السلام عليكم و رحمة الله و بركاته

لا توجد مستجدات ، غير الأفكار اللي تعصف فيني من داخل
أنا في مرحلة " اخواني اقرب الناس لي " يهاجموني .. بغرض انهم يصّحوني من كوم الأفكار الغريبة اللي تخليني أنهار بالدموع يوم بعد يوم ..

دخلت الموقع حتى ماقريت الردود من قبل ،، ولا ادري ايش كتبتوا لي

دخلت أبغى اتكلم عن العالم الداخلي اللي اعيشه
عالم أشوف فيه حياتي بلون واحد هو اللون الأسود

أحس ب فزع خوف هلع .. من ايش والله مدري
كل يوم انام فيه و أصحى افتح عيوني اشوف جدار غرفتي في بيت اهلي
احس ب خوووف و رعب : انا ايش جابني هنا !!
مو انا لي بيت !
مو لي مملكة كاملة

مو كنت مستقلة
حتى من قبل زواجي كنت بسكن الطالبات لي شقتي ٧ سنين بكالوريوس و ماجستير

الحين رجعت مع طفلين مالي سيطرة الا على غرفة وحدة
وحتى هالغرفة اكون فيها متوترة : اسكتوا جدو نايم
اسكتوا خالو نايم
وطّوا اصواتكم عيب خالو بيزعل و يتضايق

كل يوم تسيطر علي فكرة جديدة غريبة تخنقني
أعيش في حالة اسمها "إدمان الأمل" و لي من اسمي نصييييييب ..
كل يوم افتش على ابرة في كومة قش اللي صار لي
ابرة الأمل ..

كانت ابرة الأمل اليوم صاحب زوجي الطبيب اللي تدخل للإصلاح كذا مرة في مشاكلنا
و ارسل لي زوجي رقمه قبل شهر قال لي كلميه راح يفهمك موقفي لأنك مو راضية تسمعيني او تفهميني

لكني رفضت !
اليوم قلت خليني اكلمه
يمكن يقنعني ب زوجي ، يمكن يشوف فيه اشياء انا ماشفتها فيه
و كمان كنت اقول يمكن بعد يقضي على البقية الباقية من الأمل في الاصلاح فيني
ويقول لي كلام يقهرني كذب و بهتان و افتراء عني
فيزداد اصراري على الطلاق

راسلته و طلبت منه اني اتواصل معه
بعد الاستخارة
لكني ترددت .. بكييييت و حذفت رسايلي

في المعهد اداوم .. ألقى صعوبة في استجماع ذهني و تركيزي مع الطاقم التدريسي
أحاول اركز و اسرح كثييير في حياتي و اللي صار لي

يوم الجمعة اللي راحت لأول مرة بحياتي من طلعت من بيتي يجيني شعور
اني فقدت بيتي
بيتي اللي هو الجدران و الاثاث
اشتقت لهم
صارت اصغر التفاصيل و اتفهها تعورني تعورني حيييييل ..

احد يقول لي عادية هالمرحلة ..
احد يقول لي بكرة بتضحكين من هالمشاعر و تنسينها
احد يقول لي طبيعي تخبطك و توهانك

زواجي كان مثل الشركة بالنسبة لي
الشركة اللي بنيتها طوبة طوبة
احتسبتها لله
قريت كتب كثيييرة ، دخلت دورات كثيييرة اللي تأهلني اقوم هالشركة
فجأة اشوف هالشركة طاحت

زواجي كان مثل الاختبار اللي درست فيه كل الكتب
وذاكرت نماذج الأسئلة حق الاعوام اللي فاتت كلها
وبدال ما اخذ ٩ من ١٠ او ٩ ونص من عشرة
اخذت صفر مكعب
صفر كبييييير

اعرف انها اقدار و مكتوبة
لكني حزينة موجوعة أدنى التفاصيل تبكيني
كل شي يجرحني

ان دخلت مواقع التواصل وشفت مصريين ابكي
لهالدرجة وصلت ..
تجيني افكار انو احب هالشعب لسه ، ليش اخدت منه هالآدمي او طحت عليه
ليش ما اخذت واحد كويس
حتى زواجات الناس المختلفين عرقياً
لما تجي عيني عليهم
كنت اتمنى و أتأمل ب زواجي ينجح نجاح باهر زيهم و اتعايش مع ثقافة ثانية و بلد ثاني و نتواضع لبعض
و نكمل بعض و تكون لي اسرة ثانية في قارة ثانية
مو يفشل فشل ذريع ..

انا لازلت اتعلم دروس القيادة
و لازلت اداوم بالمعهد
ولازلت مستمرة مع حلقتي
ولازلت مداومة على وِردي من القران

غير كذا انا مدري انا وين ، و ايش قاعد يصير معاي
احس اني في دوامة و عالم غريب

اذا غمضت عيني ابي انام و ارتاح
حلمت فيه
والله اني اشوفه كل ما انام
كوابيس و احلام مفزعة مفجعة ما اذكر منها شي
لكن اصحى من نومي متكدرة تعبانة جسمي مكسر

ماني متخيلة ان هالانسان بيطلع من حياتي ويصير لاشيء
مع انه في نفس يوم مشكلتنا الاخيرة قال لي قبلها ب ساعات : ما استغنى عنك ولا اقدر اعيش بدونك

* هذا الرد و الردود ربما اللي بعدها
فقط فقط .. فضفضة و دموع مكبوتة !
صبّروني ان قدرتم

__________________

الحمدلله على قضاء يقربني من الله عز و جل.