كبير المراقبين [ وسام العطاء الذهبي 2016 ]
تاريخ التسجيل: Jun 2012
المشاركات: 10,291
رد: وصلت للطلاق خلاص
حبيبتي احبه حبيبي شفتي اغلب ردود الاعضاء انا معهن بكل حرف
بس مش معناتها انو الخطأ كلو عليكي او في خلل
لا بس المشكلة حبيبتي بسقف توقعاتك
بس تقتنعي انو ما في مثالية بالحياة الزوجية مية بالمية
وما فينا نعيشها متل ما بدنا ياها بالزبط لانو كمان في شريك عايش معنا وممكن تطلعاته بتختلف عن تطلعاتنا
عندها بيبدأ اول العلاج لحل المشكلة
ولنحل المشكلة بنسبة كبيرة لازم نقرب وجهات النظر ونحسن الظن كتير بكلام الشريك
هالشي بيعكس ايجابا على نفسيتنا
اكتر شي مدمر للحياة الزوجية وراحة البال وقت نسوء الظن بكل كلمة وبكل تصرف بتصدر من الشريك او نحلل متل ما بدنا ونصدق تحليلنا
هالشي متعب بشكل مش طبيعي
ما في حياة روميو وجولييت كل الوقت
وربنا خلقنا في كبد
وبموضوعك السابق وضحتلك انو زوجك ابدا ما اخدك كرمال مالك
ممكن اشترط بدو موظفة لانو ادرى بوضعه بس هو اللي عم يصرف حسب معطياتك بالموضوع السابق يعني ما استغل مالك ابدا
حبيبتي حطي هدف براسك الامومة
عليكي تسعي ان ربنا اراد هيدي اكبر نعمة واذا ما اراد كمان فيها خير من رب العالمين
وبتكوني عملتي بكل الاسباب
اتدربي عالافكار الايجابية
طنشي وطنشي وطنشي افكارك السلبية مرة وعشرة ومليون كمان
بتعرفي انا هلئ عم ادرس لغة لاحصل على شهادة فيها وبدي ادرس تصميم ازياء بس لخلص من اللغة
مع انها مكلفة جدا نظرا لانو مش ناوية اشتغل فيها بالمستقبل القريب
وزوجي قلي طيب رح تدرسي وبعدين
قلتلو بدي اصنع عالم خاص فيني لانو بالبيت امرأة متزوجة وام وعايشة المسؤولية ومشاكل الحياة والتربية واللحظات الحلوة والمرة
بس خارج البيت هيدا عالمي الخاص امرأة من دون زوج ولا اطفال من دون مسؤولية
بس طموح عم يتحقق وخاصة ان كان بيبسطني ويسعدني
بتعرفي بس لمجرد اني فكر انو اذا الله كتبلي عمر وبلشت دراسة الديزاين بحس قلبي بلش يرفرف من الفرح لانو من صغري كنت بحبه
وهالشي بيعطيني طاقة ايجابية اتحمل كل شي سلبي رح يجي
والسبب لانو بفكر بحالي كيف اسعد نفسي بحب نفسي وبحب اعمل اي شي بيسعدها
طيب انا الله رزقني اولاد ربي يحميلي ياهن بس ما وقفت سعادتي عليهن لانهن رح يكبروا ويشوفوا حياتهن
وعندي زوجي كمان مش واقفي سعادتي عليه
لانو اذا انا ما سعدت نفسي لو بملك اولاد وزوج واهل وصحة ومال الدنيا كلها
ما رح حس بالنعم اللي عندي ياها لانو تفكيري سلبي ونظرتي للحياة نظرة تشاؤمية
بتعرفي حبيبتي كلنا بنحزن باليوم كذا مرة والاغلب بيذرف دموع ولو بينه وبين نفسه
بس وقت نواجه الشريك او الاولاد او الناس اجمل شي بنعمله وبنخدم نفسنا فيه انو نواجهن بضحكة وروح مرحة
مع الوقت بنتعود انو نغير مودنا من حزين لسعيد تلقائيا ونتحكم فيه
ولو ما كان في سبب للسعادة بس نصير ناس متفائلين رح نحس بالسعادة ولو نحنا اخترعنا شي وهمي
الثقة بالنفس مهمة كتير كتير
خليكي واثقة بحالك ووزنك مش شي مستحيل بالعكس ممارسة الرياضة والاهتمام بالصحة اكتر شي بيسعد الانثى وبيعطيها ثقة بالنفس
وقت تمارسي الرياضة حبيها لانو بتحبي حالك وكافئي نفسك لانو عم تبذلي جهد لاجل تحصلي على جسم بيرضيكي قبل ما يرضي العالم
زوجك شو ما حكي طنشي كلامه ما توقفي عنده اتعوذي من الشيطان قبل ما تحسي حالك رح تتسرعي وتحكي
لو كل يوم عم يهينك لا انت رح ترضي ولا نحنا بنرضى بهالشي
بس مثلا طنشني حاول يبعد عني ما اعطاني الاهتمام هيدول ما توقفي عندهن
طيب اعتبري نفسك بلا زوج وعزباء وهالشخص عايش معك شراكة بالبيت ووقت يطنشك ما تهتمي اشغلي نفسك بشي بتحبيه
فرغي غضبك بالرياضة وجربي هالطريقة وشوفي نفسيتك كيف رح تصير
ووقت يقرب منك زوجك عيشي دور الزوجة خدي كل الاهتمام واستمتعي فيه واشبعي منو
واكتفي وما تطمعي انو بعد بدي المزيد
لانو الشي الزائد متل الناقص رح تحسي ما عاد الو طعم ولا لون
حلو القرب وحلو البعد
ليضل في اشتياق لازم يصير في بعد ولو داخل البيت نفسه
ومش بعد بمعنى ما في احتكاك لا بالعكس قريبين من بعض وبنفس الوقت كل شخص معطي التاني مساحة وحرية ممارسة حياته
لتتوازن حياتك بتصيري تغيري اشيا بتتغير بزوجك
بتغيري شوي بنظام حياتكن
بمخططاتكن بس كلو بحدود ما ينعكس سلبا
استخدمي الذكاء وطولة البال لتتجنبي اي تسرع ممكن يسببلك بمشكلة كبيرة
اهتمي،بنفسك دايما ودلعيها وما تنطري من حدا تاني يهتم فيها
لانو مع الوقت اهتمامك رح يجيب تتيجة ورح تلاقي الاهتمام من غيرك رح يجي تلقائيا
اتعبي انتي وعم تزرعي رح ترتاحي من بعد ما تحصدي
دعواتي ترافقك حبيبتي
احترامي
|
__________________
اللهم إني أستودعك ديني و نفسي وأهلي وزوجي
وأولادي وأحبتي فاحفظهم يا من لا تضيع ودائعه
التعديل الأخير تم بواسطة أُقْحُوَآنّ ♡ ; 10-01-2016 الساعة 03:00 AM
السبب: تمييز الرد