كذا ؟
كيف يطلع الزواج موثق وهو معيشني سنتين انه غير موثق
انا اكثر من مرة احط عليه شروط و يكون اول بند فيها توثيق الزواج و يقول لي ان شاء الله و يصير خير
ليش يسوي فيني كذا و يحرق اعصابي و نفسيتي


انا ماعرف لحد هاللحظة هل الزواج موثق ولا لا
ولا عاد يهمني ، خلاص تأكدت ان هالشخص يتلاعب فيني و يتعمد يأذيني و يحرق دمي
كذلك تأكدت اني ماراح اطول منه شي سواء حي او ميت

على قد ما بكيت
على قد ماتعبت جسديا و نفسيا
على قد ماكنت محتاااجة هذا الكف الأخير او هذي القنبلة اللي تسحق كل ذرة تعلق باقية فيني
عشان اتمسك بقراري و امشي فيه مرتاحة البال

لأول مرة من بعد يوم الأحد و المعمعة اللي صارت فيه
صحيح غبت
صحيح رحت المستشفى
لكن نمت مرتاحة البال
جسمي تعبان
صوتي راح من كثر الدموع و القهر و الانفعال
لكن قلبي مثل الطير الحر الطليق
احس ب فرحة و هدوء
نمت متواصل بدون تقطيع بدون كوابيس
بدون الاحساس بالفجعة او الرعب اني مو في بيتي
الاحاسيس اللي كنت اشعر فيها قبل شهر
ماتت
الحمدلله كل هذا كان خيرة لي

رحت المستشفى الأحد الصباح

المغرب بنفس اليوم كنت انسق مع الشهود
كلمت خالي قلت له ابيك تشهد بالمحكمة انه أقر قدامك انه رمى علي كرسي من حديد و انا حامل
و سبني و تفل علي
قال ابشري

كلمت ولد خالة امي على استحياء شديد
يا فلان قبل عامين جيت انت و اختك و زوجها خذتوني من الشارع نص الليل
وهو طاردني و رامي اغراضي برا البيت انا وبنتي
ابيك تشهد بهالموقف اذا ممكن
قال ابشري

باقي اخوي اكلمه يشهد بموضوع الهلاوس العقلية
و ام صديقتي تشهد انها شافت على جسمي اثار ضرب في ثاني شهر من زواجي

جمعت شهودي
رتبت اوراقي لأول مرة
قلت ب اسعى لآخر لحظة و ابذل الأسباب اني احصل على الفسخ بدون عوض
و بشوف و بإذن الله لو حصل غير ما اتمنى
انا راضية بالمكتوب
المهم ان كان لي حق بآخذه و بسعى فيه و ب ابرز كل ادلتي و شهودي

..
مانسيت قبل انام ارسل لصاحبه :
اجتهدت تكلمني بالشرع في موضوع شروطي عشان تسقط الرضوة عني
و ما اشوفك كلمت صاحبك عن الشرع في مد اليد و الطرد و الله عز و جل يقول " لا تخرجوهن من بيوتهن ولا يخرجن الا ان يأتين بفاحشة مبينة " ولا شاف علي فاحشة عشان يطلعني
اعرف انك مُصلح و ادرك اني انا اللي ادخلتك لأن كان فيني بقية باقية من مشاعر
لكن اسمح لي "كان سابقا هالشخص " ممكن ارجع له .. كان عندي آخر بصيص امل
لكن الآن ما ارجع ابد
و ب استخير الله في اقفال موضوع الصلح نهائياً ..


أسهبت في الاحداث لأني احتاج افضفض
الكتابة تريحني كثير !

__________________

الحمدلله على قضاء يقربني من الله عز و جل.