ياجماعة الخير ،، فيه شي هام وضروري جدا ، ابغى اقوله ، تدرون ليش هذا الزعل بالنسبه والثوره اللي بقلبي لها ، هي قالتها لي قبل شهر وهي تبكي وانا جالس اراضي فيها لما عزمتها عالعشاء ، وقالت وهي تبكي تمنيت لو اعطيتني طلقه ، يمكن هذا الشي ينكسر بقلبي ، تقصد الزعل اللي انا سببته لها ، قلت يابنت الناس انا ابغاك تهدأين فانتي ام عيالي وانا شاريك ،
وقبل اسبوعين لما راحت اختي تتوسط بالموضوع جالسه تبكي وتذكر لها السلبيات ، وقالت خلاص خليه يطلقني او بروح المحكمه ، وانا سالت المحامي ايش قالت لك بالضبط ، قال المحامي ان زوجتك ذكرت السلبيات فيك ، وهي نفس السلبيات اللي ذكرتها لكم بالمنتدى ، والمحامي سالها عن صلاتي واموري الدينيه قالت كل شي ممتاز ، ولكن جرحني بالكلام وقالي كذا وكذا يعني كلها سلبيات ، قال ياحضرة المحامي ، اخرج عن الموضوع لو سمحت ، وانا ياجماعة الخير شريت نفسي ودخلت عالقاضي ، فوالذي نفسي بيده ياهذا المحامي ماشافته عيوني ، فلاتلوموني وتدرون ليش انا اعطيتها طلقه ، قبل البارح اتصل بي المحامي ، وقال يااخي زوجتك جات المحكمه واتفقت معي انها تريد الطلاق منك ، والمحامي قال من واجبي وبكل امانه ان مثل هالقضايا بخصوص الطلاق انا مااحب اتسرع بها وحبيت اعطيك خبر لانك موظف حكومي ومن الصعب يجيك خطاب بالعمل استدعاء من المحكمه ، قلت ياحضرة المحامي اذا سمحت ابعد عن الموضوع وانا اتصرف ، وطلب مني ان احضر شاهدين والموعد بالمحكمه ، وامس انا اخذتها من راسي ودخلت عالقاضي واعطيتها طلقه واحده ، واعطيت صورة الصك للسائق حق اهلها وقلت اعط هذا الظرف لزوجتي ، واتصلت بابوها واخبرته بذلك عشان مااجي من ورى ظهره فضروري اعطيه علم ، واعطيت خبر لاخوها الكبير ، وراسلت زوجتي برساله نصيه وقلت لها ،،
((( خلي المحامي حقك ينفعك،وهو اتصل بي وقلت له ابعد عن الموضوع،ودخلت عالقاضي بنفسي اليوم وطلقتك،ووالله والذي يحفظلي ابني وأخواته ياهذا المحامي ماشافته عيوني،انا اللي اخذتها من راسي،فلايضحك عليك بالاتعاب
وتطمني ، معاد بزعجك ، ورب القرآن الآن بحذف ارقامك
والله يسامح الجميع )))


وبالفعل انا حذفت رقمها وخليني اعيش حياتي حاليا ، وهذا هو سبب طلاقي لها


فهل تلوموني ليش انا زعلان ، انا مستحيل ارضى لنفسي ان تشتكيني للمحكمه وتطلب الخلع او الطلاق ، اشتريت راسي واعطيتها طلقه ،، وانا معاكم بالاستشارات اللي تشوفوها ، فلاتلوموني ليش انا زعلان ، ارجو ان تقدرو ذلك