اختي ام يوسف وسما واختي داماس انا كمان عانيت بفترة من خجل ابني بس الفرق كان نقله من بيئة لبيئة بس كمان انا متلي متلكن بحب اتعلم من غيري واستفيد من تجارب غيري وطبعا اذا فشلت طريقة بحاول جرب بطريقة تانية
اهم نقطة عند الطفل الخجول ما نصر عليه متلو متل الولد اللي بخاف من السباحة كل ما حاولنا بالقوة دفعه عالماي كل ما زدنا الخوف عنده خلي نجذبه بطريقة غير مباشرة ويصير عنده حب المغامرة والتجربة يبدأ باول خطوة من نفسه يحاول يلمس الماي مجرد لمس
وهكذا الطفل ما لازم نطلب منه طلب مباشر او يحس حاله مجبور يحتك بالناس او يسلم عليهن هالشي بيزيد من خجله بل نشرحله اهمية السلام ونفرجيه نماذج لاخواته او لاقرباؤه كيف ببادروا بالسلام من دون التقليل من اهميته بالعكس مع المدح انو هوي مميز وهالشي بيزيد من تميزه او العلاقات الاجتماعية وفوائدها لازم نزرع عنده الفضول للتجربة ونوهمه انو تاركين له الخيار بهالشي ونعطيه مساحة لياخذ اول خطوة ونحاول ما نراقبه خليه يحس انو عم يتصرف بحرية وتلقائية لانو الخجول بعض الاحيان بيصير يراقب اذا حدا عم يراقبه
وفي نقطة مهمة في شخصيات بتختلف عن الاخرى في شخصيات عندها الجرأة وشخصيات اقل جرأة في شخصيات اجتماعية وشخصيات اقل اجتماعية وهالشي طبيعي
وما نحاول نغيره لعكس شخصيته بل نمي اشيا بنقدر نغيرها ونطورها
واللي بنوقف عنده بس نشوف كل شي زاد عن حده الطبيعي كالطفل الانطوائي او الخجل الزايد او عدم الثقة بالنفس هون لازم نتعامل مع الحالة
فابني خلق باوروبا ورجع وقت المدرسة وضعته بمدرسة ببلدي الام وطبعا شخصيته هادية وبيعمل علاقات بس محدودة بعكس اخوه الاصغر اجتماعي كتير فالمهم وقت قررت ارجع درسه باوروبا ضهر عنده الخجل بشكل واضح فصار يطلب مني اسأل الاطفال اذا بيلعب معهن بالحديقة العامة فصرت اشرحله هيدي حديقة لكل الناس وما حدا الو معك شي فيك تلعب باي شي فصار يلعب مع خيه باول فترة صرت فرجيه انو الاولاد ما بتعرف بعضها وبيتعرفوا على بعض بنفس اللحظة صار يشوه خيه يروح يسأل اذا بيلعب معهن وهني يرحبوا فيه فصرت قلو انت بطل وانت بتعرف تحكي احسن مني مع انو لغتي اقوى بس صرت اوهمه انو انا ما رح اعرف احكيهن انت اشطر مني وجرب واذا بدك روح احكيهن واذا لاء العب لوحدك ما في اي مشكلة انت جيت عالحديقة لتلعب صح فتركت عنده الفضول انو هوي حابب يلعب معهن بس بدو انا اطلب منهن هالشي ما نفذت طلبه وتركت له الحرية صار يلعب لوحده ويتفرجا عليهن وبعد فترة يتقدم خطوة ورا خطوة لصار قريب منهن وبعد فترة طلب من شخص مرة على مرة صار يتجرأ اكتر هلئ صار عنده اصحاب وصار يتعرف على اي شخص ان كان بالمدرسة او بالحدائق العامة
وكمان لازم نكون حاطين الطفل بالصورة انو الحياة فيها الصالح والطالح لانو بعض الاطفال بيكونوا عدائيين فبتعمل ردة فعل على الطفل الخجول اكثر من غير الخجول
هيدي بعض الامور عن اللي بعرفها بهالموضوع ويا ريت اي حدا عندو تجارب تفيد اكثر يحكيها لنستفيد كلنا لانو متل ما قالت الاخت مهرة اوقات بفكر الشخص اذا عندو تجربة انو هوي بس الصح وبصير اي مبتدأ لازم يتعلم من اللي قبله بالعكس المعرفة والتعلم بضل الانسان محتاجها والام بالاخص لانو في امهات جدد عندها ثقافة واطلاع افضل من تجربة ام معتقدة انو بس ارشاداتها صح بغض النظر ان كانت بتمشي على جيلها او على جيل اطفالها
ومش غلط الام تكون شايفة افعالها الخطأ صح وتكون متمسكة برأيها ولكن الخطأ انو ما تتقبل كل شي جديد بيحاول يساعدها ويساعد اطفالها

__________________





اللهم إني أستودعك ديني و نفسي وأهلي وزوجي
وأولادي وأحبتي فاحفظهم يا من لا تضيع ودائعه