السلام عليكم ورحمة الله وبركاته.
صباح الرضا من رب العالمين.
وأخيراً سرب الخيال في الساحة وينك يابنت!
من لا يشكر الناس لا يشكر الله ؛ وأنا من هذا المنبر أشكرك على كل حرف كتبته لي يوم من الأيام الله يجعلك بكل حرف ملايين الحسنات ياحي ياقيوم. عزيزتي يمكن انتي ما تذكريني لكن أذكرك وحروفك كأني أسمعها منك مباشرة دخلت قلبي وأثرت فيني ليومك هذا ؛ أصلاً حافظتها بالملاحظات عندي لأني أحيان يصعب ادخل المنتدى واقعد ابحث في المواضيع ؛ سبحان الله الحين عرفت ليش تأثرت في كل حرف انكتب ؛فهمت ما تعاني منه صح انتي جالسه تتكلمين بشكل عام لكن أحس بك، حبيبتي التدخل في قرارات مصيرية وتعطيل بعض الأمور ومن بعدها التشمت كلها مرينا بها" حابه اذكر نفسي وأذكرك بعد بكلمك كاني اواسي نفسي" شفتي قلبك هذا دوسي عليه بمعنى عقلك بس خليه شغال " صح صعب لكن مع كثر الممارسة تقدرين باذن الله ؛ من صادر حريتك ومن بعدها شافك على حال وقام يتشمت به ' عادي لا تعطينه اهتمام علاقتك فيه خليها لله فقط احترامك ومعاملتك لله ' لا توضحين ولا يظهر عليك ضعفك خليك قوية لو بداخلك زجاج جالس يتهشم وتسمعين كل ذرة فيه " أحلى شي التطنيش وبردي نفسك كل شي قولي عادي عادي ؛ وانتي تحتسبين العوض من الله مو من خلقه" لا تاخذين وتعطين بكثر الكلام مع من سبب لك جرح وألمك بيوم من الأيام" لا تقولين هو السبب ما يبغى لي الخير حرمني ومن هالكلام( كلمي نفسك واسيها" قولي لو ربي كاتب لي شي بيصير غصب عن الراضي والزعلان' هم بشر ضعفاء مثلي ما لهم يد باللي جالس يصير ' ).
ابعدي نفسك عن كل واحد يحاول يأذي مشاعرك لا تسمحين له" الرسمية الرسمية الرسمية مع هذا الأشكال. تدرين ليش عشان يحسون هذا اذا كان عندهم احساس وقلب " نسأل الله أن يعافينا مما ابتلاهم.
كثري من الصحبه الصالحة عيشي معاهم ولو هم عبر مواقع التواصل انسي الي حولك " خلي مين يشوفك يتمنى يصير مثلك ، خليهم يشعرون انك مستغنية عنهم "
سبحان الله تجدين من بالخارج يحترمك وكثير منهم يفضفضون لك انهم ارتاحوا لك واثرتي بحياتهم بالخير (تجلسين بينك وبين نفسك تكتشفين انك صح وعلى صواب ونيتك زينة " لكن هم الي مختلفين عنك يعني العيب منهم مو منا والخلل فيهم "، وبعدها ترتاحين ؛ترا الكلام الي أقوله جالسه أطبقه وأشعر بلذة الحياة عكس قبل).
سبحان الله لابد ربي يسخر لك ناس بعيدين " تنتفعين وتستأنسين بهم.
وقبل كل شي صفي قلبك على من أخطاء عليك ادعي لهم بظهر التمسي لهم الأعذار " قولي مساكين يمكن كان قصدهم الخير لي ' لكن أخطاؤ الطريقة بالنهاية هم بشر لابد من الخطأ.
صدقيني مع الأيام هم بأنفسهم تلقينهم منحرجين منك وتراجعوا عن بعض القرارات ( لكن نقول لهم بيننا وبين أنفسنا بعد ايش بعد فوات الأوان لكن الله يسامحكم " لو ربي يريد الشي صار لكن قضاء الله وحكمته فوق كل قرار " والحمدلله على كل حال)..
بالأخير المعذرة على الإطالة والأسلوب الركيك" جالسه اكتب الرد و أنا أتخيل اني أتكلم معك وجه لوجه سوالف يعني. وأكرر لا تخلين شي بقلبك عليهم سامحي وأعطي وتعاملي لله ، ادري صعب لكن ادعي الله يقويك ويعوضك خير والدنيا ماشية وماحد مرتاح فيها وقضاء وحكمه جاري علينا ونحمده على كل حال.

__________________
ما نال أحدٌ من الفضلِ في مالٍ أو جاهٍ أو علمٍ شيئًا بكسب يده، لكن الأمر كله لله، يُقدّم من يشاء بفضله، ويؤخّر من يشاء بعدله.