أختي الفاضله أمك تعرف ايش هي وأي وحل قاعده فيه فتسقط سوء أخلاقها عليك
أختي أنت شريفه وطاهره والحمد لله أنك ما صرتي زيها وحافظتي على نفسك لحد هالوقت
هي تشوف نفسها مستهينه بشرفها فتطلع عليك أنك فقدتي عذريتك قدام الناس لأنها
مو واثقه فيك وتحسبك زيها للأسف
فحطت انك من عمليه فقدتيها لأن لو تزوجتي وما طلعتي بكر تردها للعمليه مو لأنك زنيتي أظن هذا تفكيرها والله أعلم

أما سوء تعاملها معك فما تقدرين تغيرين فيه شي وأنصحك لو فيه مجال تطلعين من بيتكم أطلعي
لبيت جدتك لأمك أو جدتك لأبوك وجودك في بيت أهلك ممكن يقودك للجنون

كم عمرك أختي؟ وإذا كنتي تدرسين
أنصحك تشدين حيلك في دراستك وتتخرجين بأعلى المراتب وتتوظفين بمكان مرموق
حلك أن تنتشلين نفسك من بيتكم وهذا تحققينه بالتفوق
لا تنتظرن أحد ينقذك أنتِ كبرتي ومر عليك الأعظم الحين ما راح يجيك أسوء من اللي مريتي فيه صدقيني
فلا تعيشين بالماضي ولا بعالم الخيالات والانتقامات لأنه ما بيحل لك شي ويمكن يزيد نفسيتك سوء ويمرضك
ومتى ما مرت عليك ذكرى سيئة تعوذي من ابليس وقولي حسبي الله ونعم الوكيل
وهي خليها على ربك وثقي فيه، كل شي سوته فيك مكتوب عنده وما راح يضيع شي وبيعاقبها عقاب عسير
وبيكون أقوى من كل خيالاتك فيها وبتبرد كبدك وما أستبعد تقولين خلاص سامحتها لأن معدنك طيب وما عمرك آذيتي أحد