رد: عاداتكم وقت العزاء ..
للأسف صارت منتشرة عند بعض الناس وصار فيها منافسة ما كأنه عزا
ممكن تلاقين كل شي غير الحزن على الميت والدعاء له بالمغفرة والرحمة الله المستعان
بالنسبة لنا قهوة وشاي وماء فقط وحتى يجيبوها المعزيات يعنى اهل الميت نهائيا
ما يتكلفون بشئ .. وعند الرجال يجيبون قهوجي
والاقارب طبعا يتكفلون بالغداء والعشا ...ويكون ذبايح
وكمان يرسلون لاهل الميت فطور ..او حتى الجيران يرسلونه
هذا السائد عند الاغلبية من اقاربنا ..
لكن من جد صرنا نشوف ونسمع عن مظاهر
اقرب للأحتفالية من العزاء ..ملابس خاصة .. ومكياج عزا.. وطقم عاملات بلبس موحد
ضيافة حلو ومالح واشكال السلطات والحلا مع العشا والغداء وكل يوم نوع طبخ
غير الاحاديث التافهة اللي تدور بين المعزين.. مع انواع الشاهي والقهوة
ويقولون اكرام للميت .. الا إكرام لبطونهم ..
من فترة كان عندنا عزا .. وجاء مسؤول كبير جدا للتعزية .. وقبل ما يوصل صارت حالة استنفار في البيت
شوفوا احد يضبط قهوة ..قهوة القهوجي مو مضبوطة ... هات بخور !!
طيب جاء يعزي الله يجزاه خير.. ما همه القهوة مضبوطة ولا احد يستقبله ببخور!
ليه الزحمة اللي سووها ..
وعلى انه صارت المبالغات هذي ملحوظة وتتزايد بين الناس لدرجة انتفت العبرة من الموت
فيه على الجانب الآخر وعي ووأد للمظاهر هذه ..بعضهم يخصص يوم او يومين فقط
للتعزية ويحددون وقت معين من بعد المغرب للعشاء فقط أو يكتفون بأخذ العزا في المقبرة
للرجال وللنساء بالاتصال الهاتفي.. ويرسلون أكل لاهل البيت ومايروحون ياكلون معهم
(اصنعوا للآل جعفر طعاماً ، فقد اتاهم مايشغلهم) وما يهمهم انتقاد الناس الفاضية
اللي ماهمها الا تعيش على مصايب غيرها الله المستعان ..
__________________
ما يكتبه الله لنا ألطف مما نُحب ..وأعظم مما نطلب ..وألطف مما نشاء ..
[IMG]http://im67.***********/mg87DX.gif[/IMG]
