السلام عليكم ورحمة الله وبركاته
ما أحب أزيد عليك وأول مره أشارك بردود لأني أشوف إني ماني في موضع شخص عنده القدره يحل مشاكل الآخرين لكن لعلها مشاركة بسيطة إن أفادت الحمدلله وإن أخطت فأعتذر

قريت موضوعك كله.. أنتي نفس نوعية زوجتي.. يا أختي الأمر هيّن ولا يحتاج طلاق.. ما يحتاج أصلاً تفكير في هذا الأمر.. زوجك ولله الحمد إنسان يخاف الله وأنتي أقرب من تعرفينه.. مثال خير وخير مثال.. يمكن ما عنده وقت في السنة كلها إلا هالوقت يطلع فيه.. وطالع لويش! طالع لدعوة! جزاه الله كل خير..

الأمر بسيط ورب البيت.. ولا يحتاج زعلك أصلا.. الدنيا بنعيشها مره وحده ليش نزعل!
كلها كم يوم ويجيك إن شاء الله.. وكلامك انك بتجلسين عند اهلك وبتودين الاطفال عنده ومراسلته هذي كلها مالها سنع! بدل ما تكونين له سند وعضيد تعيقينه! ان شاء الله الولاده الجايه يكون معك! وبعدين بيني وبينك! هالأمور البنات يشوفونها أمور صعبه! شيبانا أول ما عندهم هالأمور! تروح المره تولد وتجي تشل ورعها في يدها ما فيها إلا العافية.. أنا ما أقصد كوني مثلهم! لكن لو رجلك موجود وش بيسوي! بيدخل معك! بيمسك يدك! يكون موجود؟ كلها أمور لو نظرتي لها ترا عاديه! وجوده وعدمه ما راح يسهل عليك الألم ولا شيء..

بالنسبة إنك ما تردين على أبوك معليش هذي قلة أدب وسامحيني على المصطلح.. وعصيان لله سبحانه وتعالى.. فوق إنك زعلانه من دون سبب مقنع(يمكن تشوفين سببك مقنع بس فعلياً هو ما ضربك ولا تلفظ عليك اقصد كذا ممكن تكون الاسباب) على زوجك تجين الحين وتسوين كذا في أبوك!

بالنسبة محد جاكم! المشكى على الله! وين إخوانك؟ وين عمانك؟ خوالك؟ زوجك الآن خارج البلاد! بغض النظر عن السبب لكن وين أهلك يجون ياخذونك! لا تلومين زوجك على الشيء هذا ماله دخل.. لا تقولين لو هنا كان وكان! الآن أنتهى الأمر..

هذا ليس المقصود بالآيه.. وهذا ليس تشدد في الدين.. وليس تدمير حياه..

بعض الإخوان اللي يقولون.. مهو ضرورة زوجك يروح.. ومدري كيف! يا إخوان اتقوا الله.. بدل ما تلطفون الجو.. لا تزيدون الفجوة.. وتحسنون الوضع لا تخلونه تكون فعلا مشكلة.. الأمر بسيط.. والزعل بيروح.. وترجع القلوب أقوى مما كانت..

وأنتي يا اختي رساله اخيره لك.. رضى الله من رضى والديك وزوجك.. والدنيا سهالات.. ومالك الا هو وماله الا انتي.. وعيالكم.. سوي لك مشروع .. خليه يساعدك واستقلي فيه.. يعني شوفي شيء يشغلك في وقت فراغك..والله يسهل امرنا وامرك..