رد : هل الجن يسرقون
فردوس ياخيتي انتي عارفة الحين إجازة وعطلة وفيها مناسبات وشكل الجماعة ناقصتهم أغراض لأعراسهم ومالقيوا إلا بيتكم يكملون منه نواقصهم من لبس وتجهيزات وخلافه يعني ماراح فكرك إلا للبقالات وين راحت محلات الفساتين والإكسسوارت والعطور صدقيني عندهم مناسبة والجماعة محتاجين والبنوك ما اعطتهم قروض فدبروا حالهم بالموجود ههههه شوفي انا شخصيا ما اقتنع انه الجن تسرق الفلوس واشوف انه مستحيل الشئ هذا يصير يابنت الحلال والله إني اجمع جمعية انا والبنات صديقاتي وجاراتي بمبلغ مايقل عن اربعين الف ريال ومافوق واستلمها واحيان تطول عندي قبل لا اوزعها بين المشتركات بحكم إني رئيستهم بالجمعية والله إني اشيلها بربطتها واحطها في مكتبة التلفزيون في المجلس اللي نجلس فيه ارميها كذا فوق المكتبة واتركها وكلنا في البيت انا وزوجي وعيالي والحمدالله لي تقريبا 15 سنة ما عمري افتقدت منها ريال الفلوس ياحبيبتي ما تاخذها إلا يدين فتشي حولك وحواليك وراح تلاقين السارق او إنك تتركينها بمكان وتنسينها تذكري زين احيان الواحد يحط غرضه بمكان ومع الزحمه والشغل ينسى وين حط اغراضه ولا مثل ماقالوا لك الأخ الفاضل رجل الرجال والأخت الغالية مفارق حطي كاميرا ولاعندي لك حل حطي مع الفلوس حبر او علميها بعلامات انتي تعرفينها وخلي اللي بمحفظتك فكة كلها وخلي معاك 500 ريال جمله وبعد ما تتأكدين ان فلوسك ناقصة قولي عندي 500ريال جمله وانا ابي فلوس فكه من عنده فلوس فكه وياخذ ال 500ريال عنده الين يصرفها ويرجع لي الباقي بس ضروري الحين ابغى فلوس فكه عاد اللي يجيب لك الفكة من اهل البيت تفحصيها وقلبيها زين وكما ن الحبر او العطر لما ترشينه بالفلوس يعطيك دليل بالرائحة وباللون
عاد بذكر لك قصة قرئتها مرة في كتاب بس بطول عليك بس بقولها واللي عنده وقت يقرأ يتفضل المهم واحد كان مسافر وعنده فلوس دنانير ذهب ونزل في قوم يعني جماعة وبات عندهم عند شيخهم والشيخ هذا ذكي وعنده رعاة وناس مقيمين في داره وانسرقت فلوس الرجل الضيف اللي نزل عند الشيخ وهو نائم ولما صحى بيصلي الفجر استفقد فلوسه وراح صلى وقال لشيخ طال عمرك انا انسرقت فلوسي وماعلمت من السارق المهم الشيخ طمأنه وقال له انت عندي ضيف واليلة بعون الله صلاة العشاء إلا ومالك عندك المهم جمع الناس اللي عنده عقب صلاة المغرب وقال لهم ضيفنا انسرق ماله ونبغى نعرف من السارق ونرد له ماله وبعد صلاة العشاء نبغى نطلع السارق المهم بعد صلاة العشاء جمع الناس اللي عنده وكلهم حضروا علشان مايشتبه في احد منهم والشيخ هذا اعزكم الله عنده حمار وكان يوليه اهتمام ورعاية المهم نصب خيمة مغلقة ولها باب وادخل فيها الحمار وطلع لناس المتجمعين وقال لهم الحمار هو اللي بيفضح السارق وهذا حماري صادق ومايكذب والحين تدخلون كل واحد ورى الثاني ويمسك بذيل الحمار ولو نهق الحمار فمعناته انه هذا هو السارق اللي سرق مال الضيف المهم دخلوا للحمار كل واحد ورى الثاني ومسكوا ذيل الحمار وطلعوا كل واحد على حده دخلوا والحمار ماصاح والناس تنتظر النتيجة وبعد ما خلصوا اللي دخلوا للحمار ومسكوا بذيله صفهم الشيخ وهم مستغربين ليش الحمار ماطلع السارق على حسب كلام الشيخ المهم قال الشيخ الحين انا اطلع لكم السارق ومشى عليهم فردا فردا ويشم في يدينهم الين وصل لواحد منهم وشم يدينه وقال له انت السارق استغربوا الناس كيف عرفته انه هو السارق ياشيخ قال لهم إنه حط شئ في ذيل الحمار له رائحه تترك اثر الريحه باليدين وهو شمها في يدين الكل من اللي دخلوا إلا هذا الشخص وعرف الشيخ إنه لما دخل السارق للخيمه ما لمس ذيل الحمار علشان كان خايف إنه لو مسك ذيل الحمار راح الحمار ينهق ويفضحه ويطلع هو الحرامي فلما دخل للخيمة دخل وطلع بدون مايقرب من ذيل الحمار والشيخ ما شم الريحة في يدينه اللي تركها على ذيل الحمار فعرف من هو السارق واعترف الحرامي بالسرقة ورجع الفلوس لضيف
عاد معليش طولت عليكم وانتي يافردوس تقدرين تسوين مثل الشيخ بس جيبي لك خروف عنده قرون واربطيه بأحد الغرف وحطي بقرونه بصل او ثوم بدون ما احد يحس وقفلي عليه الغرفه وقولي للي في البيت الخروف بيطلع السارق اللي يسرق فلوسنا كل واحد فينا يدخل ويقفل على نفسه ويمسك بقرون الخروف وإن صاح معناته هو الحرامي وإن ماصاح معناته إنه براءة بس جيبي لك خروف هادي ورايق مو يقلب عليك البيت صياح لو مانفعت معاك الخطة اعطيك غيرها وجربيها وان شاء الله تنفع وتستردين فلوسك انتي وامك
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله