شي متوقع ومو غريب والسبب ان انت ما عندك فهم لطبيعة المرأه وتعامل المرأه كأنك تعامل رجل

طبيعة المرأه تتكلم حتى لو قالت لك بالعكس انا كتومه وما اعلم احد عن مشاكلنا وهالشي طبيعي بالحريم بس اللي مو طبيعي ان زاد عن حده , في بدايات الزواج المرأه راح تتكلم مع تعليمك لها وتعلقها فيك راح تقلل من الكلام خوفا عليك وعلى سمعتها لانها خلاص رضت فيك كزوج فاللي يسيئك يسيئها وبعدين يعايرونها خواتها وصديقاتها فتتحفظ ما تسولف لهم

انت تقول انا ما ضربتها بس حطيت يدي على ذقنها ومسكت يدها ,هذي عند الحريم كبيره وزين ما قالت كان يبي يذبحني بس المشكله ان انت تشوفها من وجهة نظرك عاديه , لازم تشوفها من وجهة نظر المرأه

تقول هي تعرف تتصرف وفي بيت ابوها تقضي البيت يا اخي عند زوجها بالبدايه تحب تتدلع وتبي تحس بالأمان انها مع رجل يعرف يتصرف تبيك تعتمد على نفسك علشان هي تثق فيك , اكرر اعد النظر بالموضوع من وجهة نظر مختلفه لا تحسبها بمخك مثل الرجال تقول هذي تعرف تتصرف ومعها البطاقه المفروض تشتري من نفسها , لا تفكر بهذي الطريقه غلط

كلنا شرينا قدور واواني طبخ ومحد لمسها جديده الجيل تغير وما عاد نفس قبل
يعني لا تطلب ان زوجتك تكون من الجيل القديم وانت عايش حياتك عالاخر لازم تعرف جيلنا تعود عالخدم وحياة الرفاهيه صارت شبه ضروريه والبنات ما قامت تدخل المطبخ زي قبل
خلك مرن وغيرها بالتدريج
الخدم يساعدون امهاتنا من سنين ولا يغرك كلام الشباب يبيلك وحده تخدمك وتغسل وتطبخ وموظفه وكاشخه لك على طول وتحفظ اسرارها الرسمه اللي في بالك غير واقعيه لانها بشر مو مكينه حتى المكينه تضرب

انت كبرت الموضوع حيل ودخلت اخوها واخوها اكيد ما قصر معها مع ان المسأله كانت محلوله من البدايه

موضوعك ان شكيته للناس الغالب بيقول لك ما فيها خير وزين تسوي فيها وبالنهايه انت الخسران لين ما تكتشف ان اغلب الحريم اطباعهم متقاربه

عطها الرضاوه مثل اغلب الناس مع ان رضاوتها غير مكلفه في العاده يكون ذهب او مبلغ بحدود 10 الاف ريال وقول لها ترى ما كنت مقتنع من الرضاوه بس علشان خاطرك واني شاريك
لا تلف على نفسك بعدها تتحسر ويضيع عمرك ويمكن تقعد سنين ما تتزوج خلك مرن خصوصا انها مو سيئه

والله اعلم