المشاركة الأصلية كتبت بواسطة mimomea

حبيبتي احبه حبيبي اذا شفتي كلامي عم يزعجك خبريني وما بزعل منك
انا مقدرة انك عم تحاولي التغيير وانك بظرف شوي تعبانة
وممكن هالمشكلة تكون لصالحك لتلتفتي لنفسك
وانا من النوع اللي بحب نفسي كتير ومهما وصل الحزن معي باعلى درجاته بفتش على اي شي لارسم الضحكة على وجهي
بتقولي في عداوة بيني وبين النكد والتشاؤم
بعطي نفسي الاولوية ومهما حدا سمعني كلام ولا ممكن تنهز ثقتي بنفسي
بل باخد الكلام لصالحي وممكن يكون عندي خلل بصلحه وبطوره بس ما بتأثر سلبا

بتصرف على طبيعتي وحسب الشخص اللي معي
لانو لكل شخص في الو طريقة

خلاصة الكلام اللي شايفته مثلا رح تصيري نعم الزوجة لزوجك بس هل بطريقة جامدة او فرفشة
اذا بطريقة رسمية حسب ما انا شايفة يعني الجو بالبيت بيخنق وبتكوني ما اتقدمتي ولا خطوة

في فرق بين انك تكوني نعم الزوجة لزوجك بروح مرحة وبين الرسمية
واذا كنتي يروح حلوة وضحك وفرفشة هالشي كرمالك انت مش هوي
لانو هالطاقة الايجابية اللي عندك رح تأثر على اللي حولك
وبما انو زوجك عايش معك بالبيت ويشوفك كيف عم تحبي نفسك وبشوشة وسعيدة رح ياخد من هالطاقة ورح يعشق الجو اللي عم تنثريه بالبيت
طيب يمكن تتسألي انا ليش بدي خليه ينبسط وما عاد يعنيلي شي

لانو انت قلتلي عندك مساحة حرية ببيتك ما ممكن تلاقيها ببيت تاني

وهالبيت اللي فيه حرية لازم يكون فيه جو يريحلك نفسيتك

والرسمية مع زوجك والجمود ما بينفع لانو انسان بطبعه حساس وحنون وعاطفي
وردة فعله رح تكون قاسية لانو عاطفته بتسيره
فبتلاقي وقت بدو يعبر عن غضبه بيجرح بكلامه
بس مش معناته انو كلامه صحيح وعم يقوله عن قناعة

طيب يا حبيبتي انا انثى متلي متلك
وزوجي عاطفي ورومانسي واللي بدك ياه
بس وقت ارميه كلمة وحس انو ما فيها شي ليزعل بس بالنسبة الو جرحته ويسمعني كلام اقسى من الكلام اللي لحد هلئ زوجك قالو الك


طيب ليش ما بطلعو من قلبي متلك وليش ما بقول انصدمت فيه وليش ما بقول كسر شي كبير جواتي وليش ما بقول ما عاد اوثق فيه

بتعرفي ليش لانو من داخلي عارفة كلامه مش من قلبه كلام على ورق وبس

طيب ليش ما بدك تقتنعي انو زوجك عم يحكي هيك من قهره
ليش بدك تنسي انو هوي ذاته الشخص اللي دلعك وقلك مستحيل اتخلى عنك
ليش حاسي هالشي نهاية قصتك معو
ما عم قلك خليه محور حياتك
ولا سعادتك توقف عنده
بس وقت بدك تقولي بدي اسعد نفسي بنفسي يعني ما رح تتأثري بكلامه
يعني رح تحدثيه وانت عم تضحكي لانو الضحكة الك
رح تمزحي معو وبس بنفس الوقت بينك وبين نفسك ما عاد تقدميله كل شي على حساب نفسك
لانو خديها قاعدة كل شخض بحب نفسه ان كان زوجك او غيره ان كنت انا او انت
واللي بيخسر هوي اللي ما بحب نفسه
وميزي بين حب النفس ليلاقي الشخص نفسه وبين الانانية اللي الناس بتنفر منها


كرمال هيك عزيزتي انا شايفة بين سطورك انك حابة تتغيري بس اتغيري لتضل الضحكة مرسومة على وجك
وقت تلاقي حالك ما اطلعتي من الجو المشحون والحزين
اعرفي انك ما عملتي شي لصالحك
وهالشي بدو وقت وصبر

وحطي هدف براسك انو كل اللي رح تعمليه لصالحك وبس
يعني اذا كسبتي حالك لصالحك
واذا كسبتي زوجك كمان لصالحك
السعادة بين اديكي اعرفي تستغليها وتعيشيها

بتمنالك من كل قلبي السعادة وراحة البال


احترامي