السلام عليكم

انا احب اشوف الأمور من زاويه ثانيه لا تفكر بطريقه تقليديه لان الناس مختلفين عن بعض بشكل رهيب فوق الوصف
مشكلة البعض يحب يشوف الأمور على مسطره وحده يعني تسأل واحد من الشارع تفكيره سطحي على طول يبي يقول زوجتك تخونك ومعاك حق بالشك
بس الواقع قد يكون غير ذلك بسبب اختلافنا بس وين اللي يفهم

بعطيك توقعات وليس مبررات وقد اتفق معها وقد اختلف وقد تكون خاطئه :
بخصوص القفازات والمكياج زوجتك أصابها ضعف ايمان وهالشي جدا طبيعي ( لان الايمان يزيد وينقص ) او بسبب انفتانها بالموضه والمكياج الحديث وهالشي وارد ومن طبيعة المرأه وفطرتها تحب التزين وقد تغار من البنات وبعمرها ممكن تجاريهم
او تبي تحافظ على شبابها علشان ما تفكر تتزوج عليها كونك صغير او هي نفسها مكتئبه بسبب العمر وتبي تسلي نفسها
وقد تكون تلبس قفازات عادات وتقاليد ليس اكثر ما هو نابع من ايمانها وهالشي جدا وارد

بخصوص الجوال والرقم السري انا ما الومها ولها حق تمنعك , قد يقول البعض ما يجوز هالكلام وهذا زوجها ويحق له يعرف
الجواب الجوال ما اصبح جوال لان فيه كل شي عنك حتى احاديثك مع اصدقائك قد يشوفها زوجك والزوج او الزوجه ما يحق لهم يعرفون كل شي
الرسول عليه الصلاة والسلام لما يرجع من سفر ما يفاجئ اهله يمهد لهم ويصلي بالمسجد حتى يستعدون لاستقباله وما يشوفهم بوضع قد يكرهون يشوفهم فيه او ممكن يسبب لبس ويؤدي لسوء ظن وهالامر وارد
وامرنا الإسلام بالاستئذان حتى بين الأزواج ! مو مثل الحاصل ترفس الباب وتدخل ويقول لك من حقي بعد بكل قواة عين !!
لو رجعنا للجوال فيه كل بلاوي الانسان واسراره اللي ما يحب ان الطرف الثاني يعرفها ( وهذا من حقه فيجب احترام خصوصيته ) على سبيل المثال :
قد تكون تتكلم عنك وتشكيك لاهلها وصديقاتها سواء انت مخطئ او لا المرأه تبي تفضفض , وتخاف انك تشوف هالكلام
قد تكون فيها اسرارها الماليه وكم بحسابها وما تحب انك تعرف
قد تكون فيه صور بنات وتخاف تشوفهم
قد تكون مستشيره دكاتره عن امراض تستحي تذكرها لك
قد تكون مشاركه بقروب واتس اب مع حريم وفيه بعض المقاطع السيئه ( الحريم بينهم وبين بعض بلاوي نستحي منها الله يصلح بنات وشباب المسلمين بعضهن فاصخات وتشوفها لابسه اسود باسود )
قد تكون ادمنت على الانستجرام وغيره من برامج وما تحب انك تعرف تخاف انك تمنعها تضيف او تتابع رجال ( بغض النظر اذا كنت اتفق مع الموضوع او لا )

زوجتك تعيش تقلبات نفسيه ومفتونه بالبرامج الحديثه علشان هالسبب قالت لك ما راح اعلمك لو توصل للطلاق لان بصراحه هالبرامج تفتن وبعمرها ما هي فارقه معها تتطلق تسلي نفسها بهذي البرامج لانها ممكن تشوفك من الجيل القديم يعني تشبب اشوي

زين شنو الحل ؟
الحل صارحها وحاول تتقرب لها وقول لها لازم اشوف جوالك وشنو مخبيه عني عالاقل بعرف شنو اللي شاغلك ( من غير ذكر تفاصيل مثال تقول لك تويتر من غير ما تعطيك نكها ) بس علشان تأخذ فكره شنو اللي شاغلها
واصر لين ما تستعد نفسيا وتمسح وتاخذ هي وقتها بالأشياء اللي ما تبيك تشوفها وبعدها حاول تحط حلول معها ومنهج لتعاملكم وقول لها هالطريقه تشككني فيك وانا أصلا واثق فيك بس الشيطان وانت ما قصرتي
ولا تهددها بالطلاق لانها بحاله نفسيه ممكن تقول لك طلق وكلكم بتخسرون
والله اعلم