المشاركة الأصلية كتبت بواسطة يمكن بعيد

شفته هادىء و فارد وجهه قلت أكلمه.
النتيجة مو مرضية.زوجي إذا رافض يتغير ما يحب يسمع!
صار الحوار بعد مزح و ضحك و حضور صفاء نفسي* كالتالي..
_يصير تشرح لي الحالة ال تصيرك؟حالة انك تصد و تسوي علي اكس كبيرة و من غير ما تشرح لي سببها؟
**أي حالة؟
_انت وضعك قبل 3 ايام مو طبيعي.توك اليوم تصير طبيعي.يصير تكلمني عن السبب لأن هذي الحالة تتكرر و معتمدنها.أنت شنو تحصل في النهاية منها؟
**سألي نفسش.
_تعتقد أنها مجدية؟و انا ما اعرف اسبابها والخلاصة كذلك ما توصلت لها.حالة غامضة.
**سألي نفسش.
_انزين،انا سألت نفسي ما عرفت ما توصلت أنت فهمني.
**روحي جوفي الولد قاعد بروحه.
_ركز معي رحم الله والديك.الولد في أمان.
دخل ولدي،و حاول يشغل روحه مع الولد.
_انزين ذكرني بس الموقف ال خلاك تصير جدي.
**مو متذكر لأن شلته من بالي.
_إذا كنت نسيته ليش تبني حالة و نفسية أيام عليه؟ و ليش ما تقولي في نفس اليوم؟
**أنا الحين بطلع.
طبعا تصريفات سخيفة😤
و يوم قلت له:إذا يهمك استقرار العلاقة،و نفسيتي تجاهك و تجاه الاطفال و البيت،و إذا يهمك ذمتك قدام الله خلنا نكون ع وضوح.
قال:
انتين تعشقين النكد،و حتى لو واحد بيفتح صفحة جديدة ما تخلينه.
قلت له:
ال 3 أيام ال راحت تعتبر نكدية،مشحونة نكد.فلازم اعرف اسبابها و اعرف الدروس المستخلصة منها حتى ما يكون فيه نكد ان شاء الله.
**قلت لش انش نكدية و تحبين تنكدين.
_اوكي،الفترة ال راحت شيء غامض،فهل مو من حقي أستبصر و أستوعب؟لأنها حالة تتكرر و مو من الذكاء أن أسمح للحالة تتكرر.
_أنت متزوج عشان نكون وياك وحدة تسمعها و تسمعك تفهمها و تفهمك،تتشاركون الكلام و تناقشون مشاكلكم.لها كلام لازم تسمعه.
**وش هالنكد يا ربي.
_ليش نكد؟النكد انك ما تسمعني و لا تسمح للحوار.و هذي أهم مشاكلنا.


خرج من الغرفة و هو يعتقد أنه الصواب.و أنا الخطأ.
وش هالرجال يا ربي! يعني ما اعرف ليش يعاملني جدي،و يبيني ارضى بالمعاملة و إلا فأنا نكدية!