رد: كوفي شوب الصبايا (٣)
معاج حق أمة.
زمان كنا نحترم المعلمة وما نتجرأ عليها.
صحيح هالجيل متفرعن وفيه جرأة وعدم تقدير لمكانة المعلم .. تحسينهم يتعاملون معاه كأنه مجرد موظف يقدم لهم خدمة .. وعلى كيفهم يقبلون أو يرفضون هالخدمة بعد .... لكن تبين الصدق .. أحس الأمهات والآباء لهم دور في ضبط فرعنة عيالهم.
مرة سلطان رجع من المدرسة معصّب من المعلم .. ما أذكر الموقف بالضبط لكنه ختم كلامه بأن المعلم كذّاب وإحنا مب على كيفه!!
قلت له: تأدب يا ولد وأنت تتكلم عن المدرس .. ومهما كنت متضايق لازم تحترمه ولا تقل أدبك وأنت تتكلم عنه.
ومن يومين راجع يتحرطم على مشرفة الباص .. يقول على كيفها تغير كراسينا وكل شوي تنقلني مكان؟! .. إنتي لازم تكلمينها عشان ترجّعني مكاني.
سألته: أنت شو سويت عشان تغيّر مكانك؟
قال: ما سويت شي .. بس أتكلم مع ربيعي .. وهي ما تبانا نتكلم!
قلت له: مستحيل تغير مكانك إذا كنت ملتزم بقوانين الباص.
ولما شديت عليه عشان يشرح لي بالضبط اللي هو يسويه في الباص .. اكتشفت إنه فعلاً يتحرك من مكانه ويعلّي صوته لدرجة الصراخ مع ربعه اللي يالس معاهم .. عشان جذي مشرفة الباص غيّرت مكانه.
قلت له: لا تعطيها فرصة تمسك عليك شي .. تصرف صح والتزم بقوانين ركوب الباص اللي حطتها المدرسة .. ووقتها إذا غيرت المشرفة مكانك لك حق تعترض وبيكون لك حق المفروض أروح آخذه لك .. لكن تتصرف غلط وما تبا حد يحاسبك وتباها تخليك تسرح وتمرح في الباص على كيفك .. وبعد تباني أروح أهاوشها؟!! .. لا طبعاً.
بعض الأمهات كان ممكن تشرشح المشرفة لمجرد إن ابنها اشتكى بدون ما تكلف على نفسها تفهم اللي صار بالضبط .. عشان جذي بعض الطلاب يتفرعنون.
__________________
اللهم طِيبَ الأثر .. وحُسْنَ الرحيل.
التعديل الأخير تم بواسطة مهره ; 04-05-2016 الساعة 10:05 AM