رد : كيف تتصرف الزوجة مع الزوج دائم الغياب؟
معالي تصدقين خطرتي على بالي البارح وقلت بنفسي وش صار عليها ؟!
معالي ..
وضعك مو سيء لهالدرجة
يعني زوجك طيب وخدوم وكريم ويحبك
بس العائق شغله وقلة اهتمامه فيك بسبب انشغاله بالعمل وساعاته المتواصله
وكذلك مشكلة عدم الاستقرار ايضاً بسبب ظروف عمله
يعني هو ماقصر من كيفه
الحياة وظروفها فرضت عليه هالعيشه
والا هو حسب كلامك عنه حسيته انسان طيب ومو حقود وهذي لحالها ميزه
ياغاليتي يامعالي راح اقسي عليك لصالحك
حسيتك عجوله تبين كل شي يجيك بسهوله
وتبين حياتك سهله ميسره بدون منغصات
وعند اول مطب تقولين خلاااااص .. ابتطلق !!
تخيلي زوجك عند اول مطب يقول لك خلاص مانصلح لبعض
والله شي يجرح اذا تمسكتي في احد وهو كل شوي جايب فكره الانسحاب والطلاق !!
ترى والله تكرهينه فيك كذا
وحرام تخسرين احد يحبك وتحبينه
عشان لحظه تهور
انا ماابرر لزوجك واكيد هو بعد لازم يحاول يحيي الحياة معك
بس انا عندي قاعده انه الشي اللي تنتظره مايجيك
لذلك .. الشي اللي تبينه انتي احصلي عليه بنفسك
واستعيني بالله وادعيه وبإذن الله تحصلين عليه
طبعاً بدون عصبيه وبدون عناد حسيت زوجك تمشي معه الكلمة اللينه من زوجه محبه
لا تنسحبين ولا تهربين
خليك قويه واجهي مشاكلك واصبري لا تكونين عجوله
قال تعالى ( وخلق الإنسان عجولا) هنا الله تعالى ينتقد الإنسان بالعجله فلا تكوني عجوله ارجوك
حتى عند الدعاء في حديث الرسول صلى الله عليه وسلم يقول ( يستجاب لأحدكم مالم يعجّل يقول دعوت فلم يستجب لي )
ودايماً نسمع العجلة من الشيطان
اولاً تريثي واهدأي واتركي العجله
وتحلي بصفة الصبر وحطي اكس كبيره على كلمة ( هروب )
وابدأي بإصلاح حياتك مع زوجك بصبر وحكمة لأني حسيت زوجك قليل حكمه
خليك انتي الحكيمه ووصلي حياتك معه لبر الأمان
وابدأي من الآن بموضوع الحمل وعالجي معه صدقيني اذا جاكم اولاد بإذن الله راح تحصلين انتي وزوجك على الاستقرار والجو الأسري
اتذكر اختي في اول زواجها دايما تشتكي انها هي وزوجها مابينهم خط مشترك وكل واحد مشغول بشغله
وتفكر بالانفصال ونصحتها امي بالصبر وقالت مع الاولاد راح يتغير كل شي وفعلا مع اول طفل ارتبطوا فيه واندمجوا وتعلقوا في بعضهم
والحين دايما نذكرها بأول زواجها وتقول الحمد لله ان امي نصحتني بالصبر
لان زوجها انسان راائع وهي بعد انسانه رائعه ربي يوفقهم وعقبالكم
بس اصبري وحاولي وراح تجنين ثمار صبرك بإذن الله تعالى وصدق عمر بن الخطاب رضي الله عنه حين قال ( وجدنا خير عيشنا بالصبر ولو ان الصبر رجلاً لكان كريماً )
وقد كان يرعى الإبل ثم اصبح امير المؤمنين بسبب الصبر
وتذكري الرسول كيف كان في بداية دعوته ؟! وشوفي الى اي مدى وصل الاسلام في نهاية حياته ؟! صلى الله عليه وسلم
ولو ان الرسول قال ياربي تعبت خلاص بنسحب ؟! تخيلي لو فعلها صلوات ربي وسلامه عليه !؟
انا لست مع ان الوحده تصبر على شي لا يطاق
ولكن حياتك ليست شيء لا يطاق !!
وزوجك ليس شخص لا يطاق !!!
