أنا ما شفتها بعيني تفطر من يوم دخل رمضان ولكن إذا جا وقت الفطور ألاحظ اني افطر لوحدي! شكلها تاكل وتشرب من وراي ، وأصلا بعد كم يوم من دخول رمضان جتها الدورة الشهرية وصارت تاكل وتشرب عادي وتاكل غداء مع الأطفال ، ثم تدخل غرفة المكتبة وتقبع الزقارة

والله ما كانت مضغوطة ولاشي بالعكس بيئتهم ماشاءالله متوازنة ومحترمة ، والدها ملتزم وكان إمام مسجد لكنه مرن ومرح وفلاوي ووالدتها موظفة مرموقة وعاقلة ومتزنة ، وحتى حياتي معها ما كنت معقد الامور وعندي مرونة كبيرة وكنا متفاهمين ومنسجمين الحمدلله.

أكيد بطول بالي لأني محسن الظن بالله ومتفاءل ان الامور تتحسن على الأقل الأساسيات والأصول من أفكار ومعتقدات اما الأمور التابعة ممكن اقدم تنازلات فيها يعني مثلا لو رجعت تصلي وتركت الدخان وتركت المجاهرة والتباهي بالأخطاء ممكن اسكت عن كشف الوجه إذا لفت الطرحة بطريقة ساترة ولا حطت مكياج في هالحالة لو قالت فيه قول فقهي وكذا ممكن نتناقش (وأصلا انا مقتنع بالقول بوجوب تغطية الوجه للمرأة لكن بعطيكم مثال لأي حد انا مرن وابي اكسبها) لكن الوضع الحالي انها متخذة الحرية شماعة انها تسوي كل الي تبي ولا تعترف بأي قيود او قوانين بما في ذلك شرع الله

أنا ما استحي اني اقول اني احبها وميت عليها وممكن نظرة منها او ابتسامة تخرفني يعني من جد اقدر اسميها توأم روحي ووجودها في حياتي عوضني عن الجفاف الي كان في حياتي الزوجية الاولى ولا اطيق زعلها او اني اشوفها متضايقة وبيننا رصيد ثري من ذكريات ومغامرات ورحلات وسفرات عشان كذا مابي افرط فيها حتى آخر محاولة وآخر لحظة والله يكتب الخيرة ولا زلت مستغرب وش هالفكر الي لعب في عقلها وتخلت عن كل الي بيننا عشان ترضي رغبتها في الحرية وحب الذات والأنانية

نعم هي رغم انها في منتصف الثلاثينات إلا أنها تتأثر وعندها فضول معرفي وتقرأ كثير سواء كتب أو في وسائل التواصل الي اشوف انها أكبر مؤثر عليها من حسابات الطاقة والماكروبايوتيك ومرات أفكار صوفية ومرات بوذية يعني تخبط عنيف نتيجته الابتعاد عن كل شيء

فعلا أحيانا كأنها تتعمد تستفزني عشان اطلقها وأحيانا أحسها تتصرف ببلاهة ولا تقدر العواقب لكن العهد الذي قطعته على نفسي اني اسيطر على مشاعري مهما استفزتني ولا اطلقها من نفسي ، مع الاستمرار في محاولات التقارب والنصح والتوجيه واذا طفشت مني تروح تطلب خلع الله لا يهينها ، على الأقل اخذ المهر مع اني ما ادري من وين بتجيب الفلوس وهي راتبها اقل من اربعة الاف ومقاطعة اهلها !! لكن الله يكتب الخيرة من عنده ويثبت علينا العقل والدين ويرزقنا من واسع فضله

__________________