رجعت للموضوع للرد على كذا نقطة انذكروا
لبناء حياة زوجية سليمة ما بتختلف ان كانت بمجتمع مختلط او العكس
لأنو معرفة الشريك قبل الزواج حق لكل شخص مش حلم تحقيقه أمنية
مش مهم ئديش طالت المدة اللي بيتعرف فيها الشخص على الشريك بقدر أهمية صدق كل شخص ويكون على طبيعته ويقول مبادؤه وخططه وطموحاته واهدافه ويناقشها ويشاركها مع الطرف التاني ويكون عارف شو بده من الاساس بالاضافة الى الانجذاب للشخص التاني

ويشوفوا وين بيلتقوا ووين بيختلفوا مع الاخذ بعين الاعتبار انو ما رح تخلى الحياة الزوجية من بعض المشاكل واختلاف وجهات النظر باعتبار انو لكل شخص طبع وشخصية خاصة فيه


وبكل مجمتع في نماذج بتختار صح وفي نماذج بتنجذب لشي وقتي ومع الوقت بيروح وبتبدأ تظهر الفروقات بالشخصيات وبالتفكير وبالمبادئ ويا بيكملوا وكأنهم بحرب يا بينفصلوا وبيخلفوا ضحايا وراهم
وفي فئة بتنظر للزواج مشروع مادي مش اسري
الايد الوحدة ما بتصفق
وكمان عنا في شباب ما بيتزوجوا بنات اتعرفوا عليهن بس بطريقة تانية يعني قبلت تخرج معو من دون علم اهلها وكانت كتير سهلة وبتفتح مجال فوق الطبيعي فأكيد رح يضحك عليها وهيي بنفس الوقت بتصدقه واثنيناتهن غلط والسبب انفسهم وطريقهم الخطأ

صحيح عنا البنت بتتعرف عالشاب او العكس ان كان بالجامعة او بالعمل او بأي مكان التقوا صدفة بس الاصول المفروض تخبر اهلها ويكون عندهم علم بالموضوع وبعدها بيتعرفوا على بعض بيزورها ببيت اهلها لمدة تجهيز نفسه سواء اشهر او سنوات
وبنفس الوقت عنا فئة ما بيحبوا الاختلاط وبيتجنبوه على قدر المستطاع والنساء لحال والرجال لحال
وفي اللي عايش متل اوروبا ما فارقة معو لا دين ولا تقاليد ولا عادات شرقية ولا غيرها

فبكل مجتمع في زواجات ناجحة وفي زواجات فاشلة ونسب طلاق صادمة
والسبب لسوء الاختيار وعدم المصداقية والغش اثناء التعارف

بالنسبة للأمثلة عن العجائز في بلاد الغرب قسما بالله وعلى ما اقول شهيد جدتي وجدي فوق الثمانينات لهلئ بيتصوروا وحاضنين بعض وبينزلوا عالنهر وبيقعدوا بالماي مع بعض ومتعلقين ببعض وكأنهم عرسان جداد وبيفهموا على بعض وكانهم عقل واحد
وبعتقد في نماذج بكل بلد بس مش ظاهرين عالعلن للناس تعرف عنهم
حتى جدو لبابا الله يرحمه ما رضي يتزوج بعد وفاة جدتو لبابا رحمة الله عليها وعاش على ذكراها
بتذكر كيف كان يحكينا عنها قصص وحكايات من بداية تعارفهن لكفاحهم في الحياة الزوجية وبشو مروا بالايام الحلوة والمرة وهلئ عم افهم اكتر كيف كانوا عم يبنوا سوا ويتشاركوا كل شي سوا
وكمان في بالمقابل شريحة مافي اي قيمة وتقدير للزوجة او للزوج ولا للاسرة ولا في اي تقارب بيناتهن وزواجاتهم كوارث


وبعتقد بكل مجتمع في من كل الاصناف سواء كان ببلد فيه اختلاط او العكس وهالشي لمسته من تعارفي على اناس بالواقع واحتكاكي معهن
وعلى سبيل المثال بعرف شخصين من بلد محافظ جدا اتزوجوا من ضيعتي من 15 سنة وواحد منهم زارني بسويسرا وكمان كان عمي بيشتغل بنفس البلد وكان عندو اصدقاء يجوا يزوروه عند بيت جدي وكانوا اناس راقيين محترمين خلوقين وعندهن وعي وثقافة وانفتاح على غيرهم بعكس ما الاعلام اعطى صورة بتظلم شريحة كبيرة من الناس
وكمان هون بالمنتدى شفت ا نواع من الشخصيات والعقول الموجودة بكل مجتمع وحتى في شخصيات لاعضاء وعضوات بحب اسمعلها وبيعجبني طريقة فكرها وثقافتها ووعيها ومنطقها وبتسفيد منهم وكنت حابي اذكر اسماء بس بخاف اسهى عن اسم وكون ظلمته بهالشي
وبنفس الوقت في شريحة تانية سمعت عنها من خلال طرح المواضيع بالمنتدى
بزواج بدون شوفة شرعية يتم عن طريق الاهل من دون اي تعارف وهو وحظه وهي وحظها بحسها صعبة عالطرفين لانو حياة عشرة عمر ومن هالحياة رح ينشئ جيل وزواجهم ظلم لكل الاطراف

وقت ننظر صح لمفهوم الزواج بنبني صح


احترامي

__________________





اللهم إني أستودعك ديني و نفسي وأهلي وزوجي
وأولادي وأحبتي فاحفظهم يا من لا تضيع ودائعه