ربما انتي ضقتي ذرعا وانا لا ألومك فأنتي بشر ولك طاقه محدده
ولذلك انصحك بالصبر والمحاوله
صحيح ان زوجك يعمل وقت طويل ولكن ربما شيئاً فشيئاً في المستقبل ومع الأولاد تتوفر له وظيفه افضل والله وعد ابو الاولاد بالرزق حين قال ( نحن نرزقكم واياهم )
صحيح ان زوجك يعمل ساعات طويله وقد لا تلتقيان الا وقت قصير وبذلك لا تحصلي على الاستقرار ولكن هناك حل ،
بالتأكيد زوجك لديه يوم عطله
استغليه معه بالطول والعرض وخططي لهذا اليوم من قبل وابلغيه بذلك طبعاً بأسلوب لطيف محبوب
يوم الاجازه انا وانت فقط خليني اشبع منك
وبإمكان زوجك اخذ اجازه تسافرون بها لمكان ما او تأخذون غرفه في فندق للاستجمام والبعد عن متاعب الحياة ومللها وروتينها وتجديدها
قد تقولين لا يملك المال ؟!
بإمكانك عمل هذا كمفاجأه له او النص بالنص انتي وياه
ايضاً من مواضيعك اشعر انك لا تتوددين لزوجك لا اعلم هل اصبت ام لا
لكن هكذا شعرت
ان كان كذلك يامعالي ياحبيبتي فأنتي مخطئة التودد بين الزوجين يقرب المسافات
والجفاء والاسلوب الجاف يكبر الفجوة بين الزوجين واطلبي منه اللي تبين منه حتى لو كان دلع لإسمك وعائشة رضي الله عنها طلبت من الرسول يدلعها فجعل لها كنيه
اطلبي احتياجاتك العاطفيه مافيها شي
والرسول صلى الله عليه وسلم مدح الزوجة الودود( التي تتودد ) الولود ، العؤود ( وهي التي عندما تُغضب زوجها تقول هذي يدي في يدك لا اذوق غمضاً حتى ترضى ) طبعا العؤود في حال كانت هي السبب في غضب زوجها
وليس العكس
ايضاً يامعالي لا تشعري ولو للحظه بالخجل من وضع زوجك او مادياته واذا احد من اهلك حاول يقلل من قدره افتخري فيه
وامدحيه في حضوره ايضاً
وابتعدي عن اسلوب العتاب الجاف
اول شي عددي ايجابياته وامدحي ايجابياته كلها عشان يتقبل منك السلبيات بعدها
ولا توجهين اتهامات لااا
عاتبي معاتبه احباب
ووضحي احتياجاتك وطالبي فيها
وبالنسبه للبيت بإمكانكم استئجار منزل بالتعاون بينكم ،، وكثير من الازواج يتعاونون بذلك وماتنقص ابداً من قدر الرجل ولا تقلل من قوامته ورجولته في نظرك
وايضاً عندي اقتراح يامعالي :
ليش مايفتح زوجك محل ع قده ؟! وشوي شوي يفتحها الله عليه ؟!
اعرف لك واحد غارق في الديون وتساعد هو وزوجته وفتح محل والحين الحمد لله حالته ممتازه بفضل ربي ثم وقفة زوجته معه وتخطيطها له ،
وهو موظف ووظيفته ممتازه وراتبها جيد لكنه ياخذ قروض ماخلت من راتبه الا القلة القليله لدرجة ايجار بيته ياخذه سلف تخيلي !! يعني راتبه ممتاز بس مشكلته عنده سوء اداره لأمواله وقروض فوق طاقته
ولكن وراء كل رجل عظيم امرأه
والحمد لله بفضل الله ثم زوجته اصبحت حالته ممتازه وظيفته والمحل
ولكن زوجك اذا توفق في المحل يقدر يترك وظيفته ،،
مجرد اقتراح
نصيحتي لك ،،
لااا للهروب
نعم للمواجهه والإصلاح
طبعا بلطف
ماكان الرفق في شيء الا زانه ومانزع من شيء الا شانه
وان الله ليعطي على الرفق مالا يعطي على الشده
واصبري على رسم معالم وخطوط حياتك فكري في شيء وحاولي الحل ولا تنسحبي واصبري اصبري اصبري
قال صلى الله عليه وسلم يوم قال: ((ومن يتصبر يصبره الله، وما أعطي أحدٌ عطاءً أعظم ولا أوسع من الصبر))
لاتنال الأمور إلا بالصـــبر
من صــبر ظفر
ومن يتهيب صعود الجبال
يعش أبد الدهر بين الحفر
توكلي على الله ومن توكل على الله كفاه
وعسى ربي يرزقكم بالمال والبنون وتعيشون في هناء وسعادة وترون مع بعضكم واولادكم زهرة الحياة الدنيا ،،
__________________
nh