الحمدلله من قبل ومن بعد
الله يديم عليكي نعمه وراحة البال
حبيبتي كنافة لتكسبي نفسك لازم تحطي براسك انو زوجك طبعه هيك وتتقبليه متل ما هو ليمشي المركب من دون ما تحملي نفسك فوق طاقتها ولا تضغطي على اعصابك
وهالشي مش معناتها انو تلغي كرامتك
بس عم احكيكي هالشي لانو زوجك متل ما عنده سلبيات في عنده ايجابيات
في بعض الرجال لا من هيدي ولا من هيدي ولا حتى بيعتذروا
انا عن نفسي عصبية طبعا مش كل الوقت بس وقت عصب يشهد الله على كلامي انو بحكي كلام مش موزون ابدا
وزوجي كتير بيسمع وما بياخد على كلامي لانو بيعتبره انو كلام وقت الغضب
مع انو بيمدح فيني كتير وبشكلي ودايما بيقول اني المرأة اللي بيتمناها شكلا واخلاقا وبيمدح قدام الناس فيني والكلام اللي بيحكيه لدرجة بتفكر الناس اني ساحرته
بس مرات بتوصل معو وبيجرح فيني كلام وبأنوثتي وبجسمي مع انو اللي بيحكيه مش موجود بس مجرد تحطيم ليفش خلقو
بتعرفي ولا مرة اخدت على كلامه او اتأثرت لاني بعرف حالي
وما بخلي كلامه وقت الغضب يهز شعرة مني
وزوجي مع كل ايجابياته عنده سلبيات ويمكن اذا بحط المجهر عليها
رح لاقي الف سبب وسبب
وفي صفات فيه بعمري ما بتخايل اني اتقبلها من اي شخص وخاصة الرجل بس معه بتطنش عنها
ودايما بنظر للكاس المليان وبشوف ايجابياته ومواقفه معي
والا والله ما بنبقى يوم مع بعض
مرة انا برخي ومرة هوي
ما في شخص مثالي مني ومن غيري
وبتعرفي كيف عايشة انا وزوجي كيف وقت يجرحك بالكلام وبعد شوي بيجي بيحكيكي وكأنه ما في شي
نحن نفس الشي مهما صار ومهما جرحنا بالكلام بعد شوي خلص ما بنرجع للموقف اللي صار وبنرجع نضحك ونمزح وبتقولي هيدول مش نفس الاشخاص اللي كانوا قبل بساعة
وفي بين فترة وفترة جلسات مصارحة
وممكن كل يوم يصير شي وكل يوم بنرجع وكأنه ما صار شي
والا اذا بدنا ندقق ونحاسب بعض والله بيتنا من زمان مهدوم

حطينا براسنا انو بنحب بعض كيف ما كنا بايجابياتنا وسلبياتنا

مرة بنشد ومرة بنرخي

ما في اصعب من وقت نبذل اكتر من طاقتنا لا بد من الانفجار
فنصيحة استمتعي بايجابيات زوجك واستغليها وعزيزيها بداخلك
وسلبباته مرة خدي موقف ومرات طنشيها
اول شي صعبة مع الوقت بتتعودي وما عاد بتأثر فيكي
ووقت يشوفك ما عم تهتمي كتير وبين فترات متباعدة اخدتي موقف بيحس بحجم غلطه اكتر ما كل مرة تاخدي موقف وبيركز على هالشي وبيترسخ براسه انك نكدية بل ما يترسخ انو جرحك

مع الوقت بيغير من حاله من دون ما يحس
اذا بقارن اول سنوات زواجي وبين هلئ بعد 14 سنة ونص بتلاقي اشيا كتير اتغيرت فينا من دون ما نشعر

اذا طلب يساوي سحور او فطور او يجيب جاهز استغلي هالشي لراحتك
نفسك الها حق عليكي وكل ما دلعتيها كل ما لقيتي انك قادرة تتخطي مواقف بكل سهولة


واهم شي تابعي مع مستشار ولو لفشة خلقة بدل ما تتراكم بداخلك
اقل شي شخص بيسمعك وبيفهمك
اسأل الله ان يسخر لك زوجك كما تحبين
وان يرزقك راحة البال دنيا وآخرة

احترامي

__________________





اللهم إني أستودعك ديني و نفسي وأهلي وزوجي
وأولادي وأحبتي فاحفظهم يا من لا تضيع ودائعه