المشاركة الأصلية كتبت بواسطة mimomea

حبيبتي تركتك لله ما دام رح تنشغلي بوظيفتك اعتبري الفترة الزمنية اللي بالعمل انك عزباء وحرة ولا مسؤولة عن بيت ولا أولاد
وبالجيم كمان نفسيتك بترتاح وكل طاقتك السلبية طلعيها أثناء التدريب
و السواق متوفر والحمدلله واذا العاملة المنزلية بتكون متوفرة يعني تقريبا 70 % من ضغوطات حياتك بتزول بإذن الله وما شاءالله
فهون بترجعي عالبيت واقل شي بتكوني لقيتي نفسك بشغلك
وحطي براسك انو احتمال وقت الغضب يرجع لسانه متل قبل
وهالشي لازم تتغاضي عنه لانه البعض غير زوجك وقت الغضب بيتلفظوا الفاظ ما بيعنوها بس ليستفزوا الطرف الثاني لانهم بيكونوا مقهورين من تصرفاته او بسبب الغيرة او لأسباب تانية
وأنا وزوجي بيسمونا روميو وجوليت بس تعي اسمعينا وقت نكون بحالة الغضب او بالاخص انا بتقولي اعداء
وزوجي بيتحملني كتير وبيعرف اني بس روق وحدة تانية ودايما بقلي قلبك طيب اللي بتحكيه مش طالع من قلبك
واي مشكل مهما كان حجمه كبير بعد ربع ساعة او بالكتير 5 ساعات بس واحد مننا يحكي مع التاني او يطلع فيه نظرة بننسى اللي صار وما كأنه صار شي
يعني ممكن من بعد مشكل كبير بعد ساعة نضهر ونكمش ايدين بعض ونمزح ونضحك
وبعدين ممكن نقعد جلسة مصارحة ونحكي ومرات كتير ما بنحكي لانو اتعودنا على اطباع بعض
هالشي ما بيخلي فيه جفا بين الشريكين
وأهم شي من تجربة من بعد أي خلاف بس الطرف التاني يحكي معنا عادي نرجع لطبيعتنا وكأنه ما صار شي
الا للشي الكتير مهم بناخد موقف
يعني لو رجل بيحكي لزوجته اللي انا بحكيه لزوجي كانوا قالوا ما بينعاش معه
كرمال هيك وقت نقتنع بشخصية الشريك ونحاول نغير من بعض تصرفاته لازم نطلع درجة درجة
وعالبطيء يصير التغيير كرمال ما يرجع فجأة متل ما كان

فكرمال هيك ما تخنقي حالك بتغييره بل اعرفي نقطة ضعفه واستغليها
وهالشي بينفعكن اثنيناتكن
وانشغلي بنفسك وبأولادك وأعطيه جوه وامدحيه وقربي منو
ووقت تلاقيه بعد اعطيه مساحة وخدي مساحتك
وان شاءالله بيتغير ولو 30 بالمية هالشي منيح حاليا
لانو مرات الواحد بيكون عنده افكار ومقتنع فيها بدو وقت ليغيرها ويقتنع بغيرها
انت إرخي وهو يرخي بيمشي الحال

وان شاءالله بإذن الله تتغير حياتكن للأفضل ويعيشوا أولادكن بيناتكن

دعواتي ترافقك ⚘⚘⚘⚘⚘⚘⚘⚘