السلام عليكم

شوفي حبيبتي .. والله لو خياناته جسديه أو يضربك كان قلت لك تطلقي من الحين وانتهى ..
لكن دام الشغله مكالمات الوضع أهون شوي

شوفي يا قمر أغلب المتزوجات وفي كافة الأعمار سواء صغيرة والا كبيرة تعاني مما تعاني منه
هل كلهم طلبوا الطلاق ؟؟ لا طبعاً
لو كل وحده طلبت الطلاق كان صارت كارثة في المجتمع
لكنهم صابرين ..
أعرف لك ناس متدينين الله يستر عليهم وربي أكرمهم بنعم الزوجات ومع ذلك يعملون مثل ماعمل زوجك

صحيح الواحد يستغرب من دينهم وإلتزامهم قدام الناس وهذي سواياهم في الخفاء .. لكن مثل ماذكرت لك الأخت اللي قبلي إن هذا داء العصر ..

بخصوص الأفلام الاباحيه صحيح انتي تحسي بإشمئزاز لما تشوفيه مدمن عليها لكن ناصحيه وذكريه بعقوبة النظر للحرام .. كل ليله تكلمي معاه بهدوء وباسلوب حلو وان شاءالله يهتدي على يدك
مو بس زوجك يطالع للافلام .. أغلب البشر يتابعون هالشغلات المحرمه والمشكله لما تلاقي اغلبهم في سن الاربعين والخمسين .. الحمدلله الذي عافانا مما ابتلاهم .. التقنيه سهلت كل شي .. الحين للأسف الافلام في متناول الكل .. والأجهزة الذكية ماقصرت في تسهيل الحرام .. وزوجك مثلهم ربي ابتلاه بذا الشي .. من واجبك تناصحيه بقد ماتقدري ولك الأجر ان شاءالله اذا اهتدى ..

الحياة الزوجية يبغالها صبر .. تضحيه ..
والله ياما صبرنا وتحملنا لغاية ما وصلنا للفراق بس بعد ما استنفذنا كل السبل
أنا في خلال مشاركاتي السابقه في مواضيع متعدده كتبت وش صار معاي وكيف تحملت وصبرت .. مع اني مستغنيه استغناء تام عن ذاك الانسان

الحمدلله مرتاحه مادياً ولا احتاج شي منه
فقط احتاج دينه وصلاحه وانه يكون سند وعون لي في الحياة ونبني أحسن أسرة ..

ومع ذلك صبرت وتحملت عيوبه لغاية ما طلق من نفسه ..

وعلى فكره كل اللي ذكرتيه في معاناتك انا شفته في حياتي معاه .. لكني حاولت أعالج الوضع باللي اقدر عليه

الفرق بيني وبينك انتي معاك ضنا وانا لا
صدقيني لو معاي منه عيال كان ممكن عالجت الوضع بشكل اخر

طيب خلينا نتخيل انك طلبتي الطلاق وتطلقني لا سمح الله!!
هل بترتاحين؟؟

اقسم بالله ماراح ترتاحين نفسياً .. وراح تراجعي نفسك مليون مره وتندمي أشد الندم

انتي مو موظفه .. معاك عيال .. وواضح انك تغارين بقوووه
طيب تطلقتي وبما ان عندك عيال يمكن تتزوجي معدد
هل بترتاحي وقتها ؟؟ طبيعي ماراح ترتاحي من الغيره
طيب وولدك او بنتك وين يروحون اذا شفتي حياتك وتزوجتي ؟؟

طالعي قسم المطلقين والمطلقات والمعاناه في الزواج الثاني وخصوصاً لما يكون عندهم اطفال

ياحبيبتي الدنيا ذي ما صفيت لأحد ومافيه شي كامل سبحان الله .. ماقدامنا غير الصبر على اللي في يدينا والدعاء ثم الدعاء بالصلاح والهدايه ..

__________________

(( لا شيء يجعلنا عظماء سوى ألم عظيم ))