حبيبتي
باختصار
ترى زواج الزوج على زوجته ليس ضروري أن يكون مصيبه ونهاية العالم
اذا كان قايم بالواجب وعادل ويحبج ويراعيج

تدرين
الحمدلله على كل حال
في حالتي
اقول لو زوجي متزوج علي الثانيه
ويعاشرني بالمعروف ويعطيني حقوقي ويعطيني الحق في انجاب المزيد من الابناء ونعيش حياة زوجية طبيعيه
راضيه بزواجه

لكن انا زوجته الاولى والوحيده
لكن هاجرني من شهور
وما اشوفه الا قليل اغلب يومه خارج المنزل
وحالياً لا يريد ان انجب له المزيد من الاطفال
للعلم عندي بنت وحده بس الله يحفظها
بسبب وجود مشاكل و خيانه


ف انتي اختي احمدي ربج
صدقيني زواج الزوج ليس مصيبه
بقدر ماتكونين زوجة وحيده لرجل ظالمج وحارمج حقوقج

بخصوص الاطباع الصعبه والمشاكل
ترى مافي بيت وحياة زوجية تخلى من النقاشات والمشاكل
واختلاف الاطباع التفكير بين الذكر والانثى وارد في كثير من البيوت
البيوت اسرار ومافي بيت يخلى من المشاكل


انا اظن سبب مشاكلج كلها
والله اعلم
انج تغيرتي على زوجج بعد ماتزوج عليج
وهو متضايق لتغيرج معاه عشان جي يحسابج ويفتعل المشاكل

تبين ترتاحين
خلاص ياختي انسي انه متزوج
عيشي حياتج وياه بقلب صافي
ياما انجرحنا جروح عميقه
لكن خلاص الواحد ينسى ويعيش حياته
عيشي حياتج بسلام بدون نقاش ومشاكل عشان عيالج

اسلوبج وجدالج مع ريلج هو اللي يخليه يعصب

كيف كانت حياتكم قبل لا يتزوج ؟؟
ارجعي نفس قبل
بأسلوبج وتعاملج وياه وشخصيتج

انسي انه متزوج
واطلبي منه احتراماً لمشاعرج نهائياً ما اييب طاريها
واذا في زيارات وغيره وهي مب موجوده
روحي و وجبي
عشان يستانس ريلج ولا يقارن بينج وبينها


اختي انتي بايدج تصلحين العلاقه مابينكم
ارجعي نفس قبل حاولي
الجروح تطيب مع الايام
واذا مب عشان ريلج
عشان عيالج اصبري وتجاوزي عن الاخطاء
راحتج النفسيه يأثر على عيالج واستقرارهم بشكل ايجابي


انسي الطلاق لانه مشكلتكم ماتستاهل الطلاق
متأكده من اللي تكتبينه انه ريلج يحبج وشاريج

اما انه تزوج عليج
صح هالشي يجرح القلب
لكن عشان ترتاحين لا تدققين وانسي
لاتوقفين حياتج كلها على موضوع زوجته الثانيه
وهو مب اول ولا اخر واحد بالدنيا سواها وتزوج على زوجته بدون سبب