الله يرحمك يا بابا ... تركتنا بدنيا عندهم مجاعه وطمع وجشع ..

.. اول يوم عيد مَر بسلام وعيدنا وزوجي كان راضي كل الرضى عني ... وعيدنا مع اهله الين الساعه 9 المسا ... وكنا مجهزين اغراضنا فاقترح نسافر عشان صباح ثاني العيد نعيد عند اهلي ... وصلنا لمدينتا .. وكان طول الطريق رايق وكلام معسول وان مستحيل يعيش من غيري وووو ...
ورحت بيت اهلي من 6 الصباح لاني اشتقت لهم ..اكثر من شهر ماشفتهم ... اشتقت لامي ولاخواني وللبيت ... قضينا ثاني العيد بفرحه مع ان كان ناقصنا وجود عامود البيت ... الحمد لله على كل حال ... وطلبت من زوجي اني ابيت عندهم هالليله ... وافق وقال مع اني مابقدر انام من غيرك !..بادلته الكلام .. قال بجيك بكره العصر... جلسنا انا واختي واخواني وسهرنا سوالف وضحك ... مع اني كنت تعبانه بس من شوقي لهم جلست معهم ... اصغر اخواني فتح موضوع الورث وانه بحاجه لها .. انا واختي كنا ساكتين بس نسمعهم ... كان باقي شوي ويقوموا يتذابحو ! طيب وين المحبه والضحك اللي كان قبل شوي ؟؟ مع ان الورث مره كبير معقوله كل واحد حاط عينه على فلوس الثاني ... هدينا الوضع وذكرناهم ان احنا اخوان والفلوس ماتفرق بينا ...نط واحد من اخواني قال لنا انا واختي انتوا الورث حقكم بيكون بيدينا عشان نخبيها لكم ونشغلها وننفعكم فيها ... اختي ساكته وكنت منتظره تتكلم عشانها الكبيره ولا تكلمت ...اضطريت اتكلم وقلت لهم طيب كل واحد ياخذ نصيبه ويتصرف فيه باللي يبغاه ... يستثمره يسوي مشروع يصرفه براحته ... أخوي الكبير قال لا احنا بنحافظ على فلوسكم لانكم حريم بكره ازواجكم يخدعونكم وياكلونها عليكم وقال لي خاصة انتي بعدك صغيره وماتفهمين اللي لك واللي عليك ... قلت وش اللي ياكلونه علينا احنا كبرنا وانا تعديت العشرين خلاص اعرف مصلحتي وين ... قال خلاص كل اللي عليكم تعطوني الوكالة عشان بعد اسبوع نروح المحكمة وبعدها انتي واختك تتنازلو ومدري ايش قال كلام كثير... مختصرها انه بياخد فلوسنا عشان يسووا مشروع كبيير وشركه ومدري ايش وان حقهم بس مارح يكفي ... قلت له طيب كل واحد ياخذ نصيبه وندخل كلنا بهالمشروع ... صرخ علي انتي وش تبين توصلين له ... قلنا لك مارح ناكل حقك وكل شي تطلبينه مارح نقصر معاك ... اي وقت تحتاجين الف نعطيك 10 الف بدالها... قلت له انتوا اخواني على عيني وراسي ومابغى أخسركم عشان هالفلوس بس الحين انا محتاجته ... قالوا واللي جبناها لك قبل كم يوم ماكفتك ؟ زاد قهري من كلامهم وقلت لهم فلوسي باخذها وهي من حقي واختي برضو بتاخذها ومحد له سلطه علينا .. ومعاكم اللي يكفيكم عمر وانتوا جالسين في البيت من غير شغل ...اخوي الصغير قال لاخواني قلت لكم من اول محد بيخربها علينا غير فلانه ومافي فايده معها ... يعني انا ... قلت لهم والبيت بتبيعوه .. قالوا لسى نفكر... اخوي الكبير قال خلاص اتفقنا تتنازلو واحنا بنحفظ لكم ومارح نقصر معاكم ... قلت له انا مو موافقه .. قال اوك خذي حقك بس مالك دخله عندنا وانسي ان عندك ام واخوان ومن الحين اتصلي على زوجك يجي ياخذك دامك تبغين فلوسك ... اخر شي توقعته يقول كذا ... عرف وين نقطة ضعفي وين .. اهلي واخواني مالي غنى عنهم ... هو هنا لوي ذراعي .. ماوعيت الا وقلت له خلاص مابغى فلوس ولا شي وانا متنازله عن حقي ... ماستبدلهم بفلوس الدنيا ... قال هذي أختنا اللي نعرفها ووعد مارح نقصر معك بشي اللي تطلبيه بنجيبه لك وحب راسي وطلع غرفته وكل واحد راح لغرفته ... حسبي الله ونعم الوكيل صار العيد نكد ... رجعت سويت رساله لزوجي قلت له اذا طلبوا مني اتنازل وش اسوي ؟ قال بكيفك بس هذي فلوسك وخذيها ... قلت له واذا خيروني بينهم وبين الفلوس؟ .. قال وانا برضو اخيرك بيني وبين اخوانك ... قلت له اختارك واختارهم ... قال أجل لا تتنازلي ... قلت له صعب هم اخواني لو ماتنازلت لهم بيقطعوا صلتهم فيني ... قال اوك الله معاك واقعدي عندهم دام تفضلينهم علي ...

والله اني بين نارين مادري مين اراضي وايش اسوي .. له يومين لا يتصل ولا شي ولا جاني ياخذني مع انه قال انه بيجيني امس العصر ... وللحين لا اتصال ولا رساله .. . مشكلتي مالها حل كذا ولا كذا انا ضايعه ..

__________________
-

فأجبر خَاطري .. بفيّض نعَمك ❤ ....