عرين ذكرتك وفتحت الجوال اكتب يارب تقرين كلامي زين

كثييير بنات قبل الزواج يكرهون الجنس ولا يتخيلونه ولا يستسيغون فكرته خاصه الصغار وهم كاتحرش بهم أحد ولا شي
يعني المرأة ماتظهر عندها هالحاجة إلا متأخر نسبيا

وكثير كثير من البنات يعانون في بداية حياتهم من هذا الأمر ورغم تحفظ الناس على هذا الكلام لكن أعرف كم حالة من اللي حولي

يعني لا تربطين كره هذا الأمر بالتحرش أنت طبيعية وعندك خلفية صغيرة سيئة ماكان لك ذنب فيها ستختفي مستقبلا بإذن الله
حاولي تخطي هذا الموضوع بطريقتك ولا تكبرينها براسك

الشيء الأهم عزيزتي توكلي على الله حق توكله
التوكل يعني تسليم الأمر لله والدعاء

أنت بنظرتك القاصرة عندك ولد خالتك اللي يمكن تاخذبنه بالإجبار وعندك المعدد اللي رفضتيه بحمد الله
متعبه حالك وتفكرين وحاسه مصيرك بإيدك بسرعه لازم أختار وأنقذ نفسي من الحالة أ إلى الحالة ب
لكن تعرفين ربك وش عنده؟
عنده خير السماوات والأرض
ومعجزات السماوات والأرض
والخيارات عند ربي مفتووووحة

ارفعي يديك وقولي يارب أسألك عيش السعداء
يارب اجعل قادم أيامي خير من ماضيها
اللهم إني أعوذ بك من الشقاء في الدنيا والآخرة
ربي دبرني فإني لا أحسن التدبير

والله تتفاجئين من تدبير رب العالمين وتضحكين على الأزمة والخيارات الضيقة اللي حطيتي نفسك فيها

رب يقدر يخلي تحاليلكم ماتتطابق
يقدر يكتب مشكله تصير بينه وبين إخوانك تفرق هالبيتين
يقدر يسخر لك قلوب أهلك ويتفهمون قرارك أو أو أو


ذكرتيني بوحده كانت تقول عندي فوبيا من الولادة لدرجه كم مره ارفع يديني ابي ادعي اني اكون عقيم ثم استغفر وأنزلها
تزوجت وحملت وكانت تدعي بالتساهيل وتتماسك بالقوة وسبحان الله كتب لها الله ولاده سههههههله بالبيت تقول ماحسيت ان هالألم ألم ولاده فجأة البيبي طلع
تخيلي تقول ربي كان بيعلمني يوم سلمت له الأمر إنه يقدر يجعل أصعب الأمور مثل شربة الماء والفوبيا اللي معاي من كان عمري 15 صارت ذكرى مضحكة

ياعرين تحسبين إنك حاله فريده والبنات كلهم يدخلون الزواج وهم مستعدين نفسيا وبدنيا ومتشفقين؟
كم بنت كانت بحاله خوف انها فاقده البكاره بسبب نفسها أو بسبب تحرش خارجي؟
وكم بنت عندها تشوه بجزء من جسمها مقلقها؟
وكم بنت عندها مشكلة شكلية أو نفسيه؟ كان المفروض يحكمون على حياتهم بالنهايه؟ وإلا يعيشون على أقل مقومات السعادة عشان يعوضون الشريك عن هالنقص؟
مافيه بنت ولا ولد يدخل القفص وهو كامل
كلهم فيهم مشاكل ونقاط ضعف وأمراض وتشوهات وعاهات ونجحوا ونالوا السعادة اللي يتمنونها

تمني لنفسك السعادة وادعي
انت تستحقين وانت اطهر وانظف من مليون بنت بالشوارع وبالنهايه يتزوجون ويخلفون

الزواج مو مكافئة للمثاليين الزواج فطرة و حق للجميع
والسعادة رزق من الله يعطيه من يشاء
المفتاح اللي بيدك الدعاء وتوكيل أمرك وصدقيني يوما ما بتضحكين على تحميل نفسك كل هالهم والألم

الله يسعدك ويزوجك الشاب اللي يطير فيك ويتحملك بنواقصك وتتحملينه بنواقصه
وتخلفون وتربّون بجو أسري كله ألفه ومحبة ياعرين
قلبي معك من أول مره قريت كلامك لأن الموضوع صغير بس أنت مكبرته مررررره ولا ألومك لو تزوجتي بتفهمين كلامي