رد : انا وزوجي واهل زوجي اين الخلل
هنا ابي ارد باللهجه العامه !
ابي اتكلم بعفويه ، يكون الكلام ابلغ !
ياختي شيلي معرفك من الموضوع
وحطي معرفي واصير انا ههههه
ثلثين الموضوع عشته للأسف !
خصوصا سالفة قلنا لها وهي ماتبي تجي !!!
وانا على الله مادريت لا عن عشا ولا عن عزومه ولاشي
هذا الشي استمر سنوات ! معي !
غير الكلام الطالع نازل اللي يتكلمون علي عند ضيوفهم
قسم بالله مدري شلون يفكرون !
انا لو بكره زوجت اولادي حتى لو زوجة واحد منهم غلطانه
والله استحي اتكلم فيها عند الخلايق لأن اللي يمسها يمس ولدي !
ويمسني !
ويكرم المرء في زوجه وبنيه
وانا بنت عمهم بس عشان انا واهلي من حاره غير حارتهم
وطباعنا غير طباعهم
يعلم الله اني ماآذيتهم ! لكن الله المستعان
تصوري اني ساكنه فوق بيتهم انا وزوجة اخو زوجي
يمرون بابي ويتعدونه ! مايكلفون انفسهم يقولون تعالي اسهري
معنا ، حتى الهدايا يشترونها ويعطونها اطفاله وبنتي تناظر !
الحمدلله من فضله بنتي تلبس احسن الملابس وافضلها
وكل شي موفر لها من افضل الانواع !
حتى ان بعضهن احيان تطلب مني اشتري لأطفالها ملابس العيد
من اعجابها بأناقة بنتي
وش احكي لك !
آخر المواقف السخيفه البارح !
يتكلمون انهم يبون يخطبون لأخوهم ! قالت وحده اخطبوا له فلانه
قالت الثانيه ولاتقربين هالحاره < اللي هي حارتي
مانبي منهم < هذي وش تفسيرها بالله !!!
لكن ابتسمت لها ابتسامه صفرا ولاعلقت < احسن دوا للي يحاول يستفزك تحقره
اكتشفت ان الطيب ماينفع معهم
وعلاقتي معهم كأخوات ماتصلح، لأن لهم طباع ونظره لزوجة الاخ والابن غير اللي امي
واحنا ننظرها ونتعامل فيها مع زوجة اخونا
لقيت منهم من الكلام الجارح مايخطر على بالك رغم ان مافيني عيب انحرج منه
اهانات وغير ه
وزوجي بعد ست سنوات كلف نفسه ودافع عني لأنه شاف بعينه رسايل الواتساب
ولاماكان يصدقني رغم محبته لي لكن ياحبيبتي الاهل غير وهذا شي مفروغ منه
والله لو بتكلم ماتكفيني مجلدات وترى لي موضوع في قسم المشاكل المحلوله
بعنوان المعروف في غير اهله يمكن يفيدك
الحل
هو ان تتعاملين معهم برسميه !
لاتنتظري منهم ولامن زوجك انه ينصفك !
لاتتناقشي معهم في شي سواء يخصك ولايخصهم !
لاتنتقدي تصرفاتهم ولاحياتهم
انا يعاملوني كذا لاني مقدر اعيش دور المضلومه واخليهم
يستغلون اني زوجة ولدهم هذا الاستغلال البشع!
ولا زوجات اخوانهم كله من تحت لتحت والنفاق اللا محدود هههههه
تخيلي وانا حامل كانت اخت زوجي حامل
يقولون لي تعالي اطبخي الغدا بدلها لانها ياحرام تتعب اذا رفعت قدر الرز
مره سويتها وقلت والله حامل على راسي بس ترى حتى انا حامل
ولايتهيألي !! واذا في بطنها آدمي فأنا بعد آدمي
بعد ماولدت اضطريت ارجع بعد عشرين يوم كانت اختها الثانيه نفاس لها
اسبوع
كلمني زوجي روحي تحت امي تبيك !!!
قلت الى هنا وبس انت عارف وانا عارفه وش تبي هي !
ماني رايحه والله انا بعد نفاس وعندي بدل الطفل اثنين ولا عامله ولاشي
ماهو هي متسدحه على سريرها وتعالوا اطبخوا لها كيك لانها مشتهيه
كيك ! وعشا
انا ماني مجبوره أنفس احد وانا نفاس !
ألزم ماعلي صحتي وعطيته ف وجهه لاصار فيني شي مالي فايده لامنك
ولامنها
طبعا هو ساكت لانه عارف انه غلطان
قال طيب خلاص قولي مقدر وبس قلت له انا مقهوره منك ليش ماترفض
انت وتقول زوجتي تعبانه !
بصراحه فيه اوادم ماتنعطى وجه
ههههه احس ان موضوعك قلب المواجع رغم اني تصافيت معهم نوعا ما
رغم تلميحاتهم وكلامهم المايل
لكن طنش تعش تنتعش
مالك الا التطنيييييييييش وألزم ماعليك زوجك واطفالك واهلك
وانتبهي تتكلمين عن حياتك قدامهم حتى نوع الاكل اللي تشترين
لان الناس اللي كذا كل شي يناظرونه ويسوون منه سالفه
انا ماانصحك تبتعدين عنهم لكن جامليهم بس مو على حساب نفسك
وكوني معهم رسميه بأدب
تعاملي معهم بأخلاقك مو اخلاقهم لان النوع هذا ينحرج اذا اكرمتيه
ولو مااظهر هالشي
نصيييحه لوجه الله
لاتعتقدي بيوم انك تمونين عليهم مثل اختهم هذا تعاملي وتعاملك
مثل ماقال الشاعر
نفيض اخلاص نعطي من محبتنا بدون حساب
نحسب الناس كل الناس نسخه من طبايعنا : )
ممكن يكون السبب منك راجعي تصرفاتك معهم
عشان لانكون نظلمهم
عيشي حياتك مثل ماقلت لك
الا امه خليك تمام معها لأن قلب الرجل معلق في أمه ! ولو يدري انها خطا
ادعي الله ان يصرف عنك كل شر وشغلي سورة البقره كل يوم
ممكن يكون حسد
الله يشرح صدرك ويريح بالك
وعذرا على الاطاله
__________________
..