ربي يعينك ويسهل امرك .،
بجد الالم الكبر انك حامل الله يعينك ويقومك بالسلامه

اختي باين ان زوجك انسان معجب بامه كثيرا ولاتلومينه بالنسبه له هي المثال الصح اذا قالتله زوجتك فيها وفيها راح يقتنع لانه متاكد ان عندها الخبره وغير كذا امه اولا واخيرا
حتي لو الشي اللي قالته ماكان فيك بتاتا تبقى هي امه واي كلمه منها راح يقتنع فيها

عزيزتي .. بحق ضرفك صعب بس اذا انتي قررتي انك تبذلين مجهود عشان تستقر حياتك ويستقرون ابنائك فرب العالمين ماراح يضيع لك تعب
أكسبي امه شوفي ايش اللي يعجبها وتمدحه في النساء ووحاولي تتطبعين فيه
امدحي تربيتها وزي ماقالوا الاعضاء اجلسي معها جلسه اشرحيلها وضعك بلطف
قوليلها انا ادري ياخاله ان اللي يسويه هالايام ابنك مو تربيتك ابدا متغير كثير
ودايم احس اني سعيده بوجود حماه مثلك .
واتمنى اكون مثلك يوم
خبريها ان نفسك ابناءك يعيشون وسط هالبيت وانها تكون حواليكم عشان تكون لها يد في تربيتهم
امدحي في طباعها ومواقفها معك حاولي تتذكرين مواقف كانت اصيله معك فيها علميها ان خبرتك كام ماراح تتقارن فيها وانك تتعلمين وراح تتعلمين منها كثير
اساليها كيف تكسبين ولدها وايش الطباع اللي مايحبها خليها تحس انك فعلا رغبانه ان هالبيت يسعد بكل اطرافه
قوليلها اذا انتي ضايقتيها بيوم بدون ماتقصدين واستسمحي منها وانك تشوفينها زي امك
وابدي كوني ايجابيه معها حاولي تحبينها بداخلك عشان يضهر عليك ويصير الكلام من القلب للقلب
وتذكري دايم ان بر ابنها فيها هذا شي يصب في مصلحتك راح تضمنين باذن الله بر ابنائك فيك
صدقيني الرجل اللي يبر في امه الابواب تنفتح له من كل مكان والتوفيق يحالفه بسبب هالبر
زوجك يمكن يكون انسان يقدس افكار امه وبمجرد ماتمشين مع افكارها راح تلاقين التقدير منه
احتسبي الاجر لما تحاولين تكسبين امه وسوي اللي نفسك تسوي لك اياه مرت ابنك بعد عمر
قوليلها عن ضرفك وعن تعب حملك وعدم تقدير ابنها لهالشي قوليلها انا ام ياخاله و بشر ومالي احد غير الله ثم ابنك ليش يكسب اثام بهالمعامله فيني انتي ام وغير كذا قلبك كبير وتدرين ان مالي احد الاهو ومن هالكلام

صدقيني اذا هي انسانه طيبه راح تمشي امورك واذا زوجك طلع فعلا من الرجال اللي امهم بالنسبه لهم الاولويه الوحيده فهذا شي جدا جيد معناه متى ماكسبتي امه فانتي كسبتيه كله ..

زوجك زي ماتقولين انه يكلمك بالواتس اب حسسيه انك بخير وعايشه بسعاده وانك مو بحاجته اساليه عن حاله ولاتطولين معه السواليف ..
قوليله ماابغا اشغلك انتبه لنفسك .. حسسيه باستغنائك عنه مو زعلا لا باعتمادك على نفسك . باين ان احتياجك له شي مايأثر فيه
خلي حالاتك بالواتس سعاده وصورك شرحه
مع ان للحين ماوضحت فكره كيف انه مو مبالي وكلامك معه واسلوبك كيف بس باين ان زوجك انسان اتكالي ولامبالي ابدا واسلوب التشكي يخليه معدوم الاحساس اكثر ..

اذا حسيتي ان محاولاتك مالقت قلب من هالاثنين يحتويها
احتسبي اجرك لرب العالمين دامك حاولتي بكره ماراح تندمين
انتبهي لنفسك انسي هالزوج وكل مايتعلق فيه .. حاولي توفرين لنفسك حياه رغيده انتي حامل والزم ماعليك نفسك
اهتمي بصحتك ونفسيتك واذا كان التفكير بزوجك شي يتعبك فأجلي التفكير لين ترجع لك صحتك وتكونين بكامل قواك وتعرفين تتعاملين مع الموقف
واذا كنتي قادره تفتحين بيت بالاجره .. معناته انك انسانه معتمده على نفسك ماشاء الله عليك
فباين الله راح تقدرين تمشين امورك هالايام .
تذكري دايم ان معك اغلا نعمه معك اطفال هالجواهر اللي معك اللي تعوضك عن الدنيا ومافيها
تحملي مسؤوليتهم بقلب الام الكبير اللي معك

ربي ييسر ولادتك ويسخر لك زوجك وابناءك
هذا مجرد راي وبالاخير انتي ادرى بزوجك وبالاستشاره المناسبه لك ❤
ربي يوفقك ويسهل امرك ويصلح بينك وبينه.. قلوبنا معك ❤ وطمنينا عنك ..