للحين تميت شهر بالضبط ما سمعت صوت زوجتي وهي ما حاولت تتواصل معايا ابدا ولا حتى بمسج...يعني اشلون !!! يعني اشلون ضربت بالعشره والميثاق الغليظ عرض الحائط..انا مو غلطان بشي بس هي تشوفني غلطان كالعاده..وحتى لو انا غلطان اشلون زوجتي تستمر 30 يوم ما تحاول تتواصل معاي ابدا ولا حتى بأضعف الايمان..قلبي يعورني عليها وولهت حيل على اني اشوفها بس مو قادر احاول او اتصل لان الموضوع صار كبير وبين العيلتين وانا منتظر ابوي لين يرجع من السفر بعد اسبوعين ويقعد مع ابوها ويتفاهم..لكن اللي محيرني ومو قادر استوعبه اشلون تقدر كل هالمده ما تتصل وعلى حتى مسج نهائيا اشلون هذا قلب امرأة !!! والله انا الرجال احس اوقات راح اضعف واتصل عليها لاكن امسك نفسي باخر لحظه واقول لنفسي من يضمنلك انها ترد عليك اصلا واذا ردت يمكن تندمك انك اتصلت وتسمع منها اقبح الاساليب في الكلام لانك تراجعت وضعفت واتصلت فيها ... ابوي يقولي هذي ما تبيك هي لو تبيك جان اتصلت فيك حتى لو انت غلطان بالذات انها حامل ولازم تعرف ان بينكم طفل وما يصير تهدم بيتها بايدها يقولي لو هي عاقله واهلها عقلاء وبيت اصول جان من رديت من السفر كنت حصلت زوجتك ببيتك مو عند اهلها مستانسه وما تفكر فيك..اسمع كلام ابوي اضعف واحس ان كلامه منطقي لكن قلبي يعارضني ويقول لي لا تسمع الكلام هذي زوجتك وتذكر ايامك الجميله معها وعشرتكم التي دامت عاما كاملا ويأتي عقلي يقول ولماذا لا تتذكر مواقفها السيئه التي سوتها معك وان ناقصها كثيييير من تعاليم الاصول وكل مره طلعك غلطان هي واهلها وتردون بيتكم وكم يوم وتحدث مشكله اخرى بينكم..صرت محتار يا جماعه وكل يوم زوجتي تجيني بالاحلام من كثر التفكير فيها قبل النوم واشوف صورنا مع بعض بالجوال واموت من الحزن واقوم واصلي بالليل وادعوا لها بالهدايه وصرت ما انام الا 4 ساعات باليوم وعلى شكل متقطع .. هذي المره مشيت ورا كلام البشر قلت خلني اجرب اخذ موقف طويل معاها واشوف شن راح تسوي لاني كل مره ما اسمع كلامهم وما احب احد ينصحني على التعامل مع زوجتي وكنت ماشي ورا قلبي بشكل كامل ودائما تزعل واصالحها واجيب لها هديه واحيانا كمان هي كانت بتصالحني لمن ازعل ..هذي المره قلت خلني اجرب اخذ موقف صارم لكن احس مدري هذا صح ولا غلط اخذت الموقف وزوجتي اخذت موقف اقوى مني كنها تقول العين بالعين..اشلون تقدر المرأة تقسوا بهذا الشكل اشلون تقولي احبك وام اقدر اعيش بدونك وقدرت انها تبعد كل هذي المده عني بلا سؤال .. وانا اعلم تماما انها تنتظر مني اني اركض وراها كما عودتها لكنها تعلم اني كل مره اروحلها اصالحها لكن هي المره لا صمدت وهذي نتيجه صمودي العين بالعين وهي لا تتنازل ابدا..اشتقت لمنزلي الصغير واجواء منزلي انا الان قاعد ببيت اهلي لوحدي لانهم جميعا مسافرين عطله شهرين وباقي فيها اسبوعين وكل اهلي مستغربين اشلون زوجتك للحين ما سئلت عنك ولا مره !! يقولولي هالكلام وما اعرف ارد عليهم وعيني تطالع الارض .. كل مره زوجتي تزعل اروح اركض وراها امام العالم كله واولهم اهلها عشان يعرفون اشلون انا احبها وما ارضى تزعل وتترك بيتها والاسباب كلها ما اتفه منها وبحياتي ما مديت ايدي عليها ولا سبيتها ولا اهنتها ولا خنتها كل الاسباب تافهه جدا..والمره الوحيده اللي انا اخذ موقف منها اهلي شافوا اني رخيص بعيونها وما حاولت تركض وراي كما افعل انا معاها كل مره..احس بوحده وعزله تامه وما املك الا الدعاء والسجود الى الله وكل مره اطلع من دوامي اتذكر اني رايح بيتي وارجع واتذكر اني ببيت اهلي وبيتي فاضي محد فيه .. زوجتي بيني وبينا مشاكل كثير لكن كنت دائما اقولها نتهاوش نزعل بالايام مو مهم لكن المهم ان الفراق لا يعرف طريقنا ابد تدرون انا كل يوم انتظر زوجتي تتصل فيني وكل يوم عندي امل انها تبدأ معاي وينتهي اليوم بلا جدوى ا...صرت احس اني بحرب اعصاب بيني وبينها من يستطيع تحمل البعد اكثر انا ام انت