السلام عليكم ورحمه الله وبركاته

الحمد لله الذي تتم به الصالحات اما بعد..

من بعد يوم عصيب وجلسه ساخنه عندهم بالمنزل وهواش دام لاربع ساعات اخرجت زوجتي الطاقه السلبيه منها واشتكت لوالدي مني مع ان كان الكثير الكثير مما تقوله عني ويقوله حماي عني ظلم بظلم وطلعت من الجلسه كلام كثير مو عاجبني بس لقيت ابوي غلطني وقالي انت تضيع حقك بعصبيتك وانفعالك ولازم تقدر تتحكم باعصابك الصراحه انا اخطأت بشي وانا اعترف فيه اني كان صوتي عالي عندهم بالبيت حتى جدام ابوها وهذا ما يصح مني وما ادركت خطأي الا الان بعد ما انتهت المشكله لكن ابوها رجل صالح كان يبي الخير لبنته ولي

المهم باختصار بعدها بيوم اللي كان يوم الجمعه رحت اخذتها من بيتهم وابوها نزل معاها بجنطتها وانا اخذتها من تحت المصعد لكن زوجتي كان وجهها عابس توها متأثره بشد الاعصاب اللي كنا فيه وانا زوجتي من النوع ما يقدر يهبط بسرعه ياخذ وقت وباجتهادات كمان..

اخذتها ورحت طلعنا قلتلها انا اول شي بنسويه راح نتصدق وفعلا رحنا وتصدقنا قبل اي شي الصراحه كان ودي اول القصيده شي لله تعالى انا وياها وبعدين رحنا تغدينا بمطعم رومانسي هادئ وطول القعده وجهها عابس وما تبي تتكلم الا بالطقاق لكن انا ما حاولت اغضب ولا اثور وتمالكت نفسي وتجاهلت اللي هي فيه عشان اهدي الوضع واكون انا الافضل وبعدين طلعنا من المطعم تمشينا بالبحر وسط الناس وتكلمنا شوي لكن احوالها مو ذاك الزود يعني كله وجهها عابس وتسولف مو بسهوله بعدين ردينا البيت وشغلت قرءان قبلها على سورة البقره حاولت شوي شوي معاها الينها وحسيت بالسؤال اللي بذهنها اللي تقول " اشلون قدرت تبتعد عني شهرين كاملين " طبعا انا ما حاولت اقولها وانتي هم اشلون تبتعدين وهي تقول وانا اقول وما نخلص وهي ما تصدق اني اقولها ترى كنت بتعذب بهالفتره ما اكل وما اشرب وما انام ولا اي شي لكن ما تصدق وتحسبني اجذب عليها يعني متناقض اشلون تبعد بأيرادتك واشلون متعذب !! انا كنت اسمع واطنش لاننا تعادهنا بالجلسه ما نتكلم بالسابق ابداااا لكن طبع السيدات لازم تتكلم وانا تحملتها خليتها تتكلم وانا اضحك معاها واهديها واللي فات مات واليوم حنا بصفحه جديده خلك من اللي طاف كان شيطان والحمد لله ابتعد عنا والله ما يرجعه ...

وهذا اللي صار...

وشاكركم جميعا اخوتي في الله واشكر كل من تابعني من بدايه موضوعي الا الان وانصح انصح بالصبر فالصبر مفتاح الفرج لكل مشكله ثم الدعاء لانه له مفعول السحر عند الله ثم الاخلاص بالنيه لله عز وجل والحمد لله انه اخرجني من هذه الضائقه التي كنت اتصور اني لم افق منها ابدا واحمد الله انه ارجع لي قرة عيني التي عشت اسوء شهرين بحياتي ببعدها عني لكن الحمد لله وقدر الله ما شاء فعل


والسلام عليكم ورحمه الله وبركاته