قلبي معاك وأتذكر موضوعك السابق بكل تفاصيله .. الله يكون بعونك يارب ..

- طيب انتي قلتي نقطة جدا مهمة وهي جدك .. هل تقدرين تتكلمين معاه او حتى تدخلينه بمشكلتك ؟
يعني مثلاً تقولينها بصراحة لأهلك تتركوني أقرر أو أطلع لجدي .. فهل ظروفه كويسه ؟

- في أي شهر من الحمل ؟ هل ممكن الاسقاط أو شايلته من بالك نهائي ؟

-لو فعلاً مو قادرة تعيشين مع زوجك ، حاولي تتعايشين .. عارفة إنه شيء مرهق وزوجك بصراحة شخص غير سوي ومريض الله ياجرك .. يعني مثلاً تدخلين دار تحفيظ العصر منها تطلعين شوي من جو المشاكل وتتعرفين ع بنات وتغيرين جو و ع فكرة جو الدور جدا جميل فقط ساعتين لكن تتغير حياتك تماماً .. والنقطة الاهم هي بناتك فرصة يغيرون جو وتبعدينهم عن البيت والمشاكل والجو المشحون ..
والدار يكون فيها نقل خاص فيهم ورسومهم جدًا رمزية .

- انشغلي عن زوجك وحتى لو شفتيه وقام يسوي حركاته واستفزازه مارح تتجاوبين معاه لان اصلا بالك مو معاه انتي عندك اشياء تشغلك .

(( تدرين ايش مشكلتك يا مجروحة ؟ انك حساسة ورقيقة ، وصدقيني بهالزمن الحساس ما يعيش ، حتى لو تطلقتي ، بتتعبين من اهلك .. وارجعي لموضوعك السابق واقري كيف تعبت نفسيتك من تلميحات امك ونغزاتها ، الحل انك تحطين اعصابك بثلااااجة فقط هذا الحل الوحيد الي ممكن الشخص يتعايش مع مشاكله ،
ابغاك تفكرين بينك وبين نفسك : انا جالسة ابكي كل ليلة واتعب واتأزم عشان مين ؟ عشان ناس حتى ما فكروا فيني ! انتي مستوعبة انك تضيعين شبابك بحزن وهم وغم وتعرضين نفسك للامراض والهموم عشان ناس والله ماتستاهل كل هذا ؟ ))

حاولي انك تتجاهلين وتبردين اعصابك تماما .. مو كلام بافعال .. سوي رياضة لو مشي سريع يوميا ترتاح اعصابك وتروقين ، وجيبي ورقة وقلم الان واكتبي وش مزايا زوجك وعيوبه ، وايش مزايا الجلوس ببيت اهلك والعيوب . وقرري الافضل لك ولعيالك .
اهل زوجك شيليهم من بالك نهائي بس لا انسين تدعين عليهم بصلاتك .. قبل السلام ادعي ربي ينتقم منهم شخص شخص ، واذا سلمتِ طلعيهم من بالك .. ولو حاول زوجك يستفزك ليه ماكلمتي امي .: ردي عليه ابشر وافتحي جوالك قدامه وكلميها وخليه يشوف اسلوبها الزفت معك ..
خلي الوضع مرررة عادي لا تكبرين المشاكل خلك مرة مرنة مع زوجك لا تكبرين مشي مشي المسلم هيّن ليّن .. هي الدنيا تصفى لأحد ؟

- علاقتك بزوجك ، حاولي تكون اكثر تنظيم ،، تحتاجين اغراض بلغيه قبل ما تخلص اللي عندك .. تحتاجين ملابس ؟ قبل المناسبة باسبوعين اطلبيه تطلعين .. بكذا تريحين نفسك من التعب النفسي ..

وبنفس نقطة التنظيم ، نظمي حياتك كاملة لان القرارات المفاجئة هي اللي تسبب لك قلق وتتعب نفسيتك كل اليوم صدقيني .. بنتك اتفقي مع باص او نقل خاص يوديها ويجيبها بكل هدوووء. وبداية الترم تدفعون الرسوم ويجي ع الموعد .
اغراض البيت زي ماقلت قبل ما تنتصف كيسة الخبز تشترين جديدة ..انا كذا اسوي مو بس الخبز كل شيء بالبيت اغراض واكل .. حتى بامبرز بنتي اذا انتصفت الكيسة قلت لزوجي يجيب جديدة ..