المشاركة الأصلية كتبت بواسطة mimomea

حبيبتي احبه حبيبي فيكي من الخير الكثير وبإذنه تعالى رح يعكس ايجابا عليكي وعلى حياتك بجميع حالاتها

بتعرفي بالرغم من انك حساسة بس ارادتك للتغيير اقوى لانك بالفعل وصلتي لمرحلة حسيتي بالتعب من ورا الحساسية الزايدة والتصادم اللي عم يصير

بتعرفي انو اغلب الاشخاص الحساسين اذا سمعوا كلام ونصائح متل كلامي او كلام اغلب الاعضاء واشدهم حدة كرد الحبيبة مبتعثة
لوهلة خفت من ردة فعلك وبنفس الوقت ردها في الصميم ولمصلحتك ولو كان شخص غيرك كان طلب اغلاق الموضوع وما اتقبل هالنصائح
بس انت قلبك كبير وعم تسعي للتغيير وصادقة بهالشي
والانسان اللي بيحكيكي بصراحة وصراحته محترمة بيكون عم يحكي بصدق وضمير حي وبدو مصلحتك وما بدو تخسري النعم اللي عندك

وسبق وقلتلك التغيير ما بيصير بيوم وليلة ولا بكبسة زر

بدها صبر وارادة وعزم

بل متل المثل اللي حكيتك عنو وقت الطفل يبدأ يخطي خطواته الاولى وبيصير يوقع ومع كل وقعة بتقوى عزيمته وبيكبر اصراره وما بيمل ابدا ليصير يمشي وان وقع بيقدر يقوم بسهولة وبيكمل مشي بكل ثقة
وحبيبتي نحنا مش معناتها ما عنا عيوب بشخصيتنا ممكن انا عم انصحك بهالموضوع بس بكون بحاجة لنصيحة بشي تاني من شخص عندو خبرة اكثر مني
يعني اذا طلبتي النصيحة مش عيب ولا شي بنخجل نعمله بالعكس هيدا قمة الرقي والتطور وتثقيف النفس
وبس المطلوب منك وقت تحسي انك متضايقة بحياتك الزوجية خاصة ان كان من كلمة او تصرف صدر من زوجك بوجك تعي لعنا واسألينا وبنعطيكي الحل وكيف تتصرفي لتتجنبي حدوث مشكلة انت بالغنى عنها
ونحنا معك من بعد الله
وان حسيتي عندك طرف اكتئاب ما تترددي بالعلاج لانو الاكتئاب بصيب الصغير والكبير المتعلم والامي الغني والفقير

بدي اعطي مثل بسيط من اللي بصير معنا بالحياة اليومية وانا اجمالا ما بطرح مشاكلي لانو بعرف بتنتهي متل ما بدأت وكأن شيئا لم يحدث
بتعرفي البارحة بالليل حكيت شي مع ابني الكبير قام زوجي اتدخل لانو قلبو كتير حنون مع الاولاد وحساس كتير عليهن ومع اني سبق وقلتلو ما تحكيني شي قدام الاولاد وهيدا اكبر غلط وهو متفهم هالشي
بس مرات عاطفته بتغلبه اتدخل وبلش يلومني انو ليش بدي احكي هيك مع الصبي وقدام ابني انا بالعادة بطنش ومرات لاء
والبارحة ولعت وبلشت احكي كلام شمال ويمين وهو كمان زاد عليي انو ليش لصعد الموقف هيك
المهم كل اللي صار بخلال خمس دقايق او اكتر بشوي واذا ببقى وانا بالهالحالة ممكن تكبر القصة
فقلتلو اني ضاهرة
بعد نص ساعة ضهرت كانت الساعة 8ونص بالليل فاول دقيقتين التقيت بجارتي التركية عالطريق واتحدثتا شي عشر دقايق وطبعا وقت حكيتها كنت عم احكي واتضحك
وخبرتها انو رايحة امشي وهيك شي
فرحت على كذا مطرح اتعشيت وقعدت احكي مع اصحابي واهلي واتس واضحك ونسيت شو صار بالبيت واتواصلت مع ابني الكبير عالتلفون
لانو بس ضهرت هديت وبقدر احكي معو
وحطيت صورة عالموقع التواصلي لمكان كنت فيه وعلقت عليها انو احلى كزدورة انا ومع حالي
واللي شاف الصورة ما رح يقول كان في مشكلة صايرة معها .رح يقول هيدي عايشة حياتها بالطول وبالعرض
ورجعت مشي عال12منتصف الليل كلني طاقة وحيوية ونشاط وفرفشة
رميت كل الشحنات السلبية برا واخدت طاقة ايجابية

الخلاصة حبيبتي انو وقت زوجي سمع مني كلام شمال ويمين ما كانت ردة فعله عنيفة مع انو لو رجل تاني ممكن كتير ما يتقبل ومن حقه كمان
بس لانو وصلنا لمرحلة صرنا نفهم بعض اكتر ونتقبل كل شي من بعض
وهو عارف انو هالخمس دقايق اللي كتت معصبة فيهن رح يختفوا ولا رح يكون في زعل ولا نقاش ولا رح نحمل بقلوب بعض
بس هالشي ما صار بيوم وليلة
صار من بعد تنازلات مني اكتر منو
من بعد ما اتقبلت مواقف وتصرفات ومشيت مواضيع وكأنه ما كان في شي
من بعد ما عودته انو مهما صار ولا ممكن يمر يوم وما نحكي مع بعض
من بعد ما شاف انو النكد ما بحبه وبعمل المستحيل لاخلق جو من الفرفشة والمرح

ما في شي بيجي بسهولة واللي بيجي بسهولة بروح بطريقة اسهل من ما اجا فيها

كرمال هيك حبيبتي احبه حبيبي الفرصة قدامك وبتقدري تتجنبي مواقف اقل ما يقال عنها انها بسيطة امام اللي بتصير ببيوت تانية

اتمزني عالضحك والتفاؤل
اصنعي عالم خاص فيكي ولو كان وهمي والوهم بيصير حقيقة

دعواتي ترافقك
احترامي