قريبتي هذه ، أقارب أبوها .. معروفين بإنه ما عندهم شي اسمه حلال و حرام ..
و سمعتهم سيئة ،. و قريبات أمي كاننوا دايما يقولوا - فلانة عقلها صغير - ..

المهم ..
إنه جات فترة هي نقلت فيه من بيتها لشقة ايجار ، و عدد غرف قليلة و هم عددهم كثير ..
و أنا صدفة نقلت لبيتي - شقة تمليك - و عدد غرف أكبر و الحمد لله ..

كتبت إني نقلت ، و لما يسألوني أي شي .. كنت أرد عليهم ..
يعني ايجار و لا تمليك ؟
أقول لهم تمليك ..
طيب اسمك و لا اسم زوجك ؟
أقول لهم .. اسمي ..

و زي كذا ..

جبت ولدي الصغير في شهر ذو القعدة قبل سنة و 8 أشهر ..

و هذه قريبتي .. فجأة صارت تتصل علي كل شوي .. في الفترة هذيك ..
انقلبت معاي 180 درجة ، ماعرف ليه ؟

كنت مشغولة وقتها ، و كانت بس تتصل .. و ماني متعودة منها أي اتصال ..
و لا عمرها دقت على جوالي و لا كلمتني خاص ..

صارت ترسل لي ، أنا أحبببببببببببببك ..
كلميني ، دقي علي ، أتحجج مرات لإنها تطول ساعة كاملة و مافي أي هرجة بيني و بينها !

بس صارت تقول لي ( تصدقي إني كنت أكرهك زمان و ما أحبك ،
و دحين صرت أحبك من القروب ؟ صرت أمووووووووت فيك و إنت مرة وحدة طيبة و أنا أحبك مرة )

#. علامة تعجب كبيرة .. و أخدت كلامها بحسن نية ..

كلمتني مرة اسكايبي ، و تقول لي - افتحي فيديو و نجلس نتكلم مع بعض - ..
تحججت لها إنه الاسكايبي عندي خربان و ماعرف ايش ..

.
.

افتكر أختي الكبيرة ( هذه أختي ، و قريبتي .. مرة حبايب من زمان .. يتفقوا عالشر سبحان الله )
و كم مرة يختلفوا ، و كم مرة يرجعوا لبعض .. هي تشفي غليل أختي هذه ، لما تهرج عني ..
فأنا عادي ما يهمني .. أعرف انهم يهرجوا مع بعض عني ، بس ما اهتم ..

لإنهم مرة اختلفوا ، و كل وحدة تفضح في الثانية عندي إنه فلانة هرجت عني ..
كبرت عقلي و طنشتهم ، و كلمت قريبتي و قلت لها تلزم حدودها و ما تتدخل بيني و بين أخواتي ..
لإنه أخواتي أهم شي عندي بعد وفاة أمي و ما راح أسمح لأي وحدة تدخل و تفرق بيننا ..
و من يومها وقفت عند حدها ..

المهم أختي بحكم إنها قريبة منها ، سألتها و قلت لها : فلانة ماعرف إيش بها ؟
فجأة صارت تتقرب مني ؟ و تبغاني اكلمها بالفيديو اسكايبي ؟

أختي قالت لي ( انتبهي منها ، ترى هي ما تخاف الله و ممكن تأذيك و ممكن تتبلى عليك بأي شي ؟ )
قلت بداخلي مو للدرجة هذه ؟؟؟

لكن فعلا استغربت انقلابها ، و إلا مصررررررررة و مصممة تدخل بيتي أو نخرج أنا و هي سوا ..
و أنا لسى ما كملت 40 يوم ولادة ..

معليه الكلام منفصل ، لإني انشغل كل شوي و اخاف ولدي يلعب بالكيبورد و يقفل اللاب توب