تعرضت لحادث كان سببا لطلاق زوجتي وأنوي الزواج مرة أخرى ( مستجدات 31 & 35)
السلام عليكم
ان شاء الله تكونون بأتم الصحه والعافيه ..
لي فتره اقرأ بهالمنتدى واليوم سجلت عشان اشارككم قصتي
انا تزوجت وعمري 24
ولو اهلي عطوني وجه قبلها كان تزوجت وعمري 20
استمرت الملكه تقريباً سنه وعليها واذكر وقتها زوجتي كانت كل حياتي
بعد زواجي بثلاث شهور صار لي حادث غير حياتي كلها
دخلت بعدها بغيبوبه عدة ايام وصحيت وانا ما اقدر احرك الجزء الاسفل من جسمي ولا احس فيه
بعد تمهيدات قالوا لي اهلي ان الأصابه بالظهر
قبل انتهي من علاجي واطلع من المستشفى جاتني الطامه
اعلان للمحكمه بجلستي لأن زوجتي طالبه الطلاق
طلبت من اخوي يكلم اهلها
كلمهم ورد علي بأنهم طالبين الطلاق وان بنتهم صغيره وقدامها الحياه ومايبغونها تعيش مع معاق
واظنه وقتها اللي اخفاه علي من كلامهم اكثر من اللي قاله
جا ببالي شكلي وانا بالمقعد واواجه زوجتي واهلها ونظرة الشفقه من القاضي
فطلقتها قبل المحكمه .. واهلي أيدو قراري وقتها
ودخلت بمرحلة يأس وأكتآب والألم النفسي كان اكبر من الألم الجسدي
خرجت للعلاج بالخارج بعد سلسله من العمليات والعلاج الطبيعي لمدة سنتين
من الله علي بالصحه والعافيه ورجعت امشي
تغيرت مشيتي وفقدت وزني
لكن الحمد لله رجعت امشي اعتمد على نفسي
رجعت لأهلي اشاركهم فرحتهم فيني
قالت لي اختي ان طليقتي قالت لها ان الطلاق ماكان طلبها وان اهلها اجبروها
حلفت اختي انها تقول لها اني ما اتشرف يكون عندي عيال اهلها اخوالهم
وانا فعلاً وقتها لو عصرت مخي احاول اتذكر ذكرى حلوه لنا ماتذكرت الا بشاعة موقفها هي واهلها
محد قرب من اهلها بسبب موقفهم معاي وانا والله ما اتشمت الله يرزقها باللي احسن مني
لكن لو وقتها وقفت معاي يمكن كان خففت عني نص اللي عانيته
سجلت دراسات عليا بنفس الدوله اللي كنت اتعالج فيها .. واكملت دراستي
قبل حوالي 5 سنوات عرفت وحده جماعتنا
انسانه مندفعه للحياه .. نشيطه .. حيويه .. ابتسامتها ماتفارق فمها .. غير تقليديه .. طموحه .. حنونه .. تجمعنا مبادئ كثيره ..
ما أذكر لها عيوب .. او كنت اشوف عيوبها و اتحالاها
بعد ماعرفتها بشهور تم قبولي لأكمال الدكتوراه
فخيرتها اما ان نتزوج قبل أبدأ او نأجل لبعد ما اخلص
كانت وقتها مخلصه تقريباً ثلاث مستويات بالجامعه فرفضت تترك جامعتها ووتزوج هالوقت
ابديت اعجابي بقرارها وشجعتها
وسافرت
انشغلت بالتحضير للدكتوراه ومانزلت للسعوديه خلال ال4 سنوات الا مرتين فقط
ماكان عندي خيار لأن اي تقصير لو بسيط مني كان بيهدم تعبي كله
هي خلصت الجامعه وتوظفت بعدها بفتره قالت لي انها انخطبت وان اهلها ضاغطين عليها
حجزت ورجعت .. خبت علي ان الموضوع وصل للنظره الشرعيه
فار دمي ماشفت قدامي الا نفس الانسانه اللي خذلتني اول مره
خاصمتها ومابقيت كلمه بشعه ماقلتها لها
بعد فتره عرفت ان زواجها ماتم وماسألت عن السبب
حصلت على الدكتوراه من سنه ورجعت السعوديه وتوظفت
بكمل ال35 لا زوجه ولا ابناء ولا استقرار
اخواني واخواتي واصحابي كلهم تزوجو كل واحد مشغول بحياته
ودي ارجع اخطب البنت اللي كنت ابغاها لأنني للحين احبها لكني احس للحين شايل عليها
اعترف اني ابطيت عليها لكن برضو هي كانت تقدر ترفض
عندي هاجس اني اكون عقيم بسبب الحادث القديم
طبعاً رحت اكثر من دكتور وقالوا لي وضعك سليم
لكن برضو افكر بهالموضوع كثير
تم تعديل العنوان ليتناسب مع مضمون الموضوع
التعديل الأخير تم بواسطة تلميذ الحياة ; 20-05-2014 الساعة 10:46 PM