رد: طلبت الطلاق مستجدات الرد543
اعذروني .. انشغلت قليلاً.
بكرا عندنا مناسبة عقد قران ولد خال زوجي.
اليوم رجّعت شما من الحضانة .. ونيّمتها .. وعقب طلعت رحت الصالون .... وهو رجع البيت .. وعقبه اليهال رجعوا من المدرسة .. وأنا رجعت بعدين.
وكنت ناوية أروح أنا والبنات مع ماما لما تروح الصالون عشان تتحنى .. وكنت متوقعة إنها بتروح في الليل .. لكن بنتها اتصلت فيني وقالت لي إنهم طلعوا من العصر قبل زحمة الصالونات .. فناديت البنات عشان أجهزهن على أساس نطلع نلحق ماما.
وابتداءً من الاتصال مروراً بكلامي مع البنات وتجهيزي لهن .. كنت متعمدة يكون صوتي عالي عشان يسمع ويعرف إني طالعة .. بالإضافة إلى أن مهرة من نفسها راحت تقول له إنها رايحة تتحنى.
دخلت غرفتي عشان ألبس عباتي .. والبنات يتراكضن وراي .. وهو كان يالس على الكرسي.
فجأة طلب من البنات يطلعن برا الغرفة .. وناداني بهدوء: أبغي أكلمج شوي.
رحت وقفت على مسافة مب قريبة منه وانتظرته يتكلم بدون ما أطالعه.
قال: يعني شايفة إنها عدلة تطلعين بدون ما تقولين؟
قلت: رايحة أودي البنات يتحنون.
قال: عادي روحوا .. بس المفروض تقولين قبل .. وإلا كبريائج مانعج تقولين؟ (!!!!) (كان خاطري أضحك على هالكلمة)
قلت: ما أروح مشاوير غير اعتيادية .. كلها مشاوير تعرفها مسبقاً ما فيها شي جديد عشان أستأذن.
قال: ولو .. تراني بعدني ريلج ولازم أعرف .. إذا ما تبين تكلميني أوكي .. بس على الأقل ابعثي لي رسالة.
قلت: بسيطة.
ورحت أكمل لبسي .. جان يناديني مرة ثانية: عندي سؤال ثاني.
عملت نفسي مب سامعة .. فخلاني لين خلصت وكرر كلامه مرة ثانية.
تململت وأنا رايحة صوبه عشان أسمع سؤاله .. فقال لي: خلاص روحي.
ما أدري عاد هو خلاني أروح عشان ألحق طلعتي مع البنات وما نتأخر .. وإلا كرامته عورته لما شافني أغصب نفسي عشان أسمعه فسكت.
__________________
اللهم طِيبَ الأثر .. وحُسْنَ الرحيل.