أمي الله يسعدها كلمتني اليوم الصبح .. كانت طالعة واتصلت تسألني إذا محتاجة شي.

وقبل المغرب يتني البيت .. وتمت معاي حوالي ساعة .. نسولف وتلاعب اليهال.

صراحة بعد زعلتها مني أمس توقعت إنها تم ماخذة على خاطرها شوي .. بس الحمدلله ما هنت عليها.

واحنا يالسين خبرتها عن جلسة الـ PRP اللي كانت عندي من يومين .. قلت لها كمية الدم اللي سحبتها الممرضة ما كانت كافية .. والممرضة ارتبكت تقول الدم ما ينسحب كفاية! .. واضطرت تأخذ كمية أخرى من اليد الثانية!

والغريب ان مكان الإبرة ترك أثر واضح وشوي مؤلم في المكانين! .. مع انها نفس الممرضة اللي تسحب لي الدم كل مرة.

عاد ماما ما صدقت .. قالت: طبعاً ما بيكون فيج دم .. دمج نقص ما دام بالج مشغول وتفكرين وايد. <----- ظنكم فعلاً فيه علاقة؟
.
.
.
.
أخته أرسلت لي اليوم مقطع فيديو عن العفو والغفران .. ملخصه ان اللي ما يسامح تصيبه الأمراض!

وبعدها سألتني إن كنت اتصلت بالمحامي اللي طلبت منها رقمه من كم يوم.

قلت لها اني غيرت رايي .. أنا كنت ناوية أسأل عن شي يخص اليهال بعدين فكرت وقلت انه ما راح يظلم عياله في شي فماله داعي أكلم المحامي.

قالت لي: انتي بعدج مصممة على الطلاق حتى لو قال خلاص؟

قلت: هيه.

قالت: خلاص ما راح يسكّنها عندنا.

قلت: براحته .. هذه مسألة ما تخصني.

قالت: طيب انتي شو اللي بتاخذينه من الطلاق؟

قلت: مب لازم اخذ شي .. بس النصيب وصل لين هني وخلاص.

قالت: عيل ليش تهدمين حياتج وعيالج يتلتهون يوم يشوفون ان علاقتكم مب مثل قبل .. انتي تعتقدين ان ما راح يتغير عليهم شي من الطلاق؟ .. اسأليني أنا.

قلت: أنا طول الفترة اللي طافت وأنا أتجنب هالشي لأني كنت خايفة على عيالي ولأني كنت أحب اخوج ومقتنعة انه يستحق اني اصبر عليه .. بس هو ضغط عليّ بزيادة هالمرة وأنا خلاص صبري خلص.

قالت: ما عليه عطيه فرصة وما يصير الا اللي يرضيج .. بس سالفة الطلاق الله ما يرضاها مادام الريال مب مقصر عليج في شي ولا يمد يده.

قلت: انا عمري ما قلت انه مقصر .. وطول عمري أقول جدامه ومن وراه انه ما قصر معاي ولا مع اليهال .. بس السالفة مب فلوس وبس.

قالت: ادري الفلوس مب كل شي بس بعد لها دور .. طيب انتي ما تخيلتي حياتج كيف بتكون بعد ما تتطلقين؟

قلت: مب مهم .. بس أنا شايفة كيف حياتي وكيف نفسيتي الحين .. أنا نفسيتي صفر .. المهم عيالي وأنا متأكدة انه ما بيقصر عليهم .. أما أنا فربي موجود وما راح أضيع.

قالت: المشكلة انج مخليته كل شي في حياتج ومحور اهتمامج .. انتي لو تشغلين نفسج في أشياء ثانية حياتج راح تتغير.

قلت: أنا أتم بروحي ثلاث أسابيع .. عارفة شو يعني أتم بروحي؟ .. وعمري ما اشتكيت لحد من وحدتي.

قالت: بس انتي تعرفين انه يكون في الدوام.

قلت: الكلام ما منه داعي ولا راح أتوقع حد يفهمني .. إذا هو نفسه مب فاهم!

قالت: هو يبالكم الراحة والعيشة الهنية اللي هو انحرم منها .. انتي ما تعرفين كيف كانت حياته كلها دراسة ما عنده طلعات وروحات وتم جذي لين ما اشتغل وكوّن نفسه.

قلت: والحين يعوض مع الحريم؟!!!!!!!!! .. خلاص براحته يسوي اللي يباه.

قالت: بالعكس انا اشوفه دوم في البيت.

قلت: يالس في البيت بالجسم بس.

قالت: هذي غلطتج .. انتي من البداية ما واجهتيه.

قلت: الله يرضى عليج محد يشوف اللي انا اشوفه.

قالت: الله يهديج بعدين بتعرفين قيمة الزوج .. على قولة المثل ضل راجل ولا ضل حيطة .. صدقيني راح تندمين كثر شعر راسج.

قلت: انا فعلا كنت غلطانة لاني ما كنت أعرف اسوي مثل الحريم اللي يسوون مشاكل وعوار راس .. ولا كنت احب اطلع من بيتي كل شوي على زعل وهواش .. كنت مفكرة اني احافظ عليه وعلى بيتي قام يجرحني بزيادة .. ما في حرمة عاقلة تخرب بيتها بدون سبب .. على كل حال أنا مستخيرة وربي أكيد بيكتب لي الخير .. وهو الله يسهل عليه بالطريقة اللي تريحه وترضيه.

قالت: انتي الحين تخربين بيتج .. فكري عدل وشوفي حل ثاني غير الطلاق.

قلت: والله العظيم لو لاقية حل ثاني كان سويته .. بعدين هو أساساً لين الحين ما رد علي.

قالت: لأنه مب حاب فكرة الطلاق .. ما عليه انتي اصبري .. الا ما يلقى حل.

قلت: صدقيني انا ما طلبت الطلاق عشان يغير تخطيطه أو يدور على حل ثاني .. خليه يسوي اللي يباه مثل ما يحب .. بس خلاص انا الوضع هذا كله ما عاد يناسبني والأفضل اني أكون بعيد.

قالت: ما ادري شو أقول لج .. بس فكرة الطلاق احسها مب خير لج .. ومب مرتاحة منها .. احس وراها عواقب انتي مب حاسبة حسابها.

قلت: كل شي بعد الاستخارة خير فديتج .. وعشان خاطرج ما راح أشيل في خاطري عليه .. الله يسامحه ويسهل أمره.
.
.
.
بعدها سألتها إن كانت هي اللي فتحت معاه الموضوع والا هو اللي قال لها اني طالبة الطلاق .. لأنها قالت خلال الحوار انه مب حاب فكرة الطلاق .. قالت انه ما كلمها لكن الطبيعي انه ما يكون حاب الطلاق!!

__________________


اللهم طِيبَ الأثر .. وحُسْنَ الرحيل.