وعليكم السلام ورحمة الله وبركاته

والله يا اختي كل اللي عليك الان تمسكي ورقه وقلم

او تسوين جدول في برنامج الاكسل جدا رائع حنا مسوين ميزانيتنا عليه والحمدلله مرتاحين

اول شي لما ينزل الراتب نشيل القروض والمتبقي نوزعه على احتياجات الشهر ومانستصغر اي شي كل شي نكتبه
مثلا
فواتير الكهرب فواتير الجوال
اغراض المطبخ
مصاريف الاولاد اليوميه للمدرسه
راتب السواق
مصاريف الخدامات اللي بالشهر
بنزين السياره
مبلغ للطوارئ

وكل شي نحتاجه شهريا نحطله مبلغ حتى قطة الاستراحه بعد

ثم حسبنا المبالغ وشفنا المتبقي والحمدلله طلع لنا مبلغ حلو

طبعا فكرة الميزانيه اول ماينزل الراتب
تحويل فوري < وهذي لفواتير الكهرب مثلا والجوال وهو على طول عن طريق النت
والكاش < هذي المبالغ اللي حسبناها ونستهلكها في الشهر تنسحب كلها وتصير بأظرف
مثلا ظرف لمبلغ اغراض المطبخ وظرف لفسحة الاولاد وهكذا وتوضع في مكان آمن في البيت في تجوري مثلا او درج مقفل
فكرة الاضرف جميله جدا حتى تقيدك بمبلغ معين ماتزيدين عليه الا للضروره القصوى


ثالثا مبلغ التوفير الاساسي اللي طلعلنا قبل < وهذا يصير في البنك ماتسحبونه مع الكاش

وحتى ممكن توفرون من مبالغ الاظرف
بدل ماتوفرون بالشهر 500 ممكن يكون 1000 او 1500 بعد
يعني ممكن في بعض الايام تستغنين عن الخادمه وهنا المبلغ الموجود بالضرف على طول يروح للتوفير وبكذا التوفير بيكون اكثر من المبلغ الاساسي
او مثلا نقول اغراض المطبخ حاطين لها ميزانيه بالشهر مثلا 1000 ممكن ماتشترون بكل المبلغ و بكذا الباقي تحطونه مع التوفير

وصدقيني بترتاحون كثير وممكن تتفاجئون من التوفير اللي بيطلع لكم لان زمان نسحب وبس وتروح لاشياء غير مهمه والاساسيات ماشريناها

اما بالنسبه لسؤالك للمبالغ على حسب انتم كم تستهلكون بالشهر ؟
شوفي اخر فاتوره مقاضي كم المبلغ ؟ وهل كفتكم الاغراض شهر

فاتورة الكهرب كم تطلع لكم كل شهر ؟

انتي شوفي كم واحسبوها او حطي مبلغ توقعي لشهر واحد اذا شفتي الميزانيه مضبوطه استمري
واذا فيه زياده او شي ناقص عدليها

حنا قبل مانسوي الميزانيه شفنا فاتورة الكهرب تكرر علينا المبلغ كذا مره وخلاص كذا عرفنا كم نستهلك بالشهر

وبالنسبه لمقاضي المطبخ نفس الشي تقريبا عرفنا كم نصرف وبحدود كم وبكذا حطينا الميزانيه
وكل شي حسبناه وطلعنا له مبلغ معين

انتم ادرى باحتياجاتكم الشهريه لان الناس تختلف فعشان كذا انتم حددو المبالغ

وبس اتمنى اكون افدتك

والله ييسر اموركم