اختي سمورة
بصراحة استفزني الموضوع جداً..
لازم تعرفي انو الموضوع يحتاج قوة أعصاب وحزم مع الكل..

قسمي المواجهة لمراحل..
أولاً: طالبي بحقك كامل مكمل وحتى نصيبك في البيت لا تتنازلي عنه اذا ما باعو البيت، حتى تكون لكي حجة انك تجلسي فيه اذا ما زانت الأمور مع زوجك.
ثانياً: حطي خطة وأعلنيها للكل كيف بتتصرفي في الفلوس، اما مشروع خاص أو عقار اذا كانت الفلوس تكفي وهو الأفضل، يعني قوليلهم بشتري عقار وبسجله بإسمي وزوجك إذا مو حاب يسكن فيه براحته خليكي ساكنة عنده لأنه هذي مسئوليته.
ثالثاً: بالنسبة لمشاريع أخوانك بعد تقسيم التركة، وبعد شراء العقار اذا بقي شي ممكن تدخلي معاهم في مشروعهم ولكن بشرط أن تكون شركة رسمية وأن تكتب حصتك بإسمك.
رابعاً: استعيني بعمك في موضوع اخذك لحقك وفي موضوع شراء العقار حتى لا يضحك عليكي أحد.
خامساً: زوجك فهميه أنه ممكن يستفيد من عوائد العقار ولكن مستحيل ينكتب بإسمه لو صار عشر نسخ وخليكي ثابتة في موقفك.
سادساً: تحصيل عوائد العقار لازم ما تكون بيد أي واحد من أخوانك أو زوجك، ممكن تكون بيد عمك لو واثقة فيه، أو تستعيني بشركة إدارة أملاك يأجروه لكي ويودعو المبلغ بحسابك.
خامساً: صدقيني لو تنازلتي عن حقك لأخوانك أو زوجك راح تندمين ندم شديد، لأنو بانت نواياهم من الحين ولا تمشي ورا سراب ترى الكتاب باين من عنوانه.
سابعاً: لا تطلبي الطلاق، وإذا كان زوجك طمعان ومافيه خير راح يطلق من نفسه اذا شافك مصرة على موقفك، واذا تراجع خلي موقفك قوي وثابت.
أخيراً: اذا اخوانك وزوجك ما استحو انهم يتخذو موقف قوي وثابت في انهم ياخذو حقك أو يتحكمو فيه كيف بالله تستحي انتي او تضعفي في اخذ حقك؟

تحياتي لك وربي يوفقك.