اختي الغالية:
انتي نظرتي للموضوع من منظورك الخاص فقط ، ولكن انظري اليه من منظوره هو.

تقولي انك منقهرة لما تشوفيه يعطي اخوانه واخواته ، وانتي اولى بيها؟
ابغى افهم كيف اولى بيها؟ اذا انتي موظفة والله منعم عليكي؟ وهو قايم بأساسيات البيت في حدود الشرع..

لكن انظري لها من منظوره ، انتي انسانة موظفة وعندك راتبك ، وتطالبيه بأنه يحط كل راتبه وانتي توفري راتبك..
اكيد بيشوف انك انانية وماهمك الا نفسك.. تساعديه وتمني عليه " وليكن في علمك منّ الزوجة من اسوأ ما يعيشه الرجل ، و موشرط يكون من مباشر.. يكون بالتصرفات والتلميحات اللي يلقطها الزوج وهي طايرة"

اذا دخله ضعيف ، ومحتاج يساعد اهله ، وانتي الله فاتح عليكي ايش في داعي للمطالبة بما لا يطيقه؟..

انتي عاملة زي الغني اللي يطلب الفقير صدقة ، ويكرر عليه ترى الصدقة واجبة وانت لازم تتصدق علي انا..

بصراحة موضوعك ازعجني ، وحطيت نفسي مكانه ، اكيد عايش تحت ضغط قلة المادة ، ورفض الزوجة المساعدة..

ايش فايدة راتبك وتعبك اذا ما كان مصدر راحة لكي ولأسرتك؟..
تزوجتي رجل مادياته ضعيفة ، وانتي موظفة ، وتطالبية بتحمل كل شي بحجة انو واجبه وملزوم..
طيب هو كمان مو واجبه يتحمل غيابك عن البيت وانما تم الامر بالتراضي بينكم .. تخيلي جا ويوم وقال لك خلاص من بكرة مافي دوام .. اول شي راح يخطر في بالك وانتي قلتيها هو اخذني موظفة .. وهو كمان اخذك موظفة عشان يكون في تعاون .. اذا قررتي تتراجعي فمن حقه يتراجع عن قبول وظيفتك .. طالما انها لا تعود عليه بفائدة..

الامر الآخر ، امر الانجاب من مسببات سوء النفسية عند الرجل .. يعني ضغط مادي ، وانانية من الزوجة ، وعدم انجاب .. اظن كثيرة عليه ليتحملها ..

لذلك قرر يسوي اللي يشوفه مناسب له ..

اذا تبغي شوري .. بينك وبين نفسك .. قنني مساهمتك ولا تلتزمي بشي معين ولكن لا تلغيها .. لا تطالبيه بإلحاح ، وتابعي حالته المادية وتدخلي عند مروره بضائقة ولا تحسسيه بالمن لأنو هذا بيتكم والمحافظة عليه مسؤوليتكم جميعاً .. والمادة هي اداة للاستقرار واذا اصبحت اداة للاختلاف اصبحت مشكلة..