رد: زوجي عزم اصدقائه ، ورفضت الطبخ لهم
يا جماعه صلوا على النبي
أكلتوني بقشروني!
صراحه جاني احبااااااط من الردود وترسخت عندي الفكرة انه المجتمع يعتبر المرأة آله مو بشر وان أهم شي ان الآله هذي تكون مبرمجه على الطبخ
بس على فكره مدري ليه الاصرار على اني مقصره في حق زوجي بخصوص الطبخ؟؟!!
وخصوصا رد دراما بانوراما خلاني ما أسوى وكأني جيت وقلتلكم مابطبخ لزوجي أبيه يجيب كل يوم أكل من برا!!
يا جماعة ركزوا الله يخليكم فيه فرق بين لما أرفض أطبخ لزوجي وبين أني أرفض أطبخ في العزايم وخصوصا ان هذا الرفض يجي بعد عدد من العزايم مو من أول مره
ما ألومكم في ردة فعلكم يمكن لأن اسلوبي استفزازي والعنوان بعد التغيير زاد الطين بله
بس أحب أوضح لكم ان زوجي باقي ماعزم صاحبه هي مجرد فكره قالها لي.. لو انه خلاص كلم الرجال مستحيل أفشله (بس مع ذلك راح أعطيه كلمتين)
والحوار بيني وبينه ما كان بذاك السوء يعني ما تخلله رفع صوت وتجريح بالكلام (مع اني أحس انه هو اللي جرحني لما قالي ان كل شي مايهمني أهم شي تبيضين وجهي قدام الرياجيل!)
بس شسوي هذا هو الرجل وهذا تفكيره العقيم.. مهما تفتحت عقليته ومهما وصل أعلى المراتب وأخذ أعلى الشهادات يهمه الهياط قدام أخوياه ويهمه ينقال له "بيض الله وجهك ع العزيمة وكثر الله خيرك ع العشاء"
واللي قالوا اطبخي من باب اكرام الضيف.. طيب اكرام الضيف ممكن يتحقق بأكل من برا مو لازم طباخ بيت!
واذا على الأجر الحمدلله أنا من النوع اللي يطبخ ويرسل ويضيف في رمضان عشان أكسب أجر افطار صائم
بعض الردود أنصفتني اللي قالت مو لازم تطبخين لأحد غير زوجك وانه الزوجة مو آله بس كان ودي الانصاف يجي من الرجال مو بس من الحريم
طيب أنا مو ملزومه بعد أطبخ لزوجي كل يوم أشكال وألوان وأسوي (لاحظوا كل يوم) حلى مع القهوة ومالح مع الشاي ومساج له يوميا وأشاركه في المصاريف.. يحمد ربه اني شايله عنه مصاريفي ومريحته حتى من المشاوير.. السوق يمكن أطبه مره وحده في الشهر
اتركوكم الحين من عزيمة زوجي لصاحبه
الزوجة الموظفة مايحق لها ترتاح في حياتها؟ الشقا تلقاه في الدوام وفي البيت بعد؟!
يعني مافي أمل أرتاح في حياتي؟! مافي أمل ألقى أحد يهمه راحتي؟!
ممكن أحد يقول اتركي الوظيفة عشان تتفرغين.. أنا زوجي أخذني وأنا موظفة وراضي بوظيفتي ووظيفتي يمكن هي أكثر قرار سليم اتخذته في حياتي
أختم ردي هذا بتذكيركم ان اللي مزعلني أكثر هو تكرار العزائم مو "مبدأ" ان زوجي يعزم أصحابه عندي
زوجي ماشاء الله اجتماعي وكل ماتعرف على واحد عزمه يا على عشاء يا على قهوة وشاي
الظاهر اني بستقدم طباخة وقهوجية عشان أرتاح من الهم!
__________________
اللهم لا تجعل الدنيا أكبر همنا ولا مبلغ علمنا ولا إلى النار مصيرنا واجعل الجنة هي دارنا وقرارنا