أول شئ الواحد يتوكل على الله في كل شئ فهو الرازق والمدبر لكل شئ ثانيا اهم شئ القناعه والتخطيط السليم لأمور حياتنا وعلينا ان ننظر للي هم أقل منا بالنسبه للماديات والمصاريف وما نناظر لطبقات إللي هي ماديتها وصرفها اعلى منا ومانقلدهم بهذا الشئ ابد لأنه لو أستمرينا نشتري ونغير ونسافر مثل فلان وفلان ماراح نستفيد شئ غير الفقر والديون فالواحد منا يمد لحافه على قد رجوله ويخطط ويفكر ويتوكل على الله في كل اموره مو بالضروري يكون الواحد معتمد على مصدر دخل واحد اللي هي الوظيفه والراتب لابد من إن الواحد يشوف له مشروع صغير يبتدي فيه على قده فيه مشاريع كثيره ودخلها طيب وفيه الخير والبركه للي يبغى يشتغل ويعمل بجهد اهم شئ إن الواحد يخلص النيه ويشتغل الشغل مو عيب ابد اول ماتزوجنا انا وزوجي كان راتبه 3000 آلاف ريال وبعد الزواج زوده على راتبه 500 ريال وكان عليه اقساط سياره اخذها لإتمام الزواج مع التحويشه اللي كان مجمعها من راتبه وتزوجنا والحمدالله عقب فتره سدد ديونه وتحسن الوضع شوي وسافرت معاه لمنطقة عمله واستأجر لنا شقه وسكنا فيها وكان راتبه 3500 ريال وعقبها جاته ترقيه وتحسن وضعه شوي ونزلت له بدلات وصار راتبه حول 6000 الاف ريال وكمان هو كان يسشتغل خارج عمله اشتغل بمعارض سيارات وفي بيع وشراء اغنام وكان عنده سياره اجره يشتغل عليها في المنطقه وكان كل ماطفش من شغله راح لثانيه والحمدالله الأمور تحسنت ووضعنا كان احسن رغم إنه اول ما سافرت معاه عفش البيت االي اخذناه مستخدم وما اخذنا إلا الضروريات فقط كانت كثير اشياء ناقصتنا والسياره ماكانت عندنا سياره كنا ناخذ سيارة زميله جارنا لو عندنا موعد مهم لمستشفى او اي مكان ونخلص مشوارنا وحتى العفش اللي اشتراه لنا مستخدم ومتسلف قيمته سلف والحمدالله الله فرجها وسددنا الدين اللي علينا واخذنا لنا سياره وشرينا الأشياء اللي كانت ناقصة علينا وعقب ماتحسن وضعنا للأفضل غيرنا كل شئ جديد بالبيت بالتدريج والراتب كل ما جاء له تحسن اكثر والحمدالله رب العالمين الله بارك لنا في مارزقنا وصار وضعنا افضل بكثير وسبحان الله كل ماتضاعف عدد افراد الأسره كل ماربنا بارك لنا وزاد راتبه أكثر وتضاعف راتبه حتى وصل الحين ثلاثة اضعاف راتبه الأول والحمدالله والشكر الله يحفظها نعمة من الزوال يارب ويرزق كل مسلم يارب

ممكن إنه الوقت ماكان مثل هالوقت طبعا كان إيجار البيت اللي مستأجرينه ذاك الوقت 800 ريال وكان الأسعار مو بمثل هالوقت يعني 500 ريال تقضي للمطبخ من كل شئ والذبيحه كانت اغلى شئ مايتعدى 500ريال اذكر كنا نشري الخروف 250 ريال ونشوفه غالي بعد الأضاحي كانت على 400 و300مئة ريال قبل و طبعا ماكان فيه جوالات اوخدمات انترنت كان افخم بيت اهله مريشين شوي تلاقي عندهم تلفون بالبيت او تقدم على الإتصالات تبغى تلفون تجلس رقمك بالسرى سنين مثل خدمة الصندوق العقاري بوقتنا الحاضر و تجلس سنين وانت تنتظر السرى توصل رقمك وماصار عندنا تلفون إلا جارنا هذا الوحيد اللي بشارعنا عنده تلفون جاه نقل لمنطقه ثانيه وعرض خط التلفون للبيع واشتريناه منه بواسطه بمبلغ 5000 ريال وتنازل بالرقم بإسم زوجي وصار عندنا تلفون يعني الأسعار في المواد الإستهلاكيه قبل كانت مناسبة للكل اما في الوقت الحاضر الصراحه كل شئ نار والرواتب صارت ماتغطي بالذات اللي راتبه اقل من 5000 الآف ريال والكارثه لو ماعنده بيت ملك يتبهذل في الإيجارات لاكن اللي راتبه من 6000 الاف فما فوق يصرف عمره اول شئ البنوك يبعد عنها ما اكلت رواتب الشباب إلا القروض والأقساط طبعا مو مجبور إنك تركب سياره آخر موديل او تسكن بيت ديلوكس جديد او تشتري اجهزة من أفخم الأشياء سياره قيمتها عشرين الف تكفيك إلين تضبط امورك وحتى اقل من هالقيمه تلاقي سياره البيت مو ضروري حي راقي او عماره جديده تسكنها لأن كل ماكان الحي جديد والعماره السكنيه