اخي الكريم ما بدنا نرجع لمشاكل الماضي وموضوعك السابق لانو صفحة وانطوت وقت قررت تفتح صفحة جديدة كرمال ما تتشتت الطفلة
خلينا بالحاضر وبالمشكلة اللي صارت زوجتك غلطت بصراخها وبنفس الوقت المشكلة ما بتستدعي الطلاق
لانو بسمع كتير من رجال بتشتكي من غيرة زوجاتهن وشكهن ونفس الشي من نساء وهالشي ما بيجي من فراغ ببعض الاحيان وخاصة ان كانت الغيرة عند زوجتك بعد رجوعها
مثلا زوجتك قبل ما ترجعوا لبعض عرفت انها رح تخسرك واصرت ترجعلك بغض النظر عن اخطائها وتصرفاتها وعدم المامها بالحياة الزوجية في بعض الامور
وممكن عرفت انك نويت بهيديك المرحلة الزواج
فهون ظهرت عندها الغيرة والخوف من وجود امرأة ثانية وخسارتك
والشيطان شاطر يفوت من هالمدخل وغير هيك شكها طلع بمحلو حسب نظرها هيي انو الرسالة بعدها موجودة من اللي كنت بدك تخطبها او رقم البنت اللي شافته
مع انو غلطها كبير تفتش بالتلفون وهالشي لازم تتوقف عندو وبنفس الوقت لازم تطمنها

ممكن تطنشها ممكن تحاسبها بس انو توصل للطلاق هيدا مش سبب مقنع لهدم بيت وتشتيت اسرة

في مشاكل اكبر من هيك وبيوت بعدها قائمة
وما في حدا كامل والكمال لله وما في حياة زوجية خالية من المشاكل
وكل انسان عنده سلبيات وايجابيات
ووقت يكون الانسان معصب ما بعود يشوف غير سلبيات الشريك
والفتاة او الشاب مش حقل تجارب على حسب بعض النصائح انو جرب ست شهور او سنتين وما عجبتك طلق وما بعرف شو
مش هيك بتنبنى البيوت ولا على هالافكار بتتماسك الاسرة
ما بعرف ليش صار الطلاق سهل ومتل لعبة البيوت
الطلاق بصير وقت تصير الحياة مستحيلة بين الشخصين وما بقي اي حل
اما اختلاف بالطباع والشخصيات فهيدا وارد مع الكل
ما في شريك مطابق لكل شروطنا
والا ما كنا شفنا ولا اثنين مزوجين ومستمرين مع بعض

اخي الكريم اذا زوجتك من بعد اخر مشكلة اتغيرت شوي ولقيت تحسن منها بغض النظر عن الغيرة يعني في بوادر خير
لانو في حال مش قادر الان تفتح بيتين وبنفس الوقت تهددها بالزواج من اخرى هون الزوجة بتفقد الامان والثقة وبصير عندها شك ولو شكها كان غلط
وكلنا مهما كبرنا معرضين انو نغلط وما ممكن نمشي عالمسطرة والقلم
فاذا بتشوف اخوها الكبير رجل عاقل ناقش معه المشكلة بجلسة وبالجلسة التانية بحضور زوجتك
وبالنسبة للبنت في حال كانت زوجتك بتهتم ببنتها وبتحبها
من الظلم التخطيط لحرمانها منها واخذ الحضانة كونها الان ليست هيي من طالبة الطلاق
ولا ناشز
اخي الكريم ما في بيت ما بيخلى من المشاكل
و الاولى انو نحاول نعالج لتستمر الحياة

وقت بدك تاخد هيك قرار لازم تاخده وانت مش معصب وتكون متأكد مية مية انو ما عندك رغبة بزوجتك ولو واحد بالمئة

اسأل الله ان يبدل حالك الى احسن حال ويفرج همك ويرزقك السعادة دنيا وآخرة
احترامي

__________________





اللهم إني أستودعك ديني و نفسي وأهلي وزوجي
وأولادي وأحبتي فاحفظهم يا من لا تضيع ودائعه