. المعذرة تاخرت في الرجعة لموضوعك لكن هالايام انا على سفر عمل .. ووقت فراغي محدود وبعيد عن البيت .. واريحية دخول الشبكة/ الـ"نت" كذلك محدودة ارجو ما تكون راودتك الافكار .. انه مثلا، لسبب او لاخر، نفسي انسدت عن موضوعك .. واني تركتك .. وتخليت عن الرغبة في مساعدتك لا .. لا .. لا، .. ان شاء الله لن يحصل فاذا على طول كتابتك، فـ بالعكس .. جدا انسجمت واستمتعت بقراتها لدرجة على ظاهر طولها، لكن ما بدات في قراتها .. الا وتفاجات، انا نفسي، باني انهيتها فـ اهنيك، .. كتابتك جميلة اخت/ حياة، .. واذا سمحتي لي اناديك بـ هالاسم، فشعوري .. وانطباعي.. اذا انتي حابة وجادة في انك تحلي امور حياتك ومشاكلها فـ براي، .. اول شئ .. لازم تشيلي من قلبك اي مشاعر سلبية تجاه الماضي ومن فيه .. ، اي مشاعر غضب، .. حقد، .. كره لان هالامور، .. بقاءها انما حيكبلك ويقيدك ويصعب عليك .. الخروج من الماضي ويعيق انتقالك لصفحة جديدة .. تبداي سطورها بحروف مشرقة ومتفائلة وباذن الله، لمستقبل واعد وناجح فـ .. ضعي الماضي بسلبياته مؤقتا على جنب واقول مؤقتا، لان رجوعك لها حيكون انما لغرض .. الاستفادة بالتعلم من دروسها وكيفية التعامل معها ايجابيا لصالحك وعدم اعطاءها فرصة لان تؤثر عليك سلبا مجددا لان، .. ماما وبابا حيبقوا ماما وبابا لكن لازم تنظري لوجودهم وموقعهم في حياتك .. نظرة ايجابية من حكمة الله سبحانه وتعالى في خلقه ان .. ما جعل في شئ سلبيات، الا وفي المقابل وضع فيه ايجابيات السكين ممكن تجرحك، .. وممكن تسهل كثير حياتك بالمطبخ المسدس ممكن يكون اداة جريمة، .. وممكن ينقذك من هجوم اسد عليك الظلام ممكن يعيق رؤيتك، .. وممكن يوفر لك السكون والهدوء اللازم .. عشان ترتاحي وتنامي نوم هانئ يحتاجهم عقلك وجسدك العبرة، .. هي في .. قدرتك على تحديد الايجابيات .. وتسخيرها لمصلحتك وما تخلي السلبيات .. تؤثر عليك واقولك قراتي لموضوع ماما وبابا، .. اول شئ .. هم يحبوك، .. ويحبوك كتير فحبهم .. خلاهم يخافوا عليك كثير .. ويحموك بزيادة ولـ هالسبب، يحاولوا يبعدوك عن العلم الخارجي بقدر ما استطاعوا لان بنظرهم .. العالم الخارجي غابة مليئة بالوحوش فيبغوك بامان قدام عيونهم .. ولا ينشغل بالهم عليك .. وبكرة يحزنوا ويتندموا، الله يبعد عنك، لو صابك مكروه هالحماية الزايدة .. اللي مو عارفين كيف يتعاملوا معاها .. من غير ما يؤثروا عليك .. وعلى مستقبلك ممكن يكون سببها .. محدودية ثقافتهم ومعرفتهم في .. التعامل مع حياة اليوم والمستجدات فيها اللي تغيرت عليهم .. وعن الحياة اللي هم عاشوها بزمانهم موضوع الشاب اللي اعجبتي فيه لمجرد نظرة .. وانتي عمرك 17 سنة وهالنظرة - الـ"ريموت كنترول" اللي استمر عليها حب "عن بعد" لسنين هي تجربة انتي فيها زيك زي، زي العالم كلها يا "حياة" في فترة اسمها .. المراهقة انتي ممكن تشوفي فستان او عقد مجوهرات يعجبك وتجني على جماله وممكن تعيشي طول اليوم والسنين في احلام يقظة .. قد ايش حتكوني مبسوطة وفي قصص خيالة من لذة المتعة والسعادة .. وانتي لابسه هالفستان او عقد المجوهرات لكن لما تحاولي تتحصلي عليهم .. وتعرفي سعرهم، تصحي على نفسك .. وبعقلك وفهمك، حتقولي لاء .. هدول ما ينفعوا لي، .. هدول مو مناسبين لي هذا يا"حياة" .. ما اسمه حب مو هذا الحب اللي يحصل بين قلبين .. وبين رجل وامراة شوفك لما لحقتي خلال فترة قصيرة .. تعرفي من يكون هالشاب، .. الا وانصدمتي ومو بس كرهتيه، .. وانما كرهتي كل الرجال لكن اسمحي لي، .. انتي غلطانة .. انك عممتي تجربة .. وحادثة .. بنيت اساسا على مفهوم .. وارضية غير صحيحين على عموم موقفك بعدها .. من كل الرجال فـ .. حتى في هالجانب .. انتي بحاجة لتصحيح موقفك اكتفي بـ هالقدر اليوم واذا الله كتب لي، .. حتجدني .. رجعت هنا المهم الان يا "حياة" .. اذا انتي جادة .. وحريصة على الخروج مما انتي فيه لازم تتطوي الماضي .. بجروحه، بالامه، بالغل والشحن اللي فيك تجاهه لان هذا حيعيق قدرةك على النظر والتفكير بطريقة صحيحة ونصحيتي، الجزء الاول والاساسي في الحل .. انك تتقربي اكثر من الله سبحانه وتعالى .. وتلجئي اليه لان يهديك .. لان تتخلصي من سلبيات وتاثير الماضي عليك وللتصرف الصحيح .. ويوفقك ويقويك وييسر امرك ويعينك يقول سبحانه وتعالى، .. "وَمَن يَتَّقِ اللَّهَ يَجْعَل لَّهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ وَمَن يَتَوَكَّلْ عَلَى اللَّهِ فَهُوَ حَسْبُهُ" وفي موضع اخر .. يقول تبارك وتعالى، .. "وَمَنْ أَعْرَضَ عَنْ ذِكْرِي فَإِنَّ لَهُ مَعِيشَةً ضَنكًا" اسال المولى تبارك وتعالى .. ان يهديك .. ويوفقك .. ويبدل كربك ومعاناتك الى نعيم ورضى في الدنيا والاخرة ، تحية عطرة .