جديده كل ماكان سعرها غالي يبالغون بالأسعار في بعض الأحياء بالذات الجديدة والمشكله بعضها غير مكتمله بنيتها التحتيه من مواصلات مياه وصرف صحي تلاقيك لما تسكنها تتحمل فاتوره أخرى تكلفك مبلغ وقدره فالأفضل تشوف لك حي عمره متوسط وتستأجر لك بيت على قد فلوسك اهم شئ يسترك أنت وأسرتك وتحط جدول لميزانيتك وتحط لك شئ من راتبك لوقت الطوارئ يعني لزنقات وقت الحاجه واهم شئ الواحد يقضي للبيت شهريا من المستودعات اللي تبيع بالجمله يا خذ الأشياء الضروريه للمطبخ ويتجنب السحب من البقالات والمحلات الصغيره لآخر الشهر يحط له مبلغ للأشياء اللي مانقدر نخزنها في المطبخ مثل اللبن والخبز وماشابه ذلك يشتريها كاش اما إن الواحد يتورط بأقساط بنوك وسياره وإيجار بيت وفواتير إتصالات وكهرباء ومويه وبقاله ومستلزمات اخرى للعائله والبيت وكلها لآخر الشهر وراتبه مايغطي شئ أكيد ماراح يجمع شئ خصوصا لو كان الواحد لايجيد التصرف الحكيم والتفكير السليم يعني من اللي يمشون امورهم على البركه بدون تفكير او تخطيط فهذا لن ينجح حتى لو بلغ راتبه 20000 الف ريال وانا شخصيا اعرف إمرأه متزوجه وعندها 7 ابناء وبنات وراتب زوجها تقريبا 25000 ريال وكان يسكن في إسكان تابع لمقر عمله وكان مسلمينه الإداره سياره خاصه وسبحان الله رغم إنه يسكن بدون إيجار والسياره تابعه لمقر عمله وراتبه كبير ماشاء الله تبارك إلا إنه يشهد الله على حسب كلام زوجته تقاعد وهو مديون ولا عنده ولا سياره خاصه له ملكه وما عندهم بيت ملك وطبعا كل اللي يعرفونه ونحن من ضمنهم نعلم ذلك وتقاعد من عمله وهو مديون واستلم مكافاة نهاية الخدمه وسدد نصها اهل الديون والبنوك تطلبه فلوس والنص الثاني زوجته بشق الأنفس انتزعته منه بمشاكل واشترت لعيالها بيت وكمان باقي تقسط جزء من قيمة البيت للبنك طبعا سافروا لمنطقة ثانيه واشتروا فيها البيت والديانه لحقوا زوجها اللي باقي يطلبونه فلوسهم واشتكوه وسجنوه والله حضه بفاعل خير سدد عنه ديونه عقب سنه وطلع من السجن سبحان الله وهناك على النقيض الآخر شخص نعرفه يشتغل في بيع الخضره عنده محل خضار وفاتح بيت ويصرف على بيته وبيت اهله واشترى بيتين واحد ساكن فيه والثاني مأجره والله رازقه وفاتح عليه ومعطيه بس ماشاء الله عليه هو وزوجته كلهم مايحطون قرش إلا بمكانه الصحيح واخيرا اولاد اخواني توهم متوظفين واحد منهم تزوج توه راتبه بحدود 6500 ريال والثاني عرسه بعيد الاضحى إن شاء الله وراتبه بحدود 5000 ريال والثالث بيملك الحين وراتبه بحدود 4000 وفوقها شوي طبعا في هذا الوقت الواحد لابد من إنه يحصن نفسه بالزواج ويتوكل على الله بالرزق مادام إنه سعى لإعفاف نفسه الواحد بالحلال في زمن كثرت فيه الفتن والمعاصي فربنا بيكون معاه وفي عونه بإذن الله وراح يبارك له ويرزقه من حيث لايحتسب اهم شئ غنه يسلك الطريق الصحيح والسليم طبعا الشباب لما يتزوج وهو عمره في العشرينات شئ طيب وجميل لأنه هالشيئ بينعكس عليه بشكل إيجابي في المستقبل منها إنه يحفظ نفسه من دروب المهالك ويشغل نفسه في زوجته وبيته واطفاله وكمان على المدى البعيد يكون هناك تقارب بينه وبين ابنائه في الفكر وفي التعامل يعني يفهمون عليه ويفهم عليهم لتقارب اعمارهم مثلا الاب في الاربعينات والشاب في العشرينات تلاقيهم مثل الإخوان متفاهمين وكل واحد فيهم قريب من الثاني في كل شئ اما الإبن يكون في 20 والاب في 60 او 70 حتى تصعب عليك تربيته وفهمه في التفكير فيكون هناك تصادم بينهم في الكثير من وجهات النظر وبيختلفون على كثير من الأمور كلن منهم يشوفها من وجهة نظره هي الاصح طبعا اعتذر منكم اطلت وصارت محاضره مو مشاركه واشكر الاخ الفاضل صاحب الموضوع على موضوعه الجميل والمهم لنا جميعا وبارك الله فيه ورزقه الله من واسع فضله ومن حيث لايحتسب اللهم آمين يارب.

